Hibulu8
1Nchəŋnchəŋ kənu ndə baʼa tʉʼ gìe nɔ bɛ mbɔ bʉʼʉ la nɔʼ kie Tiefɛ̀ʼndɛŋkwɛʼtəŋNyii ndə ɔ dùʼ yuo ndəŋ kwiiləŋ Nyii ndə ɔ shʉ́ə chàa fɔbə inchəŋ.2Ɔ nɔ tʉʼ fɔ̀ʼ chɔ mu yəŋ-kəchɔŋkwɛʼtəŋ-kə, ndə bɛ ŋkɛŋ kəlɛʼ ndə fʉ̀ə Tiekətʉ təmə fʉ̀ə woməsʉʉ fɛ.3Bʉʼka b̃ə nɔ dùʼhə tiefɛ̀ʼndɛŋkwɛʼtəŋNyii təmiyɔŋ ndə mə-kə́-kɔ́ kɔkə bɔŋleʼ fɛ̀ʼndɛŋ nɔ, yʉʼʉ-yə tiefɛ̀ʼndɛŋkwɛʼtəŋNyii nɔ kie ndə məkie fɔkə ndə məfɛ̀ʼndɛŋ nə yɔŋ ghɔ.4Kaʼ ɔ kʉ̌ʉ bɛ kəchisê, təmə ɔ mə buŋ bɛ wofɛ̀ʼndɛŋNyii fɛ, bʉʼka bʉəfɛ̀ʼndɛŋNyii bɛ ghɔ ndə bɔ̂ŋ kɔ́ kɔkə haʼ ndə nuʼ-Mushi dʉ̀ʼ.5Fɔʼɔ ndə bɔ̂ŋ tʉʼ fɔ̀ʼ nə bʉəfɛ̀ʼndɛŋNyii nɔ bɛ finə bɔŋleʼ bɛ lyʉʉhə-ŋkɛŋ-kənu-kə ndə i bɛ yuo. Nɔ bɛ haʼ nɔ ndə i kə bɛ tʉ Mushi, ndʉʉ ndə ɔ kə bɛ ndə məfʉ̀ə lɛʼ-Nyii-kə, Nyii shyùu tyunəkə-i mbɔ, “Kə láa mbɔ a fʉ̀ə haʼ ndə ntɛ ndə bə kə dʉ̀ʼ tʉ a ndʉʉ ndə a kə bɛ ndəŋ kwɔŋ.”6Bɔŋ nduɔ, fɔʼɔ ndə bə kɔ́ tʉ Klai, nɔ gʉ́ə daa chàa yi-yə ndə bə kə kɔ́ tʉ bʉəfɛ̀ʼndɛŋNyii ndə bɔ̂ŋ kə gwè hə bəshʉ, haʼ ndə ŋkaamə ndə ɔ kə lìʼ ntuu yʉʼʉbə Nyii nə yɔŋ, gʉ́ə chàa nduɔŋ məŋkaa bʉʼka i nɔ gwè nə yʉʼ ŋkɔʼnə.7Kaʼ fəŋ məŋkaa kʉ̌ʉ kə bɛ təmə mɔ̀ʼmbɛ fɛ, təmə bə məbʉ̀nə leʼ kə́ kʉ́ʉ ibɛʼ-yə fɛ.8Bɔŋ Nyii nɔ nə nyíɛ mɔ̀ʼmbɛ mu bɔŋ ndʉʉ ndə ɔ kə ghɔ̀ŋ mbɔ,“Tiekətʉ nɔ ghɔ̀ŋ mbɔ, B̈ii nyíɛ! Chîbə tʉʼ gwè,ndə mɔ bu gwìa ŋkaa-fefe-mə baʼabə bʉə-Isilɛ leʼnə bʉə-Juda.9Təmə bɛ ntɛ məŋkaa ndə mɔ kə gwìa baʼabə bətie-bʉə,ndʉʉ ndə mɔ kə yá kwiitə-ʉə chìhə bɔŋ fyú nə yɔŋ mu lɔʼɔ Iji fɛ.Bʉʼka bɔ̂ŋ kə tʉ́ʼ ŋkaamə-ɔŋ fɛ,ndʉʉmɛ, mɔ shìe liɛŋ-ɔŋ tʉ bɔŋ, nɔ ghɔ̀ŋ Tiekətʉ.10Tiekətʉ nɔ ghɔ̀ŋ mbɔ, nɔ bɛ ŋkaamə nɔ ndə mɔ bu gwìa baʼabə bʉə-Isilɛ ndʉʉ ndə chî-ghɔ̄-bə nɔʼ tíŋ,mɔ bu chìi bɔŋ kie nuʼ-ɔŋ mu ŋkwɔʼtə-yʉə.Mɔ bu nyɔ̀ʼ mu fyii-bɔŋ.Mɔ bu bɛ Nyii-yʉə,bɔ̂ŋ bɛ bʉə-bɔŋ.11Bɔ̂ŋ kʉʉ kie ndə mə-kə́-dàhə bʉə-kətoʼ-bʉə dàhə fɛ, təmə kə́ dàhə bəliŋ-bʉə dàhə, ghɔ̀ŋ mbɔ, ‘B̈ii nɔ kie ndə məkínə Tiekətʉ’ fɛ.Bʉʼka bɔ̂ŋ bənchəŋ bu kínə mɔ lʉ̀ hə ndəŋ vâaŋgwehə tə gɛ̀ dàa ndəŋ vâa-fɔŋ.12Bʉʼka tʉkə-ɔŋ bu vyíi ndəŋ nu-bʉəbʉə-bə-ʉə,təmə mɔ leʼnə kwɛ́nə bʉ̂ʼtə-ʉə fɛ.” 13Bʉʼka kaʼ Nyii kə́ kwə́ʼ te ŋkaa-fefe-mə, təmə ɔ nɔʼ fəŋ chìi fəŋ i dùɔŋ. Bɔŋ fɔkə ndə i nɔʼ dùɔŋ tə kə́ bə́ʼtə, nɔ dʉ̀ʼ mbɔ i tʉʼ gwè mì.
Wycliffe Bible Translators, Inc.