Read MAAKU 10

MAAKU10bqp_sim

Yìgidɛna yã

¹Akũ Yesu bò gwe à gɛ̀ɛ Yudea bùsun ari Yoda bara. Pari ɛ̀ra ò kàkarai gwe, akũ à yã dàńnɛ lákũ àdi kɛ nà.²Farisi kenↄ sù ò a yↄ̃ ò gwa, akũ ò a là ò pì: Gↄ̃gbɛ̃ zɛ́ vĩ à yìgi dɛ yá?³À wèḿma à pì: Musa dàárɛ deraa?⁴Ò pì: Musa gↄ̃gbɛ̃ gbà zɛ́ à yìgidɛtakada kɛ̃ à a nanↄ gbarɛo.⁵Akũ Yesu pìńnɛ: Á sãgbãna yã mɛ́ à tò Musa doka birekũ dàárɛ.⁶Zaa káaku kũ Luda andunia kɛ̀, à gↄ̃gbɛ̃ kɛ̀ kũ nↄgbɛ̃omɛ.⁷Abire yãi gↄ̃gbɛ̃ ni a de kũ a dao tó, ò nakↄ̃a kũ a nanↄo,⁸ń gbɛ̃nↄn pla oni gↄ̃ mɛ̀ do ũ. Ò kun pla doro, sé do.⁹A yã mɛ́ à tò gbɛ̃ kũ Luda ń nakↄ̃anↄ, bisãsiri sún ń kɛ̃kↄ̃aro.¹⁰Kũ Yesu tà bɛ, a ìbanↄ a là yã pìi mìii.¹¹Akũ à pìńnɛ: Gbɛ̃ kũ à yìgii dɛ̀ kũ a nanↄo à nↄ pãnde sɛ̀, ade zina kɛ̀ a nↄ káakunɛ.¹²Nↄgbɛ̃ kũ à yìgii dɛ̀ kũ a zão à gↄ̃ pãnde sɛ̀ sↄ̃, à zina kɛ̀ɛn gwe.

Yesu arubarikadana nɛ́nↄn

¹³Òtɛn su Yesunɛ kũ nɛ́nↄ de à ↄ naḿma, akũ a ìbanↄ gìńnɛ.¹⁴Kũ Yesu è lɛ, à pↄ fɛ̃̀ à pìńnɛ: À tó nɛ́nↄ mↄ́ ma kĩnaa, àsun gíńnɛro, zaakũ kpata kũ à bò Luda kĩnaa mɛ́ à ń takanↄ pↄ́ ũ.¹⁵Yãpuran matɛn oárɛ, gbɛ̃ kũ adi kpata kũ à bò Luda kĩnaa sí lán nɛ́ fíti bàro ni gɛ̃nlo.¹⁶Akũ à nɛ́nↄ sɛ̀ à ń kpákpa a kùla, à ↄ nànaḿma à arubarikaa dàńgu.

Aruzɛkɛde

¹⁷Kũ Yesu dà zɛ́n àtɛn gɛ́, akũ gↄ̃gbɛ̃ ke bàa lɛ̀ à sù à kùtɛ a arɛ à a là à pì: Dannɛri mana, deran mani kɛ nà mà wɛ̃̀ndi kũ àdi lákaro lee?¹⁸Akũ Yesu pìnɛ: À kɛ̀ dera n pì má manaa? Gbɛ̃ke manaro, sé Luda ado.¹⁹Ń dokanↄ dↄ̃: Ǹsun gbɛ̃ dɛro, ǹsun zina kɛro, ǹsun kpãni oro, ǹsun yã di n gbɛ̃dakearo, ǹsun gbɛ̃ blero, ǹgↄ̃ bɛ̀ɛrɛ lí n de kũ n daoonɛ.²⁰Akũ à pì: Dannɛri, zaa ma nɛ́ fiti gↄrↄan má yã birenↄ kũna pínki.²¹Akũ Yesu a gwà kũ yenyĩ wɛ́o à pìnɛ: Yã mɛ̀n do mɛ́ à gↄ̃̀nnɛ. Ǹ gɛ́ ǹ pↄ́ kũ ń vĩnↄ yía pínki ǹ a ↄgↄ kpá takasidenↄa, ǹ mↄ́ ǹ tɛ́mai, ĩnigↄ̃ aruzɛkɛ vĩ ludambɛ.²²Akũ gↄ̃gbɛ̃ pì ãnn sìsi yã pì yãi, à tà kũ pↄsirao kũ à aruzɛkɛnↄ vĩ zↄ̃kↄ̃ yãi.²³Akũ Yesu a ìbanↄ gwàgwa à pìńnɛ: À zĩ'ũ manamana aruzɛkɛdenɛ à gɛ̃ kpata kũ à bò Luda kĩnaa gũn.²⁴A yã pìi bò a ìbanↄ sarɛ, akũ Yesu ɛ̀ra à pìńnɛ: Gbɛ̃nↄ, à zĩ'ũ gbɛ̃nɛ manamana à gɛ̃ kpata kũ à bò Luda kĩnaa gũn!²⁵Lakumi gɛ̃na pↄrↄwɛɛn araga de aruzɛkɛde gɛ̃na kpata kũ à bò Luda kĩnaa gũnla.²⁶Akũ yã pìi bò a ìbanↄ sarɛ manamana, ò pìkↄ̃nɛ: Dí mɛ́ ani fↄ̃ à surabana lee?²⁷Yesu ń gwá à pì: Bisãsiri ni fↄ̃ro, sé Luda. Luda kĩnaa bee pↄ́ sĩnda pínki dì sí kɛ.²⁸Akũ Pita pìnɛ: O bee pↄ́ sĩnda pínki tò o tɛnyĩ.²⁹Yesu pì: Yãpuran matɛn oárɛ, gbɛ̃ kũ à a bɛ tò ke a vĩ̀ninↄ ke a dakũnanↄ ke a da ke a de ke a nɛ́nↄ ke a bura ma yãi kũ ma baarukpannɛna yão,³⁰ade ni ɛra à bɛnↄ kũ vĩ̀ninↄ kũ dakũnanↄ kũ danↄ kũ nɛ́nↄ kũ buranↄ e lɛu basↄↄro andunia dí gũn, ama kũ wɛ́tãmmaomɛ, ani wɛ̃̀ndi kũ àdi lákaro le andunia kũ àtɛn su gũn.³¹Gbɛ̃ káakunↄ nigↄ̃ gbɛ̃ kpɛdenↄ ũ dasi, gbɛ̃ kpɛdenↄ nigↄ̃ gbɛ̃ káakunↄ ũ.

Yesu ɛra à a ga kũ a vunaao yã'onaa

³²Ò ɛ̀ra ò dà zɛ́n òtɛn gɛ́ Yurusalɛmu. Yesu do a ìbanↄnɛ arɛ, akũ yã pìi bò ń sarɛ, vĩna gbɛ̃ kũ ò tɛ́ a kpɛnↄ kũ̀. Akũ Yesu a gbɛ̃nↄn kuri awɛɛplanↄ sɛ̀tɛ ń dona, à ɛ̀ra à yã kũ oni kɛarɛ òńnɛ dↄ³³à pì: À ma! Ótɛn gɛ́ Yurusalɛmumɛ. Oni Bisãsiri Nɛ́ kpá sa'orikinↄ kũ ludayãdannɛrinↄa, oni yã daala à ga, oni a kpá kifirinↄa.³⁴Oni a lalandi kɛ oni lɛ́'i káa oni a gbɛ̃ kũ flã̀ao oni a dɛ, a gↄrↄ aakↄ̃de zĩ ani futɛ.

Yamisi kũ Yuhanao wɛ́kɛnaa

³⁵Akũ Zebedi nɛ́nↄ Yamisi kũ Yuhanao nà Yesui ò pìnɛ: Dannɛri, ó ye ǹ yã kũ ótɛn wɛ́ kɛmma kɛwɛrɛ.³⁶Akũ à ń lá à pì: Bↄ́n á ye mà kɛárɛɛ?³⁷Ò wèa ò pì: Ǹ tó ò vutɛ kũnwo n kpata gũn, gbɛ̃ do n ↄplai gbɛ̃ do ↄzɛi.³⁸Yesu pìńnɛ: Á yã kũ átɛni a wɛ́ kɛma dↄ̃ro. Toko'i kũ mani mi, áni fↄ̃ à mi yá? Wɛ́tãmma kũ mani gɛ̃n áni fↄ̃ à gɛ̃ a gũn yá?³⁹Ò wèa ò pì: Óni fↄ̃. Akũ Yesu pìńnɛ: Toko'i kũ mani mi áni mi, wɛ́tãmma kũ mani gɛ̃n áni gɛ̃n,⁴⁰ama vutɛna ma ↄplai ke ma ↄzɛi bi ma yãnlo. Gbɛ̃ kũ Luda kɛ̀kɛńnɛnↄ pↄ́mɛ.⁴¹Kũ a ìba gbɛ̃nↄn kuri kparanↄ yã pìi mà, ń pↄ fɛ̃̀ Yamisi kũ Yuhanaooi.⁴²Akũ Yesu ń kákara à pìńnɛ: Á dↄ̃ kũ gbɛ̃ kũ òtɛni ń gwa buri pãnde kínanↄ ũnↄ dì gbãna ble ń gbɛ̃nↄa, gbãnadenↄ sↄ̃ òdi iko mↄńnɛ,⁴³ama à de lɛ á kĩnaaro. Á tɛ́ gbɛ̃ kũ à ye à gↄ̃ gbɛ̃ zↄ̃kↄ̃ ũ, sé ade kɛ á zĩ̀ri ũ.⁴⁴Lɛmɛ dↄ gbɛ̃ kũ à ye à gↄ̃ gbɛ̃ káaku ũ, sé ade kɛ á sĩnda pínki zↄ̀ ũ.⁴⁵Zaakũ Bisãsiri Nɛ́ dí su de ò zĩ kɛnɛro, à sù de à zĩ kɛńnɛmɛ à a zĩda wɛ̃̀ndi kpá de à gbɛ̃nↄ bo dasi yãi.

Batimɛu wɛ́wɛ̃naa

⁴⁶Ò kà Yɛriko. Kũ Yesu tɛn bo gwe kũ a ìbanↄ kũ pario, vĩ̀na Timɛu nɛ́ Batimɛu vutɛna zɛ́ lɛ́a, àtɛn bara kɛ.⁴⁷Kũ à mà ò pì Yesu Nazɛra mɛ́ àtɛn gɛ̃tɛ, akũ à nà lɛ́ gbãna zunaa à pì: Yesu, Dauda Buri, ǹ ma wɛ̃nda gwa!⁴⁸Akũ pari tɛn gínɛ òtɛn pi à yĩtɛ. Akũ a lɛ́ gbãna zunaa kàra àtɛn pi: Dauda Buri, ǹ ma wɛ̃nda gwa.⁴⁹Yesu zɛ̀ à pì: À a sísi. Akũ ò vĩ̀naa pìi sìsi ò pìnɛ: Ǹ laakari kpátɛ ǹ futɛ. Àtɛni n sísi.⁵⁰Akũ vĩ̀naa pì a uta bò à vĩ̀ à fùtɛ à sù Yesu kĩnaa.⁵¹Akũ Yesu a là à pì: Bↄ́n ń ye mà kɛnnɛɛ? Vĩ̀naa pìi wèa à pì: Rabi, má ye ma wɛ́ gu emɛ.⁵²Akũ Yesu pìnɛ: Ǹ gɛ́, ma náani kũ n kɛ̀ mɛ́ à n werekↄ̃a. Zaa gwe gↄ̃̀nↄ a wɛ́ gu è, akũ à dà kãao zɛ́n.