Read Luka 1

Luka1

¹Mkuu Teofilo.
Kwaviya, wantu wangi wekaa na kuandika mbui ziya zekulawiiyazo umu mwetu.²Waandika inga tekugombekwavyo na wada wekuonao mbui izo kwa meso yao kuvokea aho bosi mwe ndima ya Yesu. Awo nee wekubiikiyao mbui ya Yesu.³Ivyo mkuu Teofilo, tekubindaho kusunguumanya mbui inu kwa akii kuvokea aho bosi, khiona ni vitana na miye nikuandikie mbui izi kwa vitana,⁴nawe udahe kumanya ukwei wa mbui zose wekuhinywazo.

Kuvyaigwa kwa Yohana Mbatiiza kwa ambizwa

⁵Kisingi Helode ekuwaho seuta wa si ya Yudea nekuwa na mviki yumwe zina dakwe Zakalia, wa kizumwezumwe cha uviki cha Abiya. Mkaziwe nee aketangwa Elizabeti, nae nekawa wakolwa da mviki Haluna.⁶Wose waidi wekaa inga viya wekukundigwavyo ni Muungu, wekaa kwa kutongea miko na miagiiyo yose ya Zumbe kwesaho waa.⁷Khawokuwa na wana kwaviya Elizabeti nee khana uvyazi, na wose waidi nee ni wadaa.

⁸Msi umwe, Zakalia yekuwaho zamu yakwe ya kugosoa ndima ya uviki mwe Nyumba ya Muungu,⁹kulawana na mazweeya ya waviki, Zakalia akasagulwa kwa kutoewa kula kwengiya mwe Nyumba ya Zumbe kufukiza ubani. Ivyo Zakalia akengia mwe Nyumba ya Muungu.¹⁰Zumwezumwe kuu da wantu nee wakintana chongoi wakavika kisingi icho cha kufukiza ubani.

¹¹Mndima wa uko uwanga kwa Muungu wa Zumbe akamwawiiya uko gati, akagooka phande ya kuume wa ingo da kufukizia ubani.¹²Zakalia ekumuonaho yuda mndima wa uko uwanga kwa Muungu, akavituka na akaogoha muno.¹³Iya mndima wa uko uwanga kwa Muungu akamwamba, Zakalia, “Usekuogoha Kwaviya Muungu kautegeeza uviki wako, na mkazio Elizabeti endaakuvyaiye mwana kigosi, nawe wendaumwetange zina dakwe Yohana.¹⁴Nawe wendauwe na kinyemi kikuu na wantu wose wendawawe na kinyemi kwaajii ya kuvyaigwa kwakwe.¹⁵Endaawe mkuu hemeso ya Zumbe. Khanaadomee divai wala phombe, naho endaamemeezwe Muye wa Muungu kuvokea mwe ifu da mami yakwe.¹⁶Endaawavuze wantu wangi wa Isilaeli kwa Zumbe Muungu yao.¹⁷Endaamwongwee Zumbe, naho endaawe na udaho na muye inga viya Eliya. Endaawaike hamwe vituhu tate na wana wao, endaawagoswee wesaokuzumiiya wawe na umanyi wa wantu wedi, na kumwiikia Zumbe wantu wendaowawe tayali kumhokea.”

¹⁸Zakalia akamwamba yuda mndima wa uko uwanga kwa Muungu, “Nendanimanye viivihi mbui inu ati niya kwei? Kwaviya miye ni mdaa, naho mkazangu nae ni mdaa.”

¹⁹Mndima wa uko uwanga kwa Muungu akamtambaisa, “Miye ni Gablieli, mndima wa Muungu na khiagiiwa nitamwiiye nawe nikwambe mbui yedi.²⁰Kwaviya khwekuzumiiya mbui zangu zendazozilawiiye kwa kisingi chakwe. Ivyo khaunaudahe kutamwiiya adi ayo nekugombekayo yendahoyaiganie.”

²¹Kisingi kiya, wada wantu wekuwao wakamhafiiza Zakalia uku wahondomaa kwa kucheewa kulawa kwakwe mwe Nyumba ya Muungu.²²Ekulawaho chongoi khekudaha kutamwiiya kwaajii nekawa akatamwiiya nao kwa utangio. Wantu wakamanya kinagaubaga kuna ekuonado mwe Nyumba ya Muungu. Kwaviya nee atamwiiya nao kwa mikono.

²³Zamu yakwe ya kugosoa ndima yakwe yekusiaho, akauya kaya kwakwe.²⁴Kisingi kwemboka, Elizabeti akenua ifu, nae khekulawa kaya kwakwe kwa kisingi cha miongo mishano.²⁵Akagombeka, “Zumbe ivi nee ekunigosweeavyo kisingi iki, kanikauwa na kuniusia soni yangu ya kwesekuvyaa nekuwayo nayo hemeso ya wantu.”

Kuvyaigwa kwa Yesu kwaambizwa

²⁶Yekubuwaho muongo wa mtandatu, mndima wa uko uwanga kwa Muungu etangwaye Gablieli nekaagiiwa ni Muungu aite kwe mzi zina dakwe Nazaleti uko si ya Galilaya,²⁷kwa mndee yumwe mwenye kiwaa etangwae Malia, mwekuwaye kaombwa na mntu yumwe zina dakwe Yusufu wa kolwa da Daudi.²⁸Mndima wa uko uwanga kwa Muungu akamlawiiya Malia akamuugusa, “Ewe mwekujaiwaye wedi na Muungu, Zumbe yu hamwe nawe.”

²⁹Malia ekusikiaho mbui izo neawa na maatu, akamamakhanya mbui izi zina mana yani?³⁰Mndima wa uko uwanga kwa Muungu akamwamba Malia, “Usekuogoha kwaviya Muungu kakujaiya wedi wakwe,³¹Wendawenue ifu, naho wendauvyae mwana kigosi, na zina dakwe wendaumwetange Yesu.³²Uyo endaatende mkuu naho endaetangwe Mwana wa Muungu ekuwaye uko uwanga wa vyose. Zumbe Muungu endaamwekhe kigoda cha useuta cha Daudi tati yake.³³Endaawe seuta wa kolwa da Yakobo kwa misi yose kwesiho kisiikizi, naho useuta wakwe khaunauwe na kisiikizi.”

³⁴Malia akamtambaisa yuda mndima wa uko uwanga kwa Muungu, “Yadahika viivihi, mbui iyo mana miye nina kiwaa?”

³⁵Mndima wa uko uwanga kwa Muungu akamtambaisa, “Muye wa Muungu wendaukwezee, na udaho wa Muungu ekuwaye mkuu wa vintu vyose wendaukugubike inga kizui. Kwaajii iyo mwana endaeavyaigwe endaawe Mng'azi naye endaetangwe Mwana wa Muungu.³⁶Naho umanye Elizabeti nduguyo nae kenua ifu etiho ni mdaa, na isasa ni muongo mtandatu kwakwe, yee ambae wantu wammanya kuwa khadaha kuvyaa,³⁷kwaviya khahana mbui yesayokudahika kwa Muungu.”

³⁸Naho Malia akagombeka, “Miye ni mndima wa Zumbe, igosoke mbui inga wekugombekavyo.” Yuda mndima wa uko uwanga kwa Muungu akaita.

Malia amvuiya Elizabeti

³⁹Mwe kisingi kiya Malia akafunga ntambo kuita kwa kinyionyio mwe mzi umwe weuko mwe miima ya Yudea.⁴⁰Aho akengia mwe nyumba ya Zakalia akamuugusa Elizabeti.⁴¹Ahoaho Elizabeti ekusikiaho uugusi wa Malia mwana mwekuwa mwe ifu dakwe Elizabeti akehituahitua. Naho udaho wa Muye wa Muungu ukamwezea Elizabeti.⁴²Naho akagombeka kwa mgutio mkuu, “Wee kujaiwa kusima wavyee wose, na mwana wendayeumvyae kajaiwa.⁴³Miye nndai hata mmaa wa Zumbe yangu abue hangu?⁴⁴Nakwamba, vuupu nekutegeezaho uugusi wako mwana mwe ifu dangu akawa nanyemi na kwehituahitua.⁴⁵Kujaiwa wee mwekuzumiiya kuwa yendayawe kwei yada Zumbe ekugombekayo.”

Wiya wa ntogoo wa Malia

⁴⁶Malia akamba.“Muye wangu wamtogoa Zumbe,⁴⁷Muye wangu unanyemi kwaajii ya Muungu Mwohozi yangu,⁴⁸Kwaajii kanikumbuka, miye mndima wakwe mdodo!Ivyo kuvokea isasa wantu wose, wendawanetange mwenye kujaiwa,⁴⁹Kwaviya Muungu mwenye udaho, kanigosoeya mbui khuu.Zina dakwe ni ng'azi.⁵⁰Mbazi zakwe kwa wantu wamvikiao,Kwekaa kwa vyekuvyaigwavyo na vyekuvyaigwavyo,⁵¹Kagosoa mbui khuu kwa mkono wakwe,Kawasambaatisha wenao vibui umamakhanyi ya mioyo yao.⁵²Akawaseeza maseuta wakuu kulawa he vigoda vyao vya useuta,Kawenua wekuwao wadodo.⁵³Wenaosaa endaaweguse vintu vitana,Na wenye vintu vingi endaawause mikono yebue.⁵⁴Kamwambiza Isilaeli, mndima yakwe,Akakumbuka kuwafiiya mbazi.⁵⁵Inga ekuwaikiavyo kiaga baba zetu, IbulahimuNa vyekuvyaigwavyo vyakwe misi yose kwesiho kisiikizi!”

⁵⁶Malia akekaa na nduguye Elizabeti kwa kisingi kibuacho miongo mitatu, naho akauya kaya kwakwe.

Kuvyaigwa kwa Yohana Mbatiiza

⁵⁷Kisingi cha kwefungua kwakwe Elizabeti kikabua, akefungua mwana kigosi.⁵⁸Wantu wa hehi yakwe na wanduguze wekumanyaho mbui inu ati Zumbe kamfiiya mbazi muno, wakawa na kinyemi hamwe naye.

⁵⁹Mwana ekubuwaho msi wanane wakeza kumgwisa. Wakakunda kumwetanga Zakalia zina da tati yakwe.⁶⁰Akini mami yakwe akamba, “Khivyo! Zina dakwe endaetangwe Yohana.”

⁶¹Wakamwamba, “Khahana yoyose mwe kolwa dako mwe zina inga ido?”⁶²Naho wakamwamba kwa ntangio ya mikono tati yakwe, wamanye mwana endaekigwe zina dani.

⁶³Zakalia akaombeza kibao cha kuandikiya, akaandika ivi, “Zina dakwe ni Yohana.” Wose wakahondomaa!⁶⁴Ahoaho Zakalia akadaha kutamwiiya vituhu, naho akavoka kumtogoa Muungu.⁶⁵Wantu wahehi yakwe wose wakaogoha muno, na mbui iyo ikaambazika kiya hantu mwe miima ya si ya Yudea.⁶⁶Na wose wekusikiaho mbui iyo, wakamamakhanya mwe mioyo yao na kweuza, “Mwana uyu endaawe mntu yevii vihi?” Kwaajii udaho wa Zumbe neuwa hamwe naye.

Uwoni wa Zakalia

⁶⁷Zakalia tati yakwe da Yohana, akezewa na udaho wa Muye wa Muungu, naye akatamwiiya uwoni unu.⁶⁸“Atogolwe Zumbe Muungu wa Isilaeli!Kwaajii kawezea na kuwaohowa wantu wakwe.⁶⁹Katekha mwohozi mwenye udaho,Uvyaigwa wa Daudi mndima wakwe.⁷⁰Katiikia kiaga aho kae, kwa sia ya waoni wang'azi,⁷¹Kamba endaatiohowe kulawa kwa wamasa wetu.Na kulawa kwa wada wose wesaokutikunda.⁷²Akagombeka endaawaonee mbazi wadaa wetuNa kukumbuka diyagane dakwe ng'azi.⁷³Kiaga ekumwekhacho Ibulahimu baba yetu.⁷⁴Tioholwe mwe mikono ya wamasa wetu,Tidahe kumgosoeya ndima kwesaho kuogoha.⁷⁵Ili tiwe wazumizi kwa Muungu, na kuwa wantu wategeezao miagiiyo yakwe.Misi yose ya ugima wetu.⁷⁶Nawe mwanangu, wendawetangwe Muoni wa Muungu ekuwaye uko uwanga wa vintu vyose,Wendaumuongwee Zumbe ukamuikieVitana sia yakwe.⁷⁷Wendauwabiikie wantu kuwa wendawaoholweKwa kuekewa mavigaviga yao.⁷⁸Ukundiso wa Muungu na mbazi zakwe zating'azia inga zua diawiado kulawa uwanga.⁷⁹Kwetu swie he kiza na kizui cha ufe, na ung'azi unu wendautumwikie na kutuongweeya mwe sia ya uivanisa.”

⁸⁰Yuda mwana neakuwa kimo na udaho wa muye. Akekaa he kiwawe adi ekweaviizavyo kwa wantu wa Isilaeli.