1 Kɔlɛŋ11
1B̈ii lʉ̀ hə kəwu-mɔ haʼ ndə mɔ tʉʼ lʉ̀ hə kəwu-Klai.2Nduɔ, mɔ nɔ tʉʼ chʉ̀ʉ bii bʉʼka bii nɔ tʉʼ kwɛ́nə nubə inchəŋ ndə mɔ kə fɔ̀ʼ bɔŋleʼ yá mbʉ bənu ndə mɔ dàhə bii nə yɔŋ tʉ́ʼ.3Mɔ bɔŋ kə́ kʉ́ʉ mbɔ b̈ii kínə mbɔ tʉ-woləŋ-kə təmiyɔŋ nɔ bɛ Klai, tʉ-woke-kə kə́ bɛ ləŋ-ɛŋ, tʉ-Jiso-Klai-kə kə́ bɛ Nyii.4Woləŋ təmiyɔŋ ndə ɔ tʉʼ gháaNyii byuunɔ kə́ téʼ ntəŋ ndə i gwè hə kəghɔ-Nyii nə tʉkə-i ibɔ̀ŋnə, nɔ tʉʼ kɔ́ tʉvyiikə tʉ Klai.5Bɔŋ woke təmiyɔŋ ndə ɔ tʉʼ gháaNyii byuunɔ kə́ téʼ ntəŋ ndə i gwè hə kəghɔ-Nyii təmə bɔ̀ŋ tʉkə-i fɛ, nɔ tʉʼ kɔ́ tʉvyiikə tʉ wo ndə ɔ kie tʉkə-i. I nɔ bɛ haʼ ndə məshyìi tʉkə-i.6Bʉʼka, kaʼ woke gòʼ təmə bɔ̀ŋ tʉkə-i fɛ, ɔ̈ chètə, ï túŋhə. Bɔŋ bʉʼka i bɛ tʉvyiikə tʉ woke ndə məchètə nyu-kətʉ-hə-i byuunɔ shyìi tʉkə-i, ɔ̈ bɔ̀ŋ mbʉ kətʉ.7Bʉʼka woləŋ kie ndə məbɔ̀ŋ tʉkə-i fɛ, bʉʼka ɔ nɔ bɛ finə-Nyii bɔŋleʼ kə́ bɛ məgʉə-e, bɔŋ woke nɔ bɛ məgʉə-woləŋ.8Bʉʼka bə kə chìi woləŋ hə ndəŋ woke fɛ, bə nɔ kə chìi woke hə ndə woləŋ.9Təmə bə bɔŋ kə chìi woləŋ bʉʼka woke fɛ, bə bɔŋ nɔ kə chìi woke bʉʼka woləŋ.10Nɔ bɛ luu-i nɔ ndə woke kie ndə məbɔ̀ŋ tʉkə-i ndə cheʼkə ndə mədʉ̀ʼ mbɔ ɔ nɔ kie wo ndə ɔ tʉʼ gìe hə kətʉ-ɔ, bɔŋleʼ bʉʼka bʉəntəŋNyii ghɔ.11Bɔŋ nɔ, bəshʉ Tiekətʉ, woke mə bɛ ghɔ təmə woləŋ fɛ, təmə woləŋ mə bɛ təmə woke fɛ.12Bʉʼka ndə bə kə chìi woke hə ndəŋ woləŋ, nɔ tʉʼ bí woke bí woləŋ nduɔ. Nubə inchəŋ bɔŋleʼ gwè hə kəghɔ-Nyii.13B̈ii kwɛ̀ nə mbəŋ-yii mbɔ i bʉ̀ʉ tʉ woke ndə mə-kə́-gháaNyii təmə bɔ̀ŋ tʉkə-i fɛ mɛ?14Ntɛhə ndə Nyii chìi wʉʉnəmbikə-ɔ̄ŋ dʉ̀ʼ mbɔ i bɛ nu-kətʉvyiinə-bə tʉ woləŋ ndə mətʉ́ʼ nyu-dədə-hə kətʉ-ɔ fe?15Bɔŋ kaʼ woke tyúʼ nyu-dədə-hə kətʉ-ɔ, nɔ bɛ məbʉʉ-i fe? Bʉʼka bə nɔ kɔ́ nyuhə tʉ ɔŋ ndə məbɔ̀ŋ tʉkə-i chɔ.16Kaʼ wo kə́ kʉ́ʉ mbɔ ɔ̈ kə́ yá bəŋʉʉ te yɔ̄ŋ-yə, ɔ̈ kínə mbɔ baʼa leʼ kie ibɛʼ-yə ntɛ nuʼ fɛ, tə buŋ kɔmə, bəchɔshi-Nyii leʼ kie ibɛʼ-yə ntɛ nuʼ fɛ.17Bɔŋ te yɔ̄ŋ-yə tʉ̂ʼ ndə mɔ tʉʼ mɔ̀ʼ nduɔ tʉ bii, mɔ mə chʉ̀ʉ bii fɛ, bʉʼka ndʉʉ ndə bii tʉʼ chə̀ŋtə, nu-bʉəbʉə-bə ndə i tʉʼ fyú nɔ yɔ́ŋ chàa nu-jyujyu-bə.18Ndə fəŋ kənu, mɔ nɔ yʉ́ mbɔ ndʉʉ ndə bii tʉʼ chə̀ŋtə nə chɔshi, ŋkʉʉŋkʉʉ nɔ tʉʼ bɛ mu bii. Mɔ nɔ bɛ́ŋ kəbəʼ mbɔ yɔ̄ŋ-yə la bɛ shʉəŋ.19Ndə shʉəŋ, ŋkʉʉŋkʉʉ nɔ kie ndə məbɛ mu bii mbɔ bʉə ndə bɔ̂ŋ bɛ tʉ Nyii leʼ shʉəŋ bə chʉʼ chèʼnə bɔŋ.20Ndʉʉ ndə bii fə́nə kəyəŋ kəmɔʼ, bii kaa ndə məyú fɔyu-Tiekətʉ-bə leʼ shʉəŋ fɛ.21Bʉʼka ndʉʉ ndə bii chə̀ŋtə ndə məyú nɔ, mbyu wo-imɔʼ kə́ fə́nə yú yi-yə fɔbə mbɔ ibɛʼ-yə wo yi gɛ̀ nə jyʉʉ. Ibɛʼ-yə wo bɔŋ nú tə búu.22Bɛ ka! Bii kie mu njaahə ndə mə-kə́-yú bɔŋleʼ nú chɔ fe? Byuunɔ, bii bu kə́ dʉ̀ʉhə bʉə-Nyii bɔŋleʼ mɔ̀ʼ tʉvyiikə ndəŋ bʉə ndə bɔ̂ŋ gòʼ təmə kie fɛ mɛ? Mɔ bu ghɔ̀ŋ mbuka tʉ bii? Mɔ kie ndə məchʉ̀ʉ bii ndə nukə-ɔ̄ŋ mɛ? Mbee, mɔ mə mùutə fɛ.23Bʉʼka nubə ndə Tiekətʉ dàhə mɔ chɔ, nɔ bɛ yɔ̄ŋ-yə ndə mɔ tʉʼ kɔ́ tʉ bii ghɔ, mbɔ ndʉʉbətyuʼ ndə bə kə fɛ̀ŋ ɔŋ, ɔ lʉ̀ bele,24kʉ̂ʉ kɔ́ ndɔ chɔ tʉ Nyii, bə́ʼtə ghɔ̀ŋ mbɔ, “Nɔ bɛ mbɔʼ-mbʉə-ɔ nɔ ndə mɔ fɛ̀ʼndɛŋ chɔ yie-bii. B̈ii kə́ chìi yɔ̄ŋ-yə chʉʼ kə́ kwɛ́nə mɔ.”25Haʼ ndə nɔ, ɔ leʼ lʉ̀ ndʉ̂ʉ-məndʉʼ, ndʉʉ ndə bɔ̂ŋ nɔʼ yú fɔ-ndʉʉbuumbi-bə lìʼ, ghɔ̀ŋ mbɔ, “Ndʉ̂ʉ-ɔ̄, nɔ bɛ ŋkaa-fefe-mə ndə bə kɔ́ʼ nə fɔbʉəkə-ɔŋ. B̈ii kə́ chìi yɔ̄ŋ-yə, ndʉʉ tə mì ndʉʉ ndə bii nú, mbɔ bii chʉʼ kə́ kwɛ́nə mɔ.”26Ndʉʉtəmiyɔŋ ndə bii kwó bele-ɔ̄, bɔŋleʼ nú ndʉ̂ʉ-ɔ̄ nɔ, b̈ii kə́ lɔ̀ʼ kwu-Tiekətʉ, tə ɔ nə bʉ̀nə gwè.27Nɔ, wo ndə ɔ kwó bele-ɔ̄ byuunɔ nú ndʉ̂ʉ-Tiekətʉ-ɔ̄ təmə kə́ chí mbi ndə ntɛ ndə ĩ kɔ́ kuŋhə tʉ ɔŋ fɛ, təmə ɔ nɔʼ gwù fɛʼɛ ndə məchìi bʉ̂ʼʉ te mbɔʼ-mbʉə-Tiekətʉ ghɔŋbə fɔbʉəkə-i.28Nɔ, ẅo kíi ŋwɔŋ-ɛŋ, buŋ kwó mbʉ bele bɔŋleʼ nú mbʉ ndʉ̂ʉ.29Bʉʼka, kaʼ wo gòʼ təmə chèʼnə jyujyu nukə ndə mbɔʼ-mbʉə-Tiekətʉ bɛ yɔŋ ndʉʉ ndə ɔ tʉʼ kwó mbʉ bele bɔŋleʼ nú mbʉ ndʉ̂ʉ fɛ, təmə ɔ nɔ tʉʼ kwó bɔŋleʼ nú ŋkwɛ bʉəbʉə ndə i bu gwè ndəŋ ɔŋ.30Nɔ chìi yɔŋ buŋmbi yii kə́ lʉ́ʉtə bɔŋleʼ kə́ yɔ́ʼtə, tʉ bəbɛʼbə nɔʼ kwútə.31Bɔŋ kaʼ bʉʼʉ kíi ŋwɔŋtə-ʉʼʉ jyujyu, Nyii leʼ chʉ̀ə ŋkwɛ-yʉʼʉ bʉəbʉə fɛ.32Bɔŋ bɛ le, ndʉʉ ndə Tiekətʉ tʉʼ sɔ́ʼ bʉʼʉ, ɔ nɔ tʉʼ shʉ̀tə bʉʼʉ tʉ́ʼ fia, bʉʼka bʉʼʉ mə yi gwù fɛʼɛ bʉʼʉbə wʉʉnəmbikə mɔʼɔ.33Nɔ ndʉʉmɛ, bəliŋ-bɔŋ, ndʉʉ ndə bii chə̀ŋtə ndə məyú fɔ-Tiekətʉ-bə, b̈ii kʉ̀ʼ bəbɛʼbʉə.34Kaʼ jyʉʉ kə́ yɔ́ʼ wo, ɔ̈ yú fɔbə chunjaa, mbɔ ndʉʉ ndə bii chə̀ŋtə, təmə bə leʼ chìi bii gwù fɛ. Te bəbɛʼnubə, mɔ bu mɔ̀ʼ tʉ̂ʼ tʉ bii ndʉʉ ndə mɔ gwè.
Wycliffe Bible Translators, Inc.