Filibuyi2

Kirisa Yuuroorinɛ a Kirisi Yuuyorinɛ

1Ɔ Suru a Kirisi bi ukɔ masɔɔbiirɛ, u ɔrinɛkɔ roorɔɔ sisɨnrɛ. Ɔ yuɓasinɛtɔ a Ɗa Suruni ya? Ɔ ɔ̃nɛ tasinɛ tɔ̃vɨn a raatanɛni aɗɔni ya?2Aru nankɔ n gakɔɔtɔ ɔ pɔ̃nrɛ n kpaa sisɨn purutɔ fɛ̃ɛm u lɛrinɛ u ɔ̃ gbete, u ɔrinɛ u ɔ̃ gbete, u ɔ̃ gbete a suru, u sisɨn u ɔ̃ gbete.3Ɔkɔɔ pɛli viwɔɔnɛ aru ɔ yuu kasinɛ, ko aru yuu bassinɛ, ama ɔ roorɔɔ yuutɔ a zɔ biini, kopiɗaviya ɔ tuu shɔwɔyi naa i tɛwɔ tɛttɔ.4Ɔkɔɔ kɔnɛ ɔ yuukɔ sheeli ama ɔ wesho jo zɔ gãsiyi ɓɛɛni.5Ɔ ruubii u ɔ̃ jo naa Kirisi Yesɔ ɓɛɛyɛ:6Kopiɗaviya Yesɔ kirisi u ɓɛɛjo Ɗalapa kɔ,ama ji pɔ̃ ɓa sisɨn ni ɓa ko a kaka nɛn zali a Ɗalapa niɓa.7A nɔgbete si pɛli vim, au kasinɛ a ã vigbete u a wuniyɛ kpai,a risiu yuu naa jawɛrɛrisiu yuu naa shɔzɛa shɛ a shɔzɛ jasuru.8Roori yuu a gɨn Ɗalapa nyarɛ au n-tiurɛ shɔ nyo vɔrɔaka naɓaanɛ a laa.9Aruumkɔ Ɗalapa basiu fɛ̃ɛm tɛɛ vi piti kpai.a ãu nii gbete au tɛɛ nii gãsiyitɔ piti kpai.10Aru Yesɔ nii bassinɛvi piti a lapa a kotipini, a koo gbete a tɔ̃ɔ̃ tipi dii,i yɛ ta a yugboti a Yesɔ ɗekɨn11i piti kpai i yɛ nwa Yesɔ Kirisi ruubiitɔ nɛu pɛ Uɓeyelapa,aru shɔu bassi Ɗalapa u Ɓeye.

Ɔ Kolinɛ Naa Ɗɔsẽsẽ a koo

12Aru nankɔ n shɔbiiyi gbete n ɔrinɛyɛ, ji naa ɔ gɨn n nya a lee-lee yɛ a ɗagbete n si a ɔkɔɔniyɛ, yɛ kɔritɔ ɔ ɔrin bajo dɔdɔrimkɔ a ɗagbete n ɓa a ɔkɔɔni ɓam. Ɔ yɛ ɗekɨn a vishonɛ pɛlinɛ atette Ɗalapa setintanɛ a bizaanɛni nɔgbete ɔ yɛ yisi vishonɛ gbete yɛ ãwɔ raanɛyɛ,13aruviya kopiɗaviya Ɗalapa u ɗɔvishonɛ awɔ yuuni u pɔ̃wɔrɛ awɔ kasinɛ ɔ gɨu vigbete kasiyɛ.
14A vigbete ɔ pɛli kpai ɔkɔɔ nwalinya wɔɔnɛ ko ɔkɔɔ masinyanɛ,15nɔgbete ɔ yɛ ɔ̃ shɔ gbete i ruuvini ɓa tɛpɛ-tɛpɛ wasak naa Ɗalapa jaayi, shɔgbeteyi ɔ̃ a koo gbete shɔ kuli shɔ nɔɔ a shɔ ruuviyini. Ɔ̃rɔɔtɛ kaka jazɨng akɔrɔ ɔ koli ai tete naa sɛ koli a nyasiyɛ,16naa ɔkɛ geli shɔ ruu gbete ã suruyɛnɛ. Ɔkɛ shanɛ, sin kpaa vigbete n baasi awɔ yuutɛ a leegbete Kirisi yɛ ayɛni, aruviya yɛ tasitɔ nɛ n bimanɛ ang vishonɛni kpai ji yɛ ɓa weze ɓa.
17Ama ko shɔu tẽeng kpaa naa vi-ãnɛ gbete ɔ sisɨn ã Ɗalapa viyuu ãnɛyɛ. Kɛ ɔ̃nɛ nankɔ, si n nta sisɨn purutɛ, n yɛn nta sisɨn purutɔ a kooni kpai.18Ji nankɔ, ɔ̃rɔɔtɛ kaka jazɨng akɔrɔ ɔ nta sisɨn purutɔ, ɔ tasi sisɨn puru ntanɛtɔ a nkɔni.

Timoti a Abaporiditu

19Kɛ ɔ̃nɛ Uɓeyelapa Yesɔ kasinɛ, yɛ ɔ̃ ɓa ɗɔkɔkɔ ɓa n pɔ̃ sisɨn n yɛn zɛnɔɔtɔ n sho Timotirɛ awɔ ɗɔbiini, nɔgbete n yɛn kpaa bi lakinɛ ayuu ruu gbete n nta awɔ yuuni.20Ji ukɔ sheeli nta ruu ang nya a shɔgbete au yɔriyuu awɔ yuuniyɛ.21Ko-piya yɔriyuu jo au ɓɛɛ vishonɛkɔ sheeli, ama ɓa ayuu vigbete sã Yesɔ Kirisi ruubiiyɛ ɓa.22Ama ɔ awɔ yuu ɔ zɛ nɔgbete Timoti tasiu vishonɛyɛ tɛttɔ, nɔgbete u a nkɔni, naa javɔshɔ a ɓeye, u pɛli vishonɛ tɛttɔ a ɗɔɔzɔ ayuu ruu tɔ̃vɨn ni.23Yɛ ɔ̃ ɓa ɗɔkɔkɔni ɓa nkɛ nta vigbete yɛ kpaan yɛnɛ n pɔ̃tɛ sisɨn n-tɛ n yɛn shoutɔ awɔ ɗɔbii.
24N ã sisɨntɛ au Uɓeyelapa biini, yɛ ɔ̃ ɓa dɔkɔkɔ ɓa n yɛn awɔ ɗɔbiitɔ.
25N zɛ ang sisɨn n-tɛ pɛ tɔ̃vɨn n shoshi ɔ mazɔ̃ Abaporiditu, shɔgbete au pɛli vishonɛ au waaba naa jashonɛ a nkɔni aru u shi ayuu ruu tɔ̃vɨn au pɔ̃sing naa.26Zassibiitɛ fɛ̃ɛm aru kasɔɔ zɛnɛ kpai, yɔriyuutɛ fɛ̃ɛm aru ɔ nta nɛu vɔrɔyɛ.27Nizɛ usi vɔrɔ nakɛ vɔnɛ, ama Ɗalapa ntau raatɔ, si ɓa au yuukɔ sheeli ɓa ama a nkɔni, si ɓa ɗɔkɔ ɓa n yɛti lɛsinɛ si ɔ̃ bang.28Ukɔ sɨnrɛ n kasirɛ fɛ̃ɛm n shourɛ toti awɔ ɗɔbii nɔgbete ɔ nta sisɨn puru naa ɔkɛ zɛunɛyɛ, n yɛti lɛsinɛ yɛ yisinyakɛtɔ.29Ɔ tɛu nakaziti a sisɨn puru, naa shɔ sisɨn ãnɛ a Uɓeyelapa bi. Shɔ naa shɔmiyi ɔ tasiyi basinɛtɔ kpai naa ukɔ,30aruviya mɛliu suru tɛttɔ naakɛ vɔnɛ maani aru Kirisi vishonɛ, aru u pɔ̃sinnaa ayuu vigbete ɔ awɔ yuu ɔ ji zɛnɔɔ pɛlinɛ ɓayɛ.

The Word for the World International

https://app.library.bible/content/6fec21b499f7e625