Titus3
Kirisa Ɔnɛ
1A kpari a shɔbiiyi sisɨn i ãyuutɔ a yupɛ̃niyi a kpatiyini, i gɨyi nyatɔ, i mabiitɔ aru vitɔ̃vɨng pɛlinɛ kopinyaba shɔpiya.2A geliyitɔ ikɔyi nwanya kɔ̃linɛ nɛ a shɔwɔ yuuni, ama i ɔ̃ ɔ̃nɛbiinyatɔ̃nɛ a shɔ gãsiyini, i ɔ̃ sɔ̃n shɔ wesa sãnɛ a kopiyani, a kopiɗaviya i tasi kopiya ɔ̃nɛ yuuroorinɛ.3Aruviya si tɛ̃ɛ̃tɛ̃ɛ̃ u si pɛ rãng-yi, u gɨn Ɗalapa nya ɓa, shɔ ɗakiurɛ, u ɔ̃ ɔ̃nɛ fooyi a sisɨn pɔ̃nɛ a vi kasinɛ. Au ɔ̃nɛ u ɔ̃ ɔ̃nɛ gɨnkanɛ a zɔ bɛ̃ɛ̃nɛ a sisɨn; shɔ bɛ̃ɛ̃urɛ, ukɔma u bɛ̃ɛ̃yi rɛjo.4Ama aɗagbete shɔ tasi Ɗa tɔ̃vɨn shonɛ a ɔrinɛ Ɗalapa u raanɛyɛ,5Ɗalapa raaurɛ. Si ɓa ruu vitɔ̃vɨng gbete u pɛli au yuuyɛ ɓa, ama aru gbete ntau raayɛ a raaurɛ nyaba gbete sɔɔu a Ɗa suru, shɔu ãu yeenɛ sɔɔ a suru sɔɔni.6Ɗalapa ãu Ɗa suru weze ɗɔkɔkɔ au yuu a nyaba Yesɔ kirisi u shɔraanɛ,7pɛli nankɔ aru u kpa Ɗa tɔ̃vɨn shonɛ nɔgbete u kpa ɔ̃nɛ tɔ̃vɨn a Ɗalapa ɗɔbii, u ɔ̃ shɔgbeteyi kpa suru gbete yisinyaɓayɛ au pɔ̃ sisɨn aɗɔnyɛ.8Ruum nyamasinɛ ɓa pɛ nizɛ.N kasirɛ a ã kaka tɔ a ruumni fɛ̃ɛm, nɔgbete shɔgbeteyi ãsisɨn a Ɗalapa biyɛni, i yɔriyuu kn i pɛli vitɔ̃vɨng, vimiyi pɛ tɔ̃vɨn, i vishonɛ a kopiya ɗɔbiini.9Ama a yaa nya kɔ̃linɛ nwalinɛtɔ, a mɛuruuyi nii dãnɛ ni, a shɔ yuu vɔsinɛ, a bawaanɛ ayuu Musa nyaãsinɛ. I ɓa vishonɛ tɔ̃ ɓa, i sɔ̃n vikɔ̃linɛ.10Gɔ̃ shɔgbeteyi vɔsi shɔ yuuyɛ yushotɔ a geliunɛ u yaatɔ ko ɓa ziti, kɛɗɔn a yaaurɛ.11A zɛtɛ zɔng shɔ ɗɔmiyi lɛsi tɛttɔ, i ruuvini tasi tɛttɔ nɛi ɓa tɔ̃vɨn ɓa.
Nyakonɛ Dangdang
12N kɛ sho Artima ko Taikiku nɛ aa ɗɔbii, a pɛli nɔgbete a pɛliyɛ a ang ɗɔbii a Nikafoli, aruviya n kasi goosi pɛlinɛ aɗɔwakɔ.13A pɛli nɔgbete a pɛliyɛ a pɔ̃si Zena lauyam naa a Apolo i sã nyaba yɛnɛtɔ, a zɛ pɛtɔ vigbeteyi kasiyɛ aɗɔn kpai.14Ɔ̃tɛ kaka jazɨng a kɔrɔɔ u shɔbiiyi i mati nɔgbeteyi pɛli vitɔ̃vɨng-yɛ ai ɔ̃nɛni, nɔgbteyi ã vitɔ̃vɨng a shɔ kasiyɛ, ikɔyi ɔ̃nɛ ɔ̃nɛ vishonɛ ɓa.15Shɔ gbeteyi a nkɔni i gee a nyatɛ kpai. A gee u shɔbiiyi nyatɔ. Ɗa shonɛ tɔ̃vɨn u ɔ̃ a ɔkɔɔni kpai.The Word for the World International