Read Zelemii 50

Zelemii50bqc_sim

Babɛli dúuzↄ̃a

¹Yã́ pↄ́ Dii dà ãnabi Zelemiiɛ a ò Babɛli ń Babiloni bùsuo yã́ musun kɛ:²À baoɛ bee kpa buiↄnɛ,à dàlapoo da, í kpàwakɛ,ásu yãe ulɛnɛ́o,à mɛ wà Babɛli sì,an tã́a Bɛli gɛɛ gↄ̃̀ kpa a wɛ́i,an tã́a Mɛlodaki gↄ̃̀ zɛ yɛ̀ɛɛ.An pↄ́ pↄ́ aa pì dii ũↄ gↄ̃̀ ń wío,vĩa ń tã́apiↄ kũ̀ píi.³Gugbãntoo oi bui mɛ́ lɛ̀lɛwà,aa a bùsu kɛ̀ yáiyai.Gbɛ̃e ku we lↄo,baa nↄ̀bↄↄ se, aa bàalɛ̀ bↄ̀lɛuɛ.

⁴Ma Dii ma mɛ̀zĩbeezĩ Isailiↄ ń Yudaↄ su sãnu,aa ma Dii ń Lua kĩ́i wɛɛlɛ ń ↄↄlↄo.⁵Aa Siↄna zɛ́ gbɛa, aai mipɛwà,aai naa, ma bàa iↄ kúńnↄ gↄↄpii,a yã́ a sã́ńguo.

⁶Ma gbɛ̃́ↄ dɛ lán sã sã́sãaↄwaɛ,an dↄaanaↄ mɛ́ tò aa lìaaliaa,ↄ̃ aa pↄ̀ↄbↄzãkɛ̀mɛɛ gbɛ̀sĩsĩↄ musu.Aa gɛ̀ gbɛ̀sĩsĩ musu le,aa sù sĩ̀sĩ musu la,e aa gɛ̀ zã̀ ń kúkĩiwa.⁷Gbɛ̃́ pↄ́ bↄ̀máↄ ń mↄmↄ.An ibɛɛpiↄ mɛ̀ wa tàae vĩo,asa aa duunakɛ̀ Diiɛɛ.Dii mɛ́ ń kaa sĩandepↄ́ an deziↄ wɛ́ dↄi ũ.

⁸À bↄlɛ Babɛli,à Babiloni bùsu to we.Àↄ dɛ lán blesanapↄ́ dↄaaa kpàsa pↄ́ↄnɛↄwaɛ.⁹Asa má bui zↄ̃ↄↄ kãaa gugbãntoo oi bùsuu,mí ń sóikɛ aa gɛ lɛ́lɛ Babɛliwaɛ.Bↄa we aa gɛ́ zĩ'ↄpooi, aai sí.An kaↄ dɛ lán nɛgↄ̃n ↄnade pↄ́ aali su asioↄwa.¹⁰Aa Babiloni bùsu pↄ́ↄ naaa,pↄsɛlɛnapiↄ i kã́.Ma Dii mámɛ má ò.

¹¹Á gbɛ̃́ pↄ́ i ma gbɛ̃́ↄ pↄ́ↄ naaaↄ,lá álɛ tidↄńla, álɛ pↄnakɛ ń ń pↄ́ↄ,lá álɛ vĩvĩ lán zununu pↄ́ lɛ́ pↄ́wɛnagbɛ̃wa,lá álɛ wiilɛ lán sↄ̃saↄwa,¹²wí a á da kũ maamaaɛ,nↄɛ pↄ́ á í gɛɛ a gↄ̃ kpa a wɛ́i.Aà buiↄ i gↄ̃ kpɛɛ buiↄ guu,aà bùsu i gↄ̃ gbáa gii wáiwai ũ.¹³Gbɛ̃e aↄ ku weo ma pↄfɛ̃ yã́i,a gↄ̃ da yàaa píiɛ.Yã́pi a di gbɛ̃́ pↄ́ lɛ́ dↄ Babɛliziↄwa píi,aaiↄ lɛsuikɛwà ĩa pↄ́ wa dàwà yã́i.

¹⁴Kàzunaↄ à zĩ'ↄpoo Babɛlizi,ásu á kaↄ wɛgwao, à ↄzↄ̃i,asa à duunakɛ̀ Diiɛɛ.¹⁵À kúkua dↄwà gupiiu!À mikpàmá sa,a bĩ́iↄ kwɛ̀, a gĩↄ gbòo.Lá Dii mɛ́ lɛ́ tↄsiwà,à tↄsiwà,à kɛɛ̀ lá à kɛ̀nɛ́wa.¹⁶À pↄtↄ̃naↄ míↄnzↄ̃ Babɛli ń pↄkɛkɛnaↄ.Baade bↄlɛ tá a gbɛ̃́ↄ kĩ́i,gbɛ̃́pii bàalɛ ta a bùsuu,gbãamↄnɛdeↄ ń ń fɛ̃ndao yã́i.¹⁷Isailiↄ dɛ lán sã pↄ́ fãaaaↄwa,nↄ̀ↄmusuↄ mɛ́ sìńgu.Asiliↄ kía mɛ́ ń mↄmↄ káau,ↄ̃ Babɛli kí Nɛbukanɛza ń kɛ́ kɛ́lɛkɛlɛ gbɛzã.

¹⁸Ayãmɛto ma Dii Zĩgↄ̃de Isailiↄ Lua ma mɛ̀,má Babɛli kía ń a bùsudeↄ wɛtãlá ma Asiliↄ kía wɛtã̀waɛ,¹⁹mí su ń Isailiↄ ń dã́dãkɛkĩi.Aa pↄble Kaamɛli ń Basanao,aai kã Ɛflaiũ ń Galada sĩ̀sĩↄ musu.²⁰Ma Dii ma mɛ̀,gↄↄ bee wa sãa wɛɛlɛ Isailiↄwa, wa eo,wa kpálɛkɛ Yudaↄ duunai, wa bↄwào,asa má gbɛ̃́ pↄ́ ma ń bↄ́piↄ duuna kɛ̃́máɛ.

²¹À lɛ́lɛ Mɛlataiũ bùsuwa,í Pekodiↄ dɛdɛ à ń míↄnzↄ̃.Ma Dii mámɛ má ò.À yã́ pↄ́ má dìlɛɛ́ kɛ píi.²²Zĩkakↄ̃fĩ ma dↄ bùsupiu,a wíwia zↄ̃ↄ.²³Masana pↄ́ dṹnia wìwi píi yãa gwa wíwia sa sↄ̃e!Babɛlipi gↄ̃̀ sↄ̃kɛ̃ngu pↄ́ ũ bui píiɛ.²⁴Dii baikpànɛ Babɛli,ń a yã́ dↄ̃o, ↄ̃ à n kũ.Wà zãmakɛ̀nɛ wà ↄdìɛma,asa n sòlekɛ̀ ń Diioɛ.²⁵Dii Lua Zĩgↄ̃de a làasi zɛ́ wɛ̃̀,à bↄ̀ ń a pↄfɛ̃ gↄ̃kɛbↄↄ,asa a zĩ vĩ Babiloni bùsuu à gɛ́ kɛiɛ.²⁶À bↄlɛ gupiiu à mↄ lɛ́lɛwà,í a dↄ̃ↄ wɛ̃wɛ̃,í a pↄ́ↄ kãaa zùuuzuuu,í a míↄnzↄ̃, a kee su gↄ̃o.²⁷À ń swanaↄ dɛdɛ,à ń kòlokpakpa!Waiyoo ampiↄ,asa an wɛtãgↄↄ mɛ́ kà.²⁸À gbɛ̃́ pↄ́ bàalɛ̀ bↄ̀ Babiloni bùsuu,aa sù Siↄnaↄ yãma, aalɛ mɛ,Dii ń Lua tↄsìmá a kpɛ́ yã́ musu.

²⁹À kàzunaↄ kãaa Babɛlizi,sadepiↄ i bòokpa wà liai.A gbɛ̃e su bↄo.À fĩaboɛ̀ aà yãkɛawa,à kɛɛ̀ lá a kɛ̀nɛ́wa píi,asa à kuabìiaɛ,à bã̀nkũ̀ ma Isailiↄ Lua pↄ́ ma kua adoawaɛ.³⁰A yã́i tò a ɛ̀waasoↄ kwɛ a zɛaↄu,a zĩgↄ̃ↄ gaga zĩbeezĩ ḿpiiɛ.Ma Dii mámɛ má ò.³¹Ma, ma íbɛlɛsɛ̀nnↄ kàamaide.Ma Dii Lua Zĩgↄ̃de mámɛ má ò,asa gↄↄ pↄ́ má dìlɛ mà n wɛtãwà mɛ́ kà.³²Kàamaide a gɛ̃mbↄlɛ à lɛ́lɛ.Gbɛ̃e ku à ↄkaaàzio.Má tɛsↄ̃ aà zↄ̃ɛwiaↄwaɛ,pↄ́ pↄ́ liaiↄ i tɛ́kũ píi.

³³Ma Dii Zĩgↄ̃de ma mɛ̀,wà gbãamↄ̀ Isailiↄnɛ ń Yudaↄ píi.Gbɛ̃́ pↄ́ tàńnↄ zĩ̀zↄↄ ũↄ ń kũa,aa gì ń gbaɛi.³⁴Ãma an Bona gbãa vĩ,aà tↄ́n Dii Zĩgↄ̃de.A zɛńnↄ, i to an bùsu ĩ́ampa,i gili gɛ̃ Babɛlideↄgu.

³⁵Wa lɛ́lɛ Babiloniↄwa ń fɛ̃ndaoɛ.Ma Dii mámɛ má ò.Wa lɛ́lɛ Babɛlideↄwań a dↄaanaↄ ń a ↄ̃nↄnaↄ.³⁶Wa lɛ́lɛ ãnabi ɛgɛnaↄwa,wi ń dↄ̃ sↄũↄ ũ.Wa lɛ́lɛ nɛgↄ̃naↄwa,an nisĩna i na líwa.³⁷Wa lɛ́lɛ ń sↄ̃́ↄ ń ń zĩkasↄ̃goↄwań bui pↄ́ lɛ́ zɛńnↄↄ,aai gↄ̃ lán nↄɛↄwa.Wa lɛ́lɛ ń làasiↄwa,wí ń pↄ́ↄ naaa.³⁸Wa lɛ́lɛ ń swaↄwa, a í i ba,asa tã́aↄ di ń bùsuuɛ.Pↄvãipiↄ mɛ́ tò aa gↄ̃̀ mìsai.

³⁹Gbɛ̃gbonaↄ ń maiↄ mɛ́ aaↄ kálɛa we,koohũhũnaↄ iↄ zↄ̃zↄ̃u.Aↄ da bɛzia ũ gↄↄpiiɛ,gbɛ̃e aↄ ku we bau lↄo.⁴⁰Lá Lua Sↄdↄũ ń Gↄmↄↄo suumpàń wɛ̃́lɛ pↄ́ kú ń saɛↄ,màa gbɛ̃e aↄ ku Babɛli lↄo, baa do.Ma Dii mámɛ má ò.

⁴¹Gwa! Zĩgↄ̃ↄ bↄ̀ gugbãntoo oi,bui zↄ̃ↄ ń ń kíaↄ fɛ̀lɛ dasidasiza dṹnia lɛ́wa, aalɛ mↄ́.⁴²Aa sáↄ ń sↄ̃naↄ kṹkũa,aa pãsĩ, sósobisaideↄnɛ.Aa di sↄ̃́ↄ kpɛ,an kĩ́a dↄ lán ísia kↄ̃fĩwa,aalɛ mↄ́ zĩ'ↄpooińzi, Babɛli.⁴³Kɛ́ Babɛli kía ń bao mà,a dↄ̃ kɛ́ yã́ gìwaɛ, ↄ̃ à gↄ̃̀ dↄ̀lↄlↄ,wãwã aà kũ̀ lán nɛ'iwãwãwa.⁴⁴Lá nↄ̀ↄmusu ì bↄ Yuudɛ̃ dàouà gɛ́ bualoũ àizɛɛdeu,màa má Babɛlideↄ yamà ń bↄlɛ ń bùsuu gↄ̃̀ↄ,mí gbɛ̃́ pↄ́ má sɛ̀ dilɛ we.Démɛ muaamanↄi?Démɛ a fↄ̃ ma la a yã́ii?Dↄaana kpele mɛ́ a fↄ̃ zɛ gimɛɛi?⁴⁵Ayãmɛto à yã́ pↄ́ Dii zɛ̀òà kɛ Babɛlideↄnɛ mań yã́ pↄ́ a dìlɛ Babiloniↄ musuo.Nↄ̀ↄmusupi a ń nɛ́ↄ naaa taò lán sãↄwaɛ,i ń bualoũpi dɛ̃ↄnzↄ̃ ń yã́i.⁴⁶Babɛlideↄ kṹkũa kↄ̃fĩ a tↄↄlɛ lualua,bui píi a ń wii maɛ.

Zelemii 50 / bqc_sim

Babɛli dúuzↄ̃a

Zelemii50bqc_sim