2 Timɔti3
1Kwɛ́nə mbɔ mbi bu shʉ́ə ndə ndyiʼtə-bəchî-bə.2Bʉʼka bʉə bu kə́ kʉ̀ʉ bə haʼ ŋwɔŋ-yʉə, kʉ̀ʉ kyʉə, kwɛ̀ŋ fyiihə, ŋàʼtə, kə́ kwə́ʼ nu-bʉəbʉə-bə, kwɛ̀ŋhə tʉ bətie-bʉə, təmə kə́ nyíɛ nu-jyujyu-bə ndə bəbɛʼbʉə tʉʼ chìi fɛ, təmə kə́ kɔ́ kuŋhə tʉ Nyii fɛ,3təmə kie ŋkʉ̂ʉ fɛ, təmə kie tʉvyiikə ndəŋ wo fɛ, bʉ́əhə yie-bəbɛʼbʉə, təmə kínə məyá ŋwɔŋ fɛ, chyʉ́nə tʉ bəbɛʼbʉə, təmə kʉ̀ʉ bʉ̀ʉ fɛ,4kə́ fɛ̀ŋ bəbɛʼbʉə, gòʼ kəndəŋnəkəndəŋnə, kə́ wùʼhə ŋwɔŋ nə tʉʉ gʉənə, kə́ kʉ́ʉ bə bʉʉ kəwʉʉnəmbi ndə mə-kə́-kʉ̀ʉ Nyii,5bɔ̂ŋ bu kə́ chìi fi nə məchimbi-yʉə tʉʼ kɔ́ kuŋhə tʉ Nyii bɔŋ tɛ́ŋ ghʉəʼkə ndə bəkɔ i chìi bɔŋ bɛ nɔ. B̈ii nyʉ́ʉ ntɛ bʉə-maa-bɔŋ.6Bʉəbɛʼbə mu bɔŋ nɔ tʉʼ nyáʼtə ŋíi mu njaa-bʉə-hə lóʼtə bəke ndə ghʉəʼkə-ʉə lʉ́ʉtə bʉʼka bʉ̂ʼtə-ʉə ndə i tʉʼ chɔ́ŋhə bɔŋ ghɔŋbə ntɛ-məntɔ-hə inchəŋ ndə i tʉʼ lʉ̀ bɔŋ gɛ̀ nə yɔŋ,7bəke ndə bɔ̂ŋ tʉʼ yétəyétə təmə bəkɔ bɔŋ nə kínə shʉəŋ fɛ.8Haʼ ndə Jɛni ghɔŋ Jɛmbɛla kə́ dʉ̀ʉhə nubə ndə Mushi kə́ dàhə, nɔ bɛ haʼ nɔ ndə bʉə-bɔ̄ŋ tʉʼ dʉ̀ʉhə shʉəŋ, bʉə ndə bə nɔʼ bʉ́əhə ndaahə-ʉə, təmə bɔ̂ŋ kʉ̀ʼnə ndə məmɔʼfyiihə-ʉə ndəŋ Nyii fɛ.9Bɔ̂ŋ bɔŋ kʉʉ gɛ̀ dɔ̀ŋnə fɛ, fɔʼtə-ʉə kɛ̀ʼnə, bʉə bənchəŋ nyíɛ bɔŋ nə bənɔ̌ʼɔ haʼ ndə i kə bɛ tʉ bʉə-bīŋ bəbûu le.10Mbəŋ-aŋ bɔŋ nɔʼ nyíɛ nubə ndə mɔ kə dàhə, ntɛ nuʼ-ɔŋ, luu məchimbi-ɔ, məmɔ̀ʼfyii ndə mɔ kə mɔ̀ʼfyii ndəŋ Nyii, ntɛ ndə mɔ kə yá fyii-ɔ, ntɛ ŋkʉ̂ʉ ndə mɔ kə kie, ntɛ ndə mɔ kə lyʉ̀ʉtə́nə,11ntɛ ndə bə kə chɔ́ŋhə mɔ ghɔŋbə ntɛ ŋgʉəʼ ndə i kə bɛ tʉ mɔ mu Antiɔk, Ikonioŋ leʼnə Lista, ndə mɔ lyʉ̀ʉtə́nə mu mbʉ ŋgʉəʼ, Tiekətʉ kwáa mɔ muŋgɔ nchəŋnchəŋ-ɛŋ.12Bʉə bənchəŋ ndə bɔ̂ŋ mɔ̀ʼfyiihə-ʉə ndəŋ Klai Jiso kə́ kʉ́ʉ məchímbi ndə ntɛ ndə i bu kɔ́ kuŋhə tʉ Nyii, bə bu chɔ́ŋhə ɔŋ,13bɔŋ bʉə-bʉ̂ʼʉ ghɔŋbə bʉə ndə bɔ̂ŋ tʉʼ fə́ʼhə bʉə mbɔ bɔ̂ŋ bɛ ŋkɛŋ-bʉə-hə təmə bɔ̂ŋ kə́ bɛ yɔŋ fɛ, bu kə́ bìʼ chìi bʉ̂ʼʉ, bìʼ chìi i tyíitə, kə́ fə́ʼhə bəbɛʼbʉə bɔŋleʼ kə́ fə́ʼhə ŋwɔŋtə-ʉə ghɔ.14Bɔŋ tʉ m̈bəŋ-aŋ, lyʉ̀ʉtə́nə ndəŋ nubə ndə a nɔʼ kə yétə i súunə mu kətʉ-a, kə́ kínə bʉə ndə a kə yétə kəghɔ-bɔŋ.15Ä bɔŋleʼ kə́ kwɛ́nə mbɔ lʉ̀ hə vaambuɔ, a nɔʼ kə kínə ŋwɔʼnə-Nyii ndə i bɛ ŋkʉʉ, ndə i kə kɔ́ mukətʉ-súunə tʉ a ndə ĩ gwè nə ŋkwaa tíŋ hə bɔ̌ŋ məmɔʼfyii-a ndəŋ Klai Jiso.16Ŋwɔʼnə Nyii nchəŋnchəŋ-ɛŋ nɔ bɛ fɔkə ndə Nyii yìhə, ndə ĩ kwáa ndə mədàhə bʉə, sɔ́ʼ bʉə ndə mɔ̀ʼmbɛ, ndə məbʉ̀nə shʉ̀tə wo ndʉʉ ndə ɔ mɔ̀ʼ fia bɛ́, tʉ bʉə ndə məyetə ndə məbɛ ndyʉndyʉ,17mbɔ i chʉʼ bɔ́ wo ndə ɔ tʉʼ fɔ̀ʼ tʉ Nyii, ɔ kɛŋ kʉ̀ʼnə ndə fɔʼ-jyujyu-tə inchəŋ.
Wycliffe Bible Translators, Inc.