যোহন3

1ফরীশীফৗরনি গেজেরাও নীকদীম মুংনি সাছে মানসি দংমৗন, বিয়ৗ যিহূদিয়ারিফৗরনি সাছে ধৗরৗম শাসনগিরিফৗরনি সাছে সর্দস্য মৗন।2হরনি সমাও বিয়ৗ যীশুনিয়াও ফৈনানৈ বুংদৗং, “ও গুরু, জৗঙৗ মিথিগৌ, নৗঙৗ ঈশ্বৗরজৗং থৗনহৎজানায় সাছে ফৗরৗংগ্রা, মানৗনা ঈশ্বৗরা নৗংজৗং লৗগৗছে থায়ামৗনব্লা নৗং জেরৈ সৗমৗ গৗনাং চিহ্নফৗর মাওদৗং, বেবাদি রাওবৗ মাওনৗ হায়া।”3যীশুআ বুংফিনবায়, “নংথারগৌয়ৈ আঙৗ নৗংছৗরখৌ বুঙৗ, গৗদানৈ জৗনৗম জাফিননাগৌ মানি রাওবৗ ঈশ্বৗরনি রাইজৗখৌ নুনায় অৗঙা।”4নীকদীমা হৗনবায়, “মানসিআ বৗরাইনানৈ মাব্রৈ জৗনৗম জাফিননৗ হাগৌ? নংথারগৌয়ৈ রাওবৗ বিমানি বিসাখয়াও খেবনৈনি হাবনানৈ জৗনৗম জাফিননৗ হায়া!”5যীশুআ হৗনবায়, “নংথারগৌয়ৈ আঙৗ নৗংছৗরখৌ বুঙৗ, দৈ আরৗ জিউজৗং জৗনৗম জাফিননাব্লা রাওবৗ ঈশ্বৗরনি রাইজৗয়াও হাবনৗ হায়া।6মানসিনি মৗদৗমজৗং জৗনৗম হৗনায়া মানসিনি মৗদৗমানৗ, জিউজৗং জৗনৗম হৗনায়া জিউয়ানৗ।7‘নৗংছৗরৗ গৗদান জৗনৗম জাফিনথার নাংগৌ,’ হৗন্নানৈ বুংনায় আংনি বে খৗথাখৌ খৗনানানৈ নৗংছৗরৗ সৗমৗ দানাং।8বাররা জেরৈ গৗসৗ জায়ৗ অৗরৈনৗ বারলাঙৗ, নৗঙৗ বিনি সৗদৗবখৌ খৗনায়ৗ, নাথায় বিয়ৗ ববেনিফ্রায় ফৈয়ৗ, আরৗ ববেয়াও থাঙৗ, বেখৌ নৗঙৗ বুংনৗ হায়া। জিউজৗং জৗনৗম জানায় সাফ্রৗমবৗ বেবাদিনৗ জায়ৗ।”9নীকদীমা হৗনবায়, “বে মাব্রৈ জানৗ হাগৌ?”10যীশুআ বুংফিনবায়, “নৗং গাওনৗ ইস্রায়েলফৗরনি সাছে ফৗরৗংগ্রা জানানৈবৗ বেফৗরখৌ বুজিনৗ হায়াখৈ?11নংথারগৌয়ৈ আঙৗ নৗংছৗরখৌ বুঙৗ, জৗঙৗ জেখৌ মিথিয়ৗ বিখৌনৗ বুঙৗ আরৗ জেখৌ নুবায় বেখৌনৗ সাক্ষী হৗয়ৗ, নাথায় জৗংনি সাক্ষ্যখৌ নৗংছৗরৗ দাবৗনৗ নাজাওয়াখৈ।12আং নৗংছৗরনৗ সংসারনি খৗথা খৗথাবায় আরৗ নৗংছৗরৗ ফৗথাইয়া; অব্লা স্বৗর্গৗনি বিষয়ৈ আং বুঙৗব্লা নৗংছৗরৗ মাব্রৈ ফৗথাইনায়?13আরৗ জাইয়া স্বৗর্গৗনিফ্রায় অৗংখাৎবৗদৗং, বি মানসিনি বিসাহৌয়ানি অনগায়ৈ রাওবৗ স্বৗর্গৗয়াও থাঙাখৈ।14আরৗ মোশিআ জেরৈ বাদি মারু গৗরান ফৗথারাও জিবৌখৌ দিখাংদৗং মৗন, বেবাদিনৗ মানসিনি বিসাহৌয়ায়াবৗ দিখাংজাথারনাংনায়, 15জাহাথে বিখৌ ফৗথায়গ্রা সাফ্রৗমবৗ জৗবনৗগৈয়ি গৗঠাংখৌ মৗননায়।”16মানৗনা ঈশ্বৗরা সংসারখৌ এছেগ্রাব অনবায়, যে বিয়ৗ গাওনি সাছে বান বিসাজ্লাখৌ হৎবায়, বিখৌ ফৗথাইগ্রা সাফ্রৗমবৗ আদ্রি জানায় অৗঙা, নাথায় জৗবনৗগৈয়ি গৗঠাংখৌ মৗননায়।17মানৗনা ঈশ্বৗরা গাওনি বিসাজ্লাখৌ সংসারখৌ বিচার খৗলামনৗ থৗনহৎনাখৈ, নাথায় সংসারা জেন বিনি গেজেরজৗং বাছাইজায়ৗ।18জাইয়া ঈশ্বৗরনি বিসাজ্লাখৌ ফৗথাইনায়, বিখৌ ঈশ্বৗরা বিচার খৗলামনায় অৗঙা, নাথায় জাইফ্রা বিখৌ ফৗথাইয়া, বিছৗরৗ সিগাঙাওনৗ বিচার খৗলামজাখাবায়, মানৗনা বিছৗরৗ সাছে বান ঈশ্বৗরনি নামনি বিসাজ্লাখৌ ফৗথাইয়াখৈ।19আরৗ বিচারা বেনৗ, সংসারাও স্রাং ফৈবায়, আরৗ মানসিফ্রা স্রাংনিফ্রায় খৗমসিখৌ রাসিন মৗজাংমৗনৗ, মানৗনা বিছৗরনি খামানিফ্রা গাজ্রিমৗন।20সাফ্রৗমবৗ জাইয়া গাজ্রিখৌ মাওয়ৗ, বিয়ৗ স্রাংখৌ মুগৈয়ৗ, মানৗনা গাওনি গাজ্রি মাওনায়ফৗরখৌ গুবুনা নুনায় হৗন্নানৈ স্রাংয়াও ফৈয়া।21নাথায় নংগৌখৌ মানিগ্রায়া স্রাংনি খাঠিয়াও ফৈয়ৗ, জাহাথে গাও ঈশ্বৗরনি গৗসৗ বাদি মাওনায়খৌ নুজাহৗনৗ হায়ৗ।
22বেফৗরনি উনাও যীশু আরৗ বিনি ছেলাফ্রা যিহূদিনি হাদৎনাও থাংদৗং, আরৗ বিয়ৗ বিছৗরজৗং লৗগৗছে ইছে সম থাদৗং আরৗ মানসিফৗরখৌ বাপ্তিস্মা হৗদৗং।23আরৗ যোহনাবৗ শালীম হাদৎনি খাঠি এনোন হৗন্নায় মৗনছে জায়গাও বাপ্তিস্মা হৗদৗংমৗন, মানৗনা বি জায়গায়াও গৗবাং দৈ দংমৗন। আরৗ মানসিফ্রা ফৈনানৈ বিজৗং বাপ্তিস্মা হৗজাদৗংমৗন।24বি সমাওবৗ যোহননা জৗবথেসালিয়াও জৗবজায়াখোমৗন।25বি সমাও যোহননি ছেলাফ্রা ফৗথারজানায়নি বিষয় লানানৈ সাছে যিহূদিয়াজৗং তর্ক হৗজৗলাইদৗং।26আরৗ বিছৗরৗ যোহননেও থাংনানৈ হৗনহৈদৗং, “গুরু, জাই মানসিয়া যর্দ্দন দৈমা বাৎনৈ নৗংজৗং দংমৗন, জাইনি বিষয়ৈ নৗঙৗ সাক্ষী হৗদৗংমৗন, নাই, দা বি মানসিয়া বাপ্তিস্মা হৗদৗং আরৗ বয়বৗ মানসিফ্রা বিনেও থাংদৗং।”27বেখৌ যোহননা বুংফিনবায়, “স্বৗর্গৗনিফ্রায় হৗজায়াব্লা রাওবৗ মৗঙা মৗনছেবৗ মৗন্নৗ হায়া।28আংনি বে বুংনায় খৗথানি থাখৈ নৗংছৗর গাওছৗরনৗ সাক্ষী, ‘আঙৗ মসিহ অৗঙা নাথায় বিনি সিগাং আংখৌ থৗনহৎদৗং।’29হিন্জাও গৗদাননা হৌয়া গৗদাননি; জৗরৈ হৌয়া গৗদাননি লৗগৗয়া হৌয়া গৗদানখৌ নেয়ৗ, বিখৌ খৗনাছঙৗ, আরৗ রাওখৌ খৗনানানৈ রংজায়ৗ, বেবাদিনৗ দিনৈ আংহাবৗ বে রংজানায়া জাফুংবায়।30বিয়ৗ দেৎসিনলাং নাংগৌ, নাথায় আঙৗ দুইসিনলাং নাংগৌ।”31জাইয়া স্বৗর্গৗনিফ্রায় ফৈদৗং, বিয়ৗ বয়নিবৗ গৗজৌয়াও। জাইয়া সংসারনিফ্রায়, বিয়ৗ সংসারনি, আরৗ বিয়ৗ সংসারখৌনৗ বুঙৗ; নাথায় জাইয়া স্বৗর্গৗনিফ্রায় বিয়ৗ বয়নিবৗ গৗজৌয়াও।32বিয়ৗ গাও নুনায় আরৗ খৗনানায়খৌ সাক্ষী হৗয়ৗ, অব্লাবৗ বিনি সাক্ষী হৗনায়খৌ রাওবৗ নাজাওয়া।33নাথায় বিনি সাক্ষী হৗনায়খৌ জাইয়া নাজাওবায়, ঈশ্বৗরা যে নংথারগৌ বিখৌ ফৗরমান হৗয়ৗ।34মানৗনা জাইয়া ঈশ্বৗরজৗং থৗনহৎজাদৗং, বিয়ৗ ঈশ্বৗরনি খৗথাখৌ খৗথায়ৗ, মানৗনা ঈশ্বৗরা জিউখৌ বিনৗ ফুরায়ৈ হৗয়ৗ।35বিফাআ গাওনি বিসাজ্লাখৌ অন্নৗ আরৗ গাছেনখৌবৗ বিনি আখাইয়াও হৗবায়।36জাইয়ানৗ বিসাজ্লাখৌ ফৗথাইয়ৗ, বিয়ৗ জৗবনৗ গৈয়ি গৗঠাংখৌ মৗন্নৗ; জাইয়া বিসাজ্লাখৌ নাগারৗ, বিয়ৗ গৗঠাংখৌ মৗনথারনায় অৗঙা, নাথায় ঈশ্বৗরনি রাগয়া বিছৗরনি ছায়াও থানায়।

The Seed Company

https://app.library.bible/content/4e52604fbda8b59f