2 Kɔlɛŋ6
1Baʼa nɔ fúu ghɔkə baʼabə Nyii mɔʼɔ ndə məfʉ̀ʉtə bii ndə bii nɔʼ kie buuŋjyu-Nyii mbɔ bii mə fí njʉnjʉ fɛ.2Bʉʼka Nyii nɔ ghɔ̀ŋ mbɔ,“Ndʉʉ ndə i kə kʉ̀ʼnə tʉ mɔ ndə məyʉ́ bii, mɔ yʉ́ gwia-yii.Ndʉʉ ndə i kə kʉ̀ʼnə tʉ bii ndə məkie ŋkwaa kəghɔ-mɔ, mɔ kwáa bii.” B̈ii yʉ́, nduɔ nɔ bɛ mbʉ ndʉʉ ndə i kʉ̀ʼnə, nduɔ nɔ bɛ ndʉʉ tʉ Nyii ndə məkwáa bii.3Baʼa mɔ̀ʼ ŋkyʉʉhəkə tʉ wotəmiyɔŋ fia fɛ, mbɔ b̈ə mə yi nyíɛ mɔ̀ʼmbɛ ndə fɔʼɔ-yaʼ fɛ.4Bɔŋ ndə vâafɔʼɔ-Nyii, baʼa nɔ dʉ̀ʼ ŋwɔŋ-yaʼ mbɔ baʼa nɔ bɛ bʉə jyujyu ndə nubə inchəŋ nə məlyʉ̀ʉtə́nə shʉ́əshʉ́ə, mu məchɔ́ŋhə ndə bə kə́ chɔ́ŋhə, mu mbi shʉ́əshʉ́ə, mu ŋgʉəʼ,5mu byuʼtə, mu njaa-chaŋ, mu mbyuutəmbyuutə, mu məkwɔ̀ŋ ŋwɔŋ, mu məchí nə mbɛŋhə, mu jyʉʉ.6Baʼa nɔ kə dʉ̀ʼ ŋwɔŋ-yaʼ mbɔ baʼa bɛ bʉə jyujyu nə mətʉ́ʼ ŋwɔŋ-yaʼ tʉ́ʉnə, nə ndaa, ndə məghʉ́əhə fyii, ndə mədʉ̀ʼ nuʼ jyujyu, nə ghʉəʼ-kəLyʉʉhəNyii-kə leʼnə ŋkɛŋ ŋkʉ̂ʉ.7Baʼa lɔ̀ʼ ŋgieNyiikə nə shʉəŋ. Baʼa kə́ fɔ̀ʼ nə ghʉəʼ-Nyii-kə. Baʼa yá mə bɛ ndyʉndyʉ ndə fɔ-chɔ̂-bə kwiimɔʼnə-baʼa ndə məmɔ̀ʼ chɔ̂ nə yɔŋ bɔŋleʼ yá kwiiŋkwie-baʼa ndə məkyʉ̀hə ŋwɔŋ-yaʼ nə yɔŋ.8Baʼa fɔ̀ʼ tʉ Nyii ndʉʉ ndə bə kɔ́ kuŋhə tʉ baʼa ghɔŋbə ndʉʉ ndə bə mɔ̀ʼ tʉvyiikə-aʼ, fɔ̀ʼ ndʉʉ ndə bə bʉ́əhə yie-yaʼ ghɔŋbə ndʉʉ ndə bə chʉ̀ʉ baʼa. Bə lʉ̀ baʼa nə bʉə fə́ʼhə, tʉ baʼa bɔŋ tʉʼ gìe shʉəŋ.9Bə nɔ lʉ̀ baʼa ndə bʉə ndə bə gòʼ təmə kínə bɔŋ fɛ, bɔŋ bə kínə baʼa jyujyu. Baʼa bɛ nə bʉə ndə bɔ̂ŋ tʉʼ gwè kwúkwú, bɔŋ nyíɛ, baʼa kə́ bɛ ŋɛnə. Bə gwúu baʼa təmə bɔŋ yí fɛ.10Bə kə́ kɔ́ tʉʉbʉə tʉ baʼa, baʼa bɔŋ nɔ kə gòʼ bə nə tʉʉjyu ndə vɛʼ inchəŋ. Baʼa kə́ bɛ bʉə-kəbyuu, bɔŋ kə́ kɔ́ fʉʼ-Nyii-kə tʉ bəbɛʼbʉə. Təmə baʼa kie fɔkə fɛ, bɔŋ kie fɔbə inchəŋ.11Baʼa nɔʼ kwə́ʼ tʉ bii təmə kə́ lə̀ŋ nubɛʼkə fɛ, bʉə-Kɔlɛŋ, baʼa nɔ kʉ̀ʉ bii nə fyiihə-aʼ inchəŋ.12Baʼa tʉʼ lə̀ŋ ŋkʉ̂ʉ-yaʼ hə kəghɔ-bii fɛ, bii bɔŋ kə́ lə̀ŋ ŋkʉ̂ʉ-yii hə kəghɔ-baʼa.13Mɔ nɔ tʉʼ kwə́ʼ tʉ bii fi nə bii bɛ vâa-bɔŋ, b̈ii kie ntɛ fyii tʉ baʼa ndə baʼa kie tʉ bii, kʉ̀ʉ baʼa nə fyiihə-ii inchəŋ.14Kə bii mə fúu nuɔ ndə məbɛ fɔkə imɔʼ biibə bʉə ndə bɔ̂ŋ gòʼ təmə nɔʼ bɛ́ŋ Nyii fɛ. Bəkɔ mə bɛ ndyʉndyʉ fúu nuɔ ghɔŋbə nuʼ bʉəbʉə təka? Byuunɔ, bəkɔ mbi súunə yúnə ghɔŋbə njəŋkə təka?15Bəkɔ Klai shyʉ̀ʉ gyʉʉ ghɔŋ mbʉ Debulu təka? Byuunɔ, bɛ ntɛ yʉʉ ka ndə bəkɔ wo ndə ɔ nɔʼ bɛ́ŋ Nyii gyʉ̀ə ghɔŋ wo ndə ɔ gòʼ təmə nɔʼ bɛ́ŋ Nyii fɛ?16Bɛ ka ndə njaafɛ̀ʼndɛŋNyii ndə ɔ bɛ ghɔ shyʉ̀ʉ gyʉʉ chɔ ghɔŋbə bənyii? Bʉʼka bʉʼʉ nɔ bɛ njaafɛ̀ʼndɛŋNyii ndə ɔ bɛ ghɔ, ndə Nyii ghɔ̀ŋ mbɔ,“Mɔ bu kə́ chí baʼa bɔŋkə́ tòʼ baʼa bɔŋ,mɔ bu bɛ Nyii-yʉə,bɔ̂ŋ bɛ bʉə-bɔŋ. 17Nɔ, b̈ii fyúhə ŋwɔŋ-yii mu bɔŋ,bɛ ŋkʉ̂ʉ ndəŋ bɔŋ, nɔ ghɔ̀ŋ Tiekətʉ nɔ.Kə bii mə kə̀ŋ fɔ-bʉəbʉə-kə nə fɔkə ndə i bu nyàatə bii fɛ,mɔ buŋ bɛ́ŋ bii. 18Mɔ bu bɛ Tie-yii,bii bɛ vâa-bɔŋ bələŋ ghɔŋbə bəke,nɔ ghɔ̀ŋ Tiekətʉ ndə ɔ kie ghʉəʼkə inchəŋ.”
Wycliffe Bible Translators, Inc.