রোমীয়1

1আং পৌল, যীশু খ্রীষ্টনি সাছে দাস, প্রেরিত জানৗ থাখৈ লিংহৎজানায় আরৗ ঈশ্বৗরনি মৗজাং খবরখৌ খৗথাবাইনৗ থাখৈ আলাদায়ৈ দৗনখাজানায়,2বে মৗজাং খবরখৌ ঈশ্বৗরা গাওনি নবিফৗরনি গেজেরজৗং সিগাংয়াওনৗ গৗথার শাস্ত্রয়াও সিমান লাখাদৗংমৗন।3বে মৗজাং খবররা বিনি বিসাজ্লানি বিয়ষয়ানৗ, জাইয়া মানসিনি মহরৈ দায়ূদনি জৗলৈয়াও সারিজাদৗং,4আরৗ জাইয়া গৗথার জিউনি বৗলৗজৗং থৈনায়নিফ্রায় ঠাংখাংফিননানৈ গাওখৌ নংগৌ ঈশ্বৗরনি বিসাজ্লা হৗন্নানৈ নুজাহৗবায়; বিয়ৗ জৗংনি ফৗরবু যীশু খ্রীষ্টআনৗ।5বিনি গেজেরজৗং জৗঙৗ অনুগ্রহ মৗনবায়, আরৗ প্রেরিত মুংখজানৗ মৗনবায়, জাহাথে গাছেন গুবুনহারিফৗরখৌ ফৗথাইনায়াও বিনি নামনি থাখৈ আজ্ঞাকারি জানৗ হানায় বাদি।6আরৗ বে গুবুনহারিফৗরনি গেজেরাও নৗংছৗরবৗ দংফায়ৗ, জাইফৗরখৌ যীশু খ্রীষ্টনি মানসিফৗর জানৗ থাখৈ লিংহৎদৗং।
7রোমাও থানায় সাফ্রৗমখৌবৗ, জাইফৗরখৌ ঈশ্বৗরা অন্নৗ আরৗ গাওনি গৗথার মানসিফৗর জানৗ থাখৈ লিংহৎবায়, বিছৗর গাছেননি থাখৈ আঙৗ লিৎদৗং।
জৗংনি বিফা ঈশ্বৗর আরৗ ফৗরবু যীশু খ্রীষ্টনি অনুগ্রহ আরৗ শান্তিয়া নৗংছৗরনি ছায়াও থাথৗং।
8সিগাংয়াও আঙৗ যীশু খ্রীষ্টনি গেজেরজৗং নৗংছৗর গাছেননি থাখৈ আংনি ঈশ্বৗরখৌ হামবায় হৗনৗ, মানৗনা নৗংছৗরনি ফৗথায়নাইনি খৗথানি বিষয়া সারা সংসারাও মিথিসাৎ জাবায়।9ঈশ্বৗর, জাইখৌ আঙৗ গাওনি জিউয়াও বিনি বিসাজ্লানি মৗজাং খবরখৌ প্রাচার খৗলামনৗ থাখৈ আংনি গাছেন গৗসৗজৗং সেবা খৗলামৗ, বিনৗ আংনি সাক্ষী যে, আঙৗ নৗংছৗরখৌ জেব্লাইবৗ প্রার্থনায়াও গৗসৗখাংফ্লাইয়ৗ।10আরৗ আঙৗ প্রার্থনা খৗলামৗ, জাহাথে ঈশ্বৗরা গৗসৗ জাব্লা নৗংছৗরনিয়াও থাংনৗ থাখৈ লামাখৌ খেওনান হৗনায়।
11মানৗনা আঙৗ নৗংছৗরখৌ নাইনৗ জৗবৗদ গৗসৗ জাদৗং, জাহাথে আং নৗংছৗরনৗ খাইছে আত্মিক দানখৌ হৗনৗ হানায় বাদি, জেয়া নৗংছৗরখৌ বৗলৗগ্রা খৗলামৗ।12নৗংছৗর আরৗ আং জাহাথে গাওজৗং গাও ফৗথাইনায়জৗং থুলুংগা হৗজ্লাইনৗ হানায়।13ও আংনি বিদা ফংবায়ফৗর আরৗ বিবো বিনানাওফৗর, আঙৗ নৗংছৗরখৌ মিথিহৗনৗ লুবৈয়ৗ যে আঙৗ গলে গলে নৗংছৗরনিয়াও ফৈনৗ গৗসৗয়াও সানদৗং, নাথায় দাসিমবৗ আঙৗ থাংনৗ হায়াখৈ। মানৗনা গুবুনহারিফৗরনি গেজেরাও আঙৗ জেরৈ গৗদান ফৗথাইগ্রাফৗরখৌ মৗন্দৗং, বেবাদিনৗ নৗংছৗরনি গেজেরাওবৗ মৗন্নৗ হানায়।
14আংহা, গ্রীকফৗরনৗবৗ আরৗ জাইফ্রা গ্রীক অৗঙা বিছৗরনৗবৗ, জ্ঞানী আরৗ জামবা জাইখিয়াজায়া আংহা বিবান হৗজাদৗং।15বিনিখাইনৗ রোম নৗগৗরাও থানায়ফৗরনি গেজেরাওবৗ মৗজাং খবরখৌ প্রচার খৗলামনৗ আংহা গৗবাং গৗসৗ দং।
16মৗজাং খবরনি থাখৈ আঙৗ লাজিয়া, মানৗনা বেয়ৗ ঈশ্বৗরনি বৗলৗ, জেয়া ফৗথাইগ্রা সাফ্রৗমনিবৗ থাখৈ উদ্ধার লাবৗয়ৗ, সিগাং যিহূদীফৗরনৗ, বিনি উনাও গুবুনহারিফৗরনৗ।17মানৗনা মৗজাং খবরনি গেজেরজৗং ঈশ্বৗরনি ধৗরৗমিয়ায়া নুসাৎ জাবায়, সাছে ধৗরৗমিয়ায়া, জাইয়া সিগাংনিফ্রায় জৗবনায়সিম ফৗথায়নায়নি গেজেরজৗং, জেরৈবাদি লিৎনায় দং, “ধৗরৗমিয়ায়া ফৗথাইনায়জৗং ঠাংনানৈ থায়ৗ।”
18ঈশ্বৗরনি রাগয়া স্বৗর্গৗনিফ্রায় মানসিনি গাছেন দুষ্টু খামানিফৗরনি আরৗ মানহারাফৗরনি বিরুদ্ধ নুসাৎ জাবায়, জাইফ্রা বিছৗরনি দুষ্টু খামানিফৗরনি গেজেরজৗং সৈথৗখৌ দমন খৗলামৗ।19বি সমনিফ্রায়নৗ ঈশ্বৗরনি বিষয়ৈ জেখৌ মিথিনাগৌ দংমৗন বিয়ৗ রৗখা রৗখা, মানৗনা ঈশ্বৗরা গাওনৗ বিছৗরনৗ মিথিহৗখাবায়।20বিনিখাইনৗ বিনি নুনৗ মৗননি গুনফ্রা, ঈশ্বৗরিক আখল আখু, বিনি জৗবনৗ গৗয়ি বৗলৗ আরৗ বিয়ৗ নংথারগৌ ঈশ্বৗর, সংসারখৌ সৗরজিনায়নিফ্রায় মানসিফ্রা বিনি দানায় মৗঙাফৗরজৗং রৗখা রৗখা মিথিনৗ মৗন্নৗ। বিনিখাইনৗ বিছৗরহা খাৎগৌনায়নি লামা গৈয়া।
21বিছৗরৗ ঈশ্বৗরখৌ মিথিগৌ, নাথায় বিছৗরৗ বিখৌ ঈশ্বৗর হৗন্নানৈ মহিমাবৗ খৗলামাখৈ আরৗ বাখনাইয়াখৈ, নাথায় বিছৗরনি সান্নায়ফ্রা খামানিয়াও ফৈয়ৈ জাবায় আরৗ জামবা গৗসৗয়া খৗমসি জাবায়।22বিছৗরৗ গাওছৗরখৌ জ্ঞানী দাবি খৗলামব্লাবৗ, বিছৗরৗ জামবাফৗর জাবায়।23আরৗ সৗলাইস্লোয়ৈ মহিমা গৗনাং থৈরৗঙি ঈশ্বৗরখৌ সিবিয়ামাৎনিনৗ থৈগ্রা মানসি বাদি, আরৗ দাওছেন, আরৗ জুনার আরৗ মানবায়গ্রা জুনারফৗরনি মহরৈ দানায় মূর্তিফৗরখৌছৗ খুলুমবায়।
24বিনিখাইনৗ ঈশ্বৗরা বিছৗরনি গৗসৗনি পাপজৗং বুংফবনায় লুবৈনাইফৗরাও, বিছৗরখৌ সাছেয়া সাছেজৗং বিছৗরনি মৗদৗময়াও গৗগ্লাইখ্লাইনৗ থাখৈ, জিনাহারি খালায়ফ্রাও হগারনান হৗবায়।25বিছৗরৗ নংখাইজৗং ঈশ্বৗরনি নংথারগৌখৌ সৗলাইস্লো খৗলামবায়, আরৗ সৗর্জিনায় মৗঙাফৗরখৌছৗ খুলুমবায় আরৗ সিবিদৗং, বি সৗর্জিগিরিখৌ অৗঙা, জাইয়া জেব্লাইবৗনি থাখৈ বাখ্নাইজায়ৗ। আমেন।
26বেনি থাখৈনৗ ঈশ্বৗরা বিছৗরনি লাজিথাওথাও মাওনৗ লুবৈখাংনায়, এমন কি, বিছৗরনি হৌয়া হিন্জাওসাফৗরনি সৗমৗন্দৗয়া সৗলাইস্লোয়ৈ গাওজৗং গাও অস্বাভাবিক খামানি মাওজ্লায়নাইয়াও হগারনান হৗবায়।27বিবাদিনৗ হৌয়াসাফ্রাবৗ হিন্জাওসাফৗরজৗং স্বাভাবিক সৗমৗন্দৗখৌ নাগারবায় আরৗ গাওজৗং গাও লুবৈজ্লায়ৗ মৗন। হৌয়াসাফ্রা গুবুন হৌয়াসাফৗরজৗং লাজিথাও থাও খামানি মাওদৗং, আরৗ বিছৗরনি গৗরৗন্ঠিনি থাখৈ গাও গাওনি গেজেরাও সাজাখৌ মৗন্নাগৌখৌ মৗনবায়।
28জেরৈবাদি, বিছৗরৗ ঈশ্বৗরনি জ্ঞানখৌ নেওছিদৗংমৗন, ঈশ্বৗরা বিছৗরনৗ গাজ্রি সান্নায় খৗলামনায়খৌ হগারনান হৗবায়, বিছৗরৗ বেখৌনৗ খৗলামৗ জেখৌ খৗলামনৗ নাংথারা।29বিছৗরৗ গৗসৗয়াও গাজ্রি সান্নায়, গাজ্রি, লুবৈনায় আরৗ গাওজৗং গাও গাজ্রি মাওজ্লাইনায়, মগন ছাজ্লাইনায়, সিথাৎজ্লাইনায়, বুজ্লাইনায়, ছৗলৈজ্লাইনায় আরৗ হিংসা খৗলামজ্লাইনায়। নাঙা ফাঙা রাইজ্লাইনায়,30নংবাং জাবাং রাইজ্লাইগ্রা, ঈশ্বৗরখৌ মুগৈগ্রা, নিন্দিগ্রা, ডুগামারা, গাজ্রি সানখাংগ্রা, বিমা-বিফানি খৗথা লায়ি;31বিছৗরৗ বুজিনৗরৗঙি, ফৗথায়থি গৈয়ি, অন্নায় গৈয়ি দয়া গৈয়ি।32যদিও বিছৗরৗ ঈশ্বৗরনি ধৗরৗমিয়ানি হুখুমখৌ মিথিয়ৗ, যে জাইফ্রা বে রৗখৗমনি খামানি মাওয়ৗ বিছৗরৗ গৗথৈনি যোগ্য, অব্লাবৗ বিছৗরৗ বেবাদি রৗখৗমনি খামানিফৗরখৌ মাওবায় থায়ৗ আরৗ জাইফ্রা বেফৗরখৌ সর খৗলামৗ বিছৗরখৌ গনায়ৗ।

The Seed Company

https://app.library.bible/content/4e52604fbda8b59f