Read Zelemii 9

Zelemii9bqc_sim

¹Tó má pilakĩi vĩ gbáau yãaɛ lé,má a gbɛ̃́ↄ to we mà gɛ́ weɛ,asa gbãsĩkɛnaↄnɛ ḿpii,náaisaideↄ gãliɛ.

²Aaì lɛ́sakã aa ɛgɛ zuò,aaliↄ gbãa ń bùsuu ń náaiyãoo.Aaìↄ vãikɛ wàↄ gɛɛ, aa ma dↄ̃o.Ma Dii mámɛ má ò.³Á baade laaika a gbɛ̃nai,ásu à a daɛ náaikɛo,asa daɛ píiá gbɛ̃sãsãnaɛ,gbɛ̃naↄ ì kↄ̃ peɛ.⁴Gbɛ̃na ń gbɛ̃nao aaì ↄ̃nↄkɛkↄ̃ɛ,aali sĩana'okↄ̃ɛo.An lɛ́ dↄ́ɛkɛ̀ ń ɛɛo,aaì tàaekɛkↄ̃ɛ e wà kpàsa.⁵Ń kú mↄafilideↄ guuɛ,mↄafilipi mɛ́ tò aa gì ma dↄ̃i.⁶A yã́i tò ma Dii Zĩgↄ̃de ma mɛ̀,má ń baasa mà gwaɛ.Bↄ́ má kɛ ma gbɛ̃́ↄnɛan vãipi yã́ musu lↄi?⁷An lɛ́naá kagbaɛ,mↄafili mɛ́ ìↄ dↄ ń lɛ́u.Na'onwaaↄnɛ,mɛ́ yaalↄma ba da ń bↄ̀ↄuↄnɛ.⁸Yã́ bee yã́i má ĩadamáo lé?Má tↄsi buipi taawao lé?Ma Dii mámɛ má ò.

⁹Má ↄ́ↄlↄ mà búbuapɛ sĩ̀sĩↄnɛ,má wɛ̃nalɛ si dã́dãkɛkĩiↄnɛ.À sɛ̃kù, gbɛ̃e lɛ́ a baa vĩ lↄo,wìli zù ↄↄlↄ ma we lↄo.Bãↄ ń nↄ̀bↄↄ gɛ̃̀zɛa píi.

¹⁰Má tó Yelusalɛũ gↄ̃ bɛzia ũɛ,gbɛ̃gbonaↄ tòo ũ.Mí Yuda bùsu wɛ̃́lɛↄ dɛ̃ↄnzↄ̃,gbɛ̃e aↄ ku we lↄo.

¹¹Dé ↄ̃nↄ mɛ́ kà yã́pi gbadↄ̃ai?Dé Dii yãdàɛ̀ aà a bↄↄlɛkɛi?Àkɛa bùsu gↄ̃̀ gii lán gbáawa,à gà, gbɛ̃e lɛ́ a baa vĩ lↄo ni?¹²Ma Dii ma mɛ̀,kɛ́ aa pãkpà ma ikoyã pↄ́ má dìlɛnɛ́i yã́iɛ,aai ma yã́pi mao, aai zĩkɛwào.¹³An swã́gbãa mɛ́ dↄ̀aanɛ́,ↄ̃ aa tɛ tã́aↄzi lá ń maeↄ dànɛ́wa.¹⁴A yã́i ma Dii Zĩgↄ̃de Isailiↄ Lua ma mɛ̀,má gↄ̃i kpámá aa soɛ,mí kona í kpámá aa mi.¹⁵Má ń fãaa buiↄ guuɛ,bui pↄ́ ampiↄ ń ń maeↄ dↄ̃ yãaoↄ.Mí tó wà pɛ́má ń fɛ̃ndaoe wà gɛ̀ ń mìdɛ.

¹⁶Ma Dii Zĩgↄ̃de ma mɛ̀:À yã́pi da,í gɛ nↄɛ gɛ'ↄↄlↄnaↄ sísi,í gbɛ̃́ↄ zĩ nↄɛ wɛ̃nalɛdↄ̃naↄwa aa mↄ́.¹⁷Aai mↄ búbuapɛɛ́,á wɛ́ i ibↄ e à kwɛ́.¹⁸Wà ↄↄlↄ mà dↄ Siↄna, wàlɛ mɛ,wa ↄ̃̀ↄkpàɛ fá, wí wá kṹ maamaaɛ.Wálɛ wá bùsu to we,asa wà wá uaↄ dúuzↄ̃̀ɛ.

¹⁹Nↄɛↄ, à Dii yãma sa,à swã́kpa yã́ pↄ́ lɛ́ bↄ aà lɛ́ui.À ↄↄlↄ dada á nɛnↄɛↄnɛ,í wɛ̃nalɛ dadakↄ̃ɛ.²⁰Asa gaga gɛ̃̀ wá fɛnɛntiↄuɛ,ↄ̃ à sì wá zɛgikĩiↄu.Gapi wá nɛ́ↄ dɛ̀dɛ zɛaↄ guu,à wá ɛ̀waasoↄ mìdɛ gãaɛ.

²¹Onɛ́ ma Dii ma mɛ̀:Gbɛ̃nazĩn gɛↄ gↄ̃ kpálɛ sɛ̃u lán pↄtuo gbↄ̃wa,lán ése pↄ́ wa kɛ̃̀ kálɛa gbɛ̃e i mↄ sɛ́lɛowa.

²²Ma Dii ma mɛ̀:Ɔ̃nↄna su ĩ́anadã a ↄ̃nↄyã musuo,gↄ̃gbãa su yↄ̃̀ↄkɛ a gↄ̃sakɛ yã́io,ↄde su azĩa sɛ lɛsĩ a ↄda yã́io.²³Tó gbɛ̃́ ye ĩ́anadã,aà dã kɛ́ a wɛ́ kɛ̃̀ a ma dↄ̃ yã́i.A dↄ̃ kɛ́ má gbɛ̃kɛ vĩ,mi yãmaakɛ dṹniau a zɛ́waɛ,asa yã́ beeↄ mɛ́ ì kamagu.Ma Dii mamɛ má ò.²⁴Ma Dii ma mɛ̀ a gↄↄ a mↄ́ kɛ́ má ĩada gbɛ̃́ pↄ́ aa tↄ̃zↄ̃̀ↄwa,²⁵Egipiↄ ń Yudaↄ ń Ɛdↄũↄ ń Amↄniↄ ń Mↄabuↄ ń gbɛ̃́ pↄ́ aa ku guwaiwaiu aaì ń kã̀kãmↄ kɛ̃ɛlɛↄ.Asa buipiↄ ń Isailiↄ píi, gyafↄↄdeↄnɛ ń sↄ̃u.

Zelemii 9 / bqc_sim

Zelemii9bqc_sim