1Gↄrↄ suddo gbɛra Yesu Pita kũ Yamisio kũ a dakũna Yuhanao sɛ̀tɛ à gɛ̀ɛ kũńwo kpi leia ńtɛ̃nɛ.2Akũ à lì ń wára. A ãn tɛn tɛ́ kɛ lán ifãntɛ̃ bà, a pↄ́kasanↄ gↄ̃̀ pú táitai lán legũpinaa bà.3Akũ Musa kũ Iliasuo bò ò sùḿma, òtɛn yã o kũ Yesuo.4Akũ Pita pì Yesunɛ: Dikiri, à mana kũ ó kú la. Tó ń yei, mani kuta dↄ mɛ̀n aakↄ̃, n pↄ́ mɛ̀n do, Musa pↄ́ mɛ̀n do, Iliasu pↄ́ mɛ̀n do.5Gↄrↄ kũ àtɛn yã o, ludambɛ luku tɛ́kɛnaa dàńla, akũ ò kòtoo mà a gũn à pì: Àkũmɛ ma Nɛ́ mɛ̀n do légelege yenyĩde ũ, a yã dì kámagu. À a yã ma.6Kũ a ìbaa pìnↄ kòtoo pìi mà, vĩna ń kũ manamana, ò wùtɛ ń gbɛrɛa.7Akũ Yesu nàńyĩ, à ↄ nàḿma à pì: À futɛ, àsun vĩna kɛro.8Kũ ò wɛ́ sɛ̀ musu, odi gbɛ̃ke ero, sé Yesu ado.9Kũ òtɛn kipa kpi pìia, Yesu dìtɛńnɛ à pì: Àsun wɛ́gupu kũ a è yã o gbɛ̃ke maro ari Bisãsiri Nɛ́ vu bona gan.10Akũ a ìbanↄ a là ò pì: Bↄ́yãin ludayãdannɛrinↄ dì pi Iliasu mɛ́ ani su káakuu?11Akũ à wèḿma à pì: Iliasu ni su yãpuramɛ, ani yã sĩnda pínki kɛkɛ a gbɛ̀n.12Ama matɛn oárɛ, Iliasu sù kↄ̀, akũ odi a dↄ̃ro, akũ ò ń pↄyeinaa kɛ̀nɛ. Lɛn ò wɛ́ tã Bisãsiri Nɛ́a lɛ dↄ.13Akũ a ìbanↄ dↄ̃̀ kũ Yahaya Da'itɛkɛri à tɛ́a.
Yesu nɛ́gↄ̃gbɛ̃ tãnade werekↄ̃anaa
14Kũ ò kà pari gũn, gↄ̃gbɛ̃ ke sù à kùtɛ Yesunɛ15à pì: Dikiri, ǹ ma nɛ́ wɛ̃nda gwa, zaakũ gasindademɛ. Àdi wari kɛ manamana, àdigↄ̃ lɛ́tɛ tɛ́n ke ín baala'i.16Ma su kãao n ìbanↄnɛ, odi fↄ̃ ò a wèrekↄ̃aro.17Akũ Yesu pì: Gbãragbɛ̃ yakana ludanaanikɛrisarinↄ! Manigↄ̃ kú kãáo ari bↄrɛmɛɛ? Manigↄ̃ mɛna kãáo ari bↄrɛmɛɛ? À mↄmɛnɛ kũ nɛ́ pìio la.18Yesu gì tãnanɛ, akũ à gò nɛ́ pìia, à wèrekↄ̃a gwe gↄ̃̀nↄ.19Abire gbɛra Yesu ìbanↄ nài ńtɛ̃nɛ, ò a là ò pì: À kɛ̀ dera ódi fↄ̃ o pɛ́ tãna pìia à bòroo?20À wèḿma à pì: Kũ á Luda náani vĩ zↄ̃kↄ̃ro yãimɛ. Yãpuran matɛn oárɛ: Tó á Luda náani vĩ fíti lán ɛfↄ wɛ́ bà, áni o kpi díkĩnanɛ à go la à gɛ́ zãa, ani kɛ lɛ. Yãke ni á furo.21Tãna dí taka dì sí boro, sé kũ aduakɛnaao kũ lɛ́yĩnaao.
Yesu ɛra à a ga kũ a vunaao yã'onaa
22Gↄrↄ kũ à kú kũ a ìbanↄ lɛɛlɛ Galili, à pìńnɛ: Oni Bisãsiri Nɛ́ nańnɛ ń ↄĩ,23oni a dɛ, a gↄrↄ aakↄ̃de zĩ ani vu. Akũ ń pↄ yàka manamana.
Luda ↄn ↄgↄ fĩnabonaa
24Kũ ò kà Kapɛnamu, Luda ↄn ↄgↄsirinↄ sù ò Pita là ò pì: Á dannɛrii dì Luda ↄn ↄgↄ kpároo?25Pita wèḿma à pì: Àdi kpá. Kũ Pita tɛn gɛ̃ bɛ, Yesu gĩnakɛ à pìnɛ gↄ̃̀nↄ: Simↄ, dínↄn andunia dí kínanↄ dì bɛ'ↄgↄ ke ɛtɛ'ↄgↄ síḿmaa? Ń nɛ́nↄn yá ke gbɛ̃ pãndenↄmɛ? N yã pìi è deraa?26Pita pì: Gbɛ̃ pãndenↄmɛ. Yesu pìnɛ: Tó lɛmɛ, ń nɛ́nↄ bàka kunlo.27Ama de ó yã sún ũḿmaro yãi, ǹ gɛ́ ǹ daburu da sɛ̀bɛɛ gũn. Kpↄ̀ kũ ĩni kũ káaku, ǹ a lɛ́ wɛ̃, ĩni ↄgↄ le a gũn. Ǹ abirekũ sɛ́ ǹ kpáḿma, makũ kũ mↄkↄ̃nwo pↄ́ ũ.