1 Bita5
1Mɔ, ndə mɔ bɛ ntəŋbəshʉ ghɔ nə mbəŋ-ɔŋ, nɔ tʉʼ fʉ̀ʉtə bəntəŋbəshʉ ndə bɔ̂ŋ bɛ mu bii mu chɔshi. Mɔ nɔ lʉ̀ shʉ-ɔ nyíɛ ŋgʉəʼ ndə Klai kə tíŋ hə muŋgɔ, bɔŋ-bu-leʼ kie məgʉ́ə baʼa ɔ ndʉʉ ndə bə bu kɛ̀ʼ məgʉə-e. Mɔ nɔ tʉʼ fʉ̀ʉtə bii,2b̈ii bɛ bənchyii kətia binjyʉʉhə ndə Nyii kɔ́ tʉ bii, b̈ii kə́ lɛ́nə bɔŋ ndə ŋkʉʉnə tʉʉ-yii haʼ ndə Nyii kʉ̀ʉ mbɔ i bɛ, təmə i bɛ fi nə bə kwɛ̀ŋhə bii kwɛ̀ŋhə fɛ. B̈ii kə́ fɔ̀ʼ fɔʼɔ-yii təmə bɛ bə haʼ bʉʼka lɔʼɔbə fɛ, ï bɔŋ kɛŋ kóʼ bə hə mu fyii-bii ndə məfɔ̀ʼ ndə Nyii kʉ̀ʉ mbɔ ï bɛ.3Kə bii mə-kə́-jìehə bʉə ndə bə kɔ́ tʉ bii ndə mə kə́ lɛ́nə bɔŋ fɛ, b̈ii bɔŋ nɔ kie ndə məbɛ fʉʼkənu tʉ bɔŋ.4Ndʉʉ ndə mbʉ nchyiikwɛʼtəŋ ndə ɔ̃ chyìi binjyʉʉhə bu gwè nɔ, bə fùɔ ŋgʉʼʉ məgʉ́ə kətʉ-bii ndə i mə nə byʉ́ʼ fɛ.5Nɔ bɛ haʼ nɔ, bii vâakəyɔwo, nɔ kie ndə məké ŋwɔŋtə-ii tʉ bəntəŋbəshʉ. B̈ii bənchəŋ mɔ̀ʼ məlʉ̀ ŋwɔŋ-yii sê nə ndyi mbʉə-bii ndə məfɔ̀ʼ tʉ ŋwɔŋtə-ii, bʉʼka ŋwɔʼnə-Nyii nɔ ghɔ̀ŋ mbɔ,“Bʉʼka Nyii nɔ tʉʼ dʉ̀ʼ ghɔkə-i chu bʉə-tʉʉ gʉənə,bɔŋ kə́ dʉ̀ʼ buuŋjyu tʉ bʉə ndə bɔ̂ŋ lʉ̀ ŋwɔŋ-yʉə sê.” 6B̈ii shúʼhə ŋwɔŋ-yii sê ndʉʉmɛ, tɔʼɔ fɔŋ kəghʉəʼ Nyii, mbɔ ɔ chʉʼ yi chɔ̀ʼhə bii ghɔʼ ndə yi-yə ndʉʉ ndə i kʉ̀ʼnə tʉ ɔŋ.7B̈ii chɔ̀ʼhə nubə ndə i tʉʼ chɔ́ŋhə bii nchəŋnchəŋ mɔ̀ʼ kəghɔ-ɔ, bʉʼka ɔ nɔ tʉʼ lɛ́nə bii.8B̈ii yá ŋwɔŋ-yii, kə́ kíi dyʉʼbə. Wobàa-yii, Debulu, nɔ tʉʼ nyʉ́ʉ yə̀ŋ mbʉə-bii ndə bʉʼ kə́ lú, kə́ kʉ́ʉ wo ndə məsáatə ɔŋ.9B̈ii kwɛ̀ŋhə tʉ ɔŋ, tə́nə shʉ́əshʉ́ə ndə məmɔ̀ʼfyii ndəŋ Nyii, kə́ kínə mbɔ ntɛ ŋgʉəʼ ndə bii tʉʼ nyíɛ, nɔ bɛ haʼ nɔ ndə bəbɛʼbəliŋ-bii ndə bɔ̂ŋ nɔʼ bɛ́ŋ Nyii mu kəwʉʉnəmbi inchəŋ tʉʼ lyʉ̀ʉtə́nə ndə mənyíɛ ŋgʉəʼ.10Ndʉʉ ndə bii nɔʼ nyíɛ ŋgʉəʼ ndə kʉʉkə məniʼ nɔ, Nyii ndə ɔ kie buuŋjyu inchəŋ, ndə ɔ tíi bii ndə məbɛ mu məgʉə-e ndə i kie liʼ-i fɛ tíŋ hə bɔ̌ŋ Klai, bu bʉ̀nə shʉ̀tə nubə i tə́nə ndyʉndyʉ tʉ bii nə mbəŋ-ɛŋ, chìi məmɔʼfyiihə-ii ndəŋ ɔŋ bìʼ shʉ́ə, bɔŋleʼ kɔ́ ghʉəʼkə tʉ bii, bɔŋleʼ kɛŋ dùʼhə bii sê.11G̈hʉəʼkə bɛ yi-yə təmə liʼ-i ghɔ fɛ. Ï bɛ haʼ nɔ.12Sabanu nɔ kwáa mɔ ndə mənyɔ̀ʼ vaadyʉʼʉ ŋwɔʼnə-ɔ̄ŋ. Mɔ nɔ nyíɛ ɔŋ ndə Kʉlʉtɛŋ ndə ɔ tʉʼ gìe shʉəŋ. Mɔ nɔ tʉʼ kʉ́ʉ kwèʼhə bii, bɔŋleʼ shyíi bii mbɔ yɔ̄ŋ-yə nɔ bɛ ŋkɛŋ buuŋjyu-Nyii. B̈ii yá tə́nə chɔ shʉ́əshʉ́ə.13Bəʼ-bʉə-Nyii-kə ndə bɔ̂ŋ bɛ mu chɔshi Babilɔŋ, ndə Nyii nɔʼ séʼ bɔŋ ghɔ, nɔ tə́ŋ nchaʼtə-yʉə tʉ bii, ghɔŋbə vaa-ɔŋ Mak.14B̈ii gìe tʉ ŋwɔŋtə-ii ndə mədʉ̀ʼ ŋkʉ̂ʉ ndə bʉə ndə bɔ̂ŋ nɔʼ bɛ́ŋ Nyii kie.
N̈yii kɔ́ fyiighʉ́ənə tʉ bii bənchəŋ ndə bii bɛ mu Klai.
N̈yii kɔ́ fyiighʉ́ənə tʉ bii bənchəŋ ndə bii bɛ mu Klai.
Wycliffe Bible Translators, Inc.