1 Timɔti5
1Kə a mə sɔ́ʼ woghəŋ shʉ́əshʉ́ə fɛ, kwə́ʼ tʉ ɔŋ buɔbuɔ fi nə ɔ bɛ tie-a. Lʉ̀ vâakəyɔwo bələŋ ndə bəliŋ-ba,2kwə́ʼ tʉ bəke ghəŋ buɔbuɔ ndə bənaa-ba, bɔŋleʼ kwə́ʼ tʉ vâakəyɔwo bəke ndə bəliŋ-ba, fɔ̀ʼ nubə-ɔŋ inchəŋ nə fyii-a itʉ́ʉnə.3B̈ii kɔ́ kuŋhə tʉ bəkwuʼ bəke ndə bɔ̂ŋ kɛŋ bɛ ŋkɛŋ bəkwuʼ bəke.4Bɔŋ kaʼ kwuʼ woke kie vâa byuunɔ vâavâa, b̈ɔ̂ŋ fəŋ yétə ndə məchímbi ndə ntɛ ndə i bu kə́ kɔ́ kuŋhə tʉ Nyii mu yʉə-yə chunjaatə, nɔ bɛ ntɛ nɔ ndə bɔ̂ŋ bu leʼ tyú ŋgʉəʼ ghɔ tʉ bətie-bʉə. Bʉʼka nɔ nukə nɔ ndə i bʉ̀ʉ shʉ-Nyii.5Ŋ̃kɛŋ kwuʼ woke ndə ɔ bɛ tətɛʼ ɛ, təmə kie wo ndə məkwáa ɔ fɛ, ñɔ yʉ́əʼnə ndəŋ Nyii, kə́ gháaNyii bɔŋleʼ gwìa ŋkwaa tʉ ɔŋ shʉ́əshʉ́ə ndʉʉbətyuʼ ghɔŋ ndʉʉnəchî.6Bɔŋ kwuʼ woke ndə ɔ kɔ́ ŋwɔŋ-ɛŋ ndə məyú mbi nɔʼ kwú, buŋ kə́ dùʼ mbi.7Mɔ̀ʼ tʉ̂ʼtə-ɔ̄ŋ tʉ bʉə ndə bɔ̂ŋ nɔʼ bɛ́ŋ Nyii, təmə wo leʼ kie nukə ndə məgìe te bɔŋ bʉəbʉə fɛ.8Kaʼ wo gòʼ təmə kə́ lɛ́nə bʉə-kəlɔŋ-bi fɛ, fɔŋ ɛŋ kə́ bɛ yi-yə bʉə mu njaa, təmə ɔ nɔʼ tɛ́ŋ məmɔ̀ʼfyii ndəŋ Nyii ndʉʉmɛ i dʉ̀ʼ mbɔ nuʼ-i nɔ byʉ́ʼ tə chàa yi-wo-yə ndə ɔ gòʼ təmə kínə Nyii fɛ.9Kaʼ kwuʼ woke gòʼ təmə nɔʼ tíŋ ŋgʉʼhə wuŋ ntʉʼʉ fɛ, kə a məkɔ́ yie-e mu ŋwɔʼnə ndə bə nyɔ̀ʼ yie-bəkwuʼ-bəke-tə chɔ fɛ. Ɔ bɔŋ kie ndə məbɛ kwuʼ woke ndə ɔ kə kie haʼ woləŋ imɔʼ,10kie yie jyujyu ndə fɔʼ-jyujyu-tə ndə ɔ tʉʼ fɔ̀ʼ, kaʼ ɔ nɔʼ kə bɔ́ vâa bɔ̂ŋ kóʼ, nɔʼ kə lʉ̀ bʉə-mətòʼ chunjaa-ɔ nə tʉʉjyu, nɔʼ kə líʼtə fʉəŋ-bʉə-Nyii-tə, nɔʼ kə kwáa bʉə ndə bɔ̂ŋ bɛ mu ŋgʉəʼ bɔŋleʼ kɔ́ ŋwɔŋ-ɛŋ ndə mə-kə́-fɔ̀ʼ nu-jyujyu-bə.11Kə bii mɛ bɔŋ nyɔ̀ʼ yie-bəkwuʼ-bəke-tə ndə bɔ̂ŋ bíe vâakəyɔwo mu mbʉ ŋwɔʼnə fɛ, bʉʼka ndʉʉ ndə bɔ̂ŋ bu yi kie jyʉʉ bələŋ fyii-bɔŋ nɔ, bɔ̂ŋ shìe liɛŋtə-ʉə ndəŋ Klai kə́ kʉ́ʉ ndə məgɛ̀ nə wʉə lɔŋ.12Nɔ, i chìi b̈ɔ̂ŋ gwù fɛʼɛ, bʉʼka bɔ̂ŋ nɔʼ bə́ʼ ŋkɔʼnə ndə bɔ̂ŋ kə fəŋ chìi tʉ ɔŋ.13Ndə məbìʼ chɔ, bɔ̂ŋ bu yétə ndə məbɛ bʉə nduunə, kə́ lɔ̀ hə chusii dàa chusii bɔ̂ŋ kʉʉ bɛ haʼ bʉə nduunə fɛ, bɔŋ bu bɛ bənɔ́sʉ́hə, kə́ leʼ kɔ́ chu-yʉə ndə nu-bəbɛʼbʉə-bə, kə́ gìe nubə ndə bɔ̂ŋ gòʼ təmə kie ndə məgìe fɛ.14Nɔ, mɔ nɔ kʉ̀ʉ mbɔ bəkwuʼ b̈əke ndə bɔ̂ŋ bíe vâakəyɔwo bʉ̀nə kie lɔŋ, bí vâa, kə́ lɛ́nə njaa-yʉə, təmə kɔ́ fia tʉ wobàa ndə məsʉ́ʉ, kə́ bʉ́əhə yietə-ʉə fɛ.15Bʉʼka bəbɛʼbəkwuʼ bəke nɔʼ mɔ̀ʼ fia bɛ́, kíahə ŋwɔŋtə-ʉə ndə məgɛ̀ hə bɔ̌ŋ Sata.16Kaʼ woke bɛ ghɔ ndə ɔ nɔʼ bɛ́ŋ Nyii kie bəkwuʼ bəke kəlɔŋ-bɔŋ, ɔ̈ kə́ kwáa bɔŋ. Kə bɔŋ mə kɔ́ bɛʼkə tʉ chɔshi fɛ, mbɔ chɔshi chʉʼ kie fia ndə mə-kə́-kwáa bəkwuʼ bəke ndə bɛ ŋkɛŋ bəkwuʼ bəke.17Bəntəŋbəshʉ ndə bɔ̂ŋ fɔ̀ʼ jyujyu nə bəntəŋbəshʉ, bə nɔ kie ndə məkɔ́ kuŋhə tʉ bɔŋ vɛʼ bûu, fɔŋ ɛŋ kə́ bɛ bʉə ndə bɔ̂ŋ tʉʼ fɔ̀ʼ shʉ́əshʉ́ə ndə mə-kə́-lɔ̀ʼ ŋgieNyiikə bɔŋleʼ dàhə,18bʉʼka ŋwɔʼnə-Nyii nɔ ghɔ̀ŋ mbɔ, “Kə a mə kɔ́ fyîi chu mbʉʉ ndʉʉ ndə ɔ tʉʼ bɛ̀nə suu fɛ” bɔŋ, “Wofɔ̀ʼ nɔ kie ndə məkie lɔʼɔbə-i.”19Kə a mə bɛ́ŋ nukə ndə bə gìe kətʉ ntəŋbəshʉ fɛ, yaʼkɛŋ mbɔ a yʉ́ hə chu bʉə bəbûu byuunɔ bʉə bətia.20Ndə bʉə ndə bɔ̂ŋ tʉʼ chìi bʉ̂ʼʉ gɛ̀gɛ̀, sɔ́ʼ bɔŋ bəshʉ bʉə bənchəŋ mbɔ bəʼkə chʉʼ fàa.21Bəshʉ Nyii ghɔŋbə Klai Jiso leʼnə bʉəntəŋNyii ndə ɔ séʼ, mɔ nɔ kàhə mbɔ ä tʉ́ʼ nubə-ɔ̄ŋ, təmə kə́ túhə shʉ fɛ byuunɔ kə́ lɛ́nə shʉ-wo ndə nukə təmiyɔŋ ndə a tʉʼ fɔ̀ʼ fɛ.22Kə bii mə lə̀ŋnə ndə məmɔ̀ʼ ghɔkə ndəŋ bʉə ndə məchɔ̀ʼhə bɔŋ kɔ́ ndə fɔʼɔ-Nyii fɛ, kə bii mə fúu nuɔ ndə bʉ̂ʼʉ-bəbɛʼbʉə-tə fɛ, ghɔkə-i bɛ itʉ́ʉnə.23Kə a mə kə́ nú haʼ muu báa muu fɛ, kə́ nú vaadyʉʼʉ mədʉ̀ʼ məniʼ bʉʼka tɔbə-a ghɔŋbə yɔʼkə ndə i chʉʼ kɔ́ ŋgʉəʼ mbʉə-a le.24Kə́ kwɛ́nə mbɔ, b̃ə nɔ nyíɛ bʉ̂ʼ-bʉəbɛʼbə-tə ntaa, bʉə bənchəŋ kínə bʉ̂ʼtə-ʉə bɔ̂ŋ bu gɛ̀ tə́nə mu fɛʼɛ. Bɔŋ bʉ̂ʼ-bəbɛʼbʉə-tə bu shi kɛ̀ʼnə bə bɔ̌ŋ.25Nɔ bɛ haʼ nɔ, fɔʼ-jyujyu-bəbɛʼbʉə-tə bə nɔ tʉʼ nyíɛ ntaa, bɔŋ buŋ yi-yə ndə i líi mə nə líi tə gɛ̀ lìʼ nɔ fɛ.
Wycliffe Bible Translators, Inc.