Marku3
Shɔgbete u Naa Vɔ Kagbete
1Kɛɗɔn Yesɔ sɔɔ Yahudawayi ɗɔ ɔ̃nɛrɛ, a ɗɔukɔ shɔwɔɔ siɗɔn u naa vɔ kagbete.2Shɔwɔyi si a ɗɔukɔ i kã nyaba nɛi sã Yesɔ a ruuvini, i kɨnnɔɔ nɛi zɛpɛ yɛ gati shɔutɔ a lee susunɛ niya.3Yesɔ geli shɔgbete u naa vɔ kagbeteu nɛ, <<Anɛ a ɗekɨn yɛm.>>4Kɛɗɔn Yesɔ hɨnɛ, << U nyaãsinɛ a lee susunɛ geliu nɛ iviya? U pɔ̃si shɔ naa ya ko ɔ gẽ shɔ nɔ̃rɔ̃? Ɔ raa shɔ ya ko ɔ nyo shɔ?>>I jo nwanya wɔɔ ɓa.5Yesɔ sisɨn lɛsirɛ aɗagbete kɨnnɔɔ ai biiyɛ, ama ntayiraa sɔ̃ntɔ, aru i ji rooriyuu ɓa ɗɔgbete ni ɓa i sisɨn gbɔrki. Kɛɗɔn a geli jaunɛ, <<Gɨn naa pɛ.>>Jau gɨnrɛ, tɛ̃ɛ̃ti gatirɛ.6Naa Farasiyayi i ya Yahudawayi ɗɔ ɔ̃nɛutɛ i toli zɔɔ a Hirudu shɔ biini, i kã nyaba nɔgbete i nyo Yesɔ vɔrɔ yɛ.Moo i gɨn Yesɔ
7Yesɔ au jadɔyini i yɛ nya ɓooti wapo Galili, moo i gɨnyi adɔɔ piti a Yahudiyayi ni.8Naa i nta vigbete Yesɔ pɛlitɛ kpai, shɔ Urudung a Urushalimayi a Idumiyayi a shɔ Taya wɔsɔ̃n shɔ Sɔdomyi kpai i a Yesɔ ɗɔbii aru i zɛ vigbete pɛliyɛ pɛ.9Aru moo i si bang Yesɔ geliu jadɔyi nɛ, ɔ kãrin jaa latosi mii pɛ, aru moo i yɛ dɔ̃nrɛ.10Aru si gati shɔ tɛ bang, vim pɔ̃rɛ shɔ vɔrɔyi kpaabii aru i kasinɛ i ɗiunaa bi.11Kopiɗaviya shɔgbete i suru kɔ̃linɛ a biini naa ikɛ zɛ Yesɔ nɛ, i nwesi tipi au ɗekɨn i sɨn-nyavɔ nɛ, <<Mokaa pɛ Ɗalapa jaa.>>12Ama Yesɔ ãsi suru kɔ̃linɛyi nyanɛ ɔkɔɔ geli shɔwɔnɛ ko nkɔng piya.Yesɔ Lɔ Jashonɛ kopi Atu Ziti
13Yesɔ gẽ kɔpɔ a ɓaa shɔgbete au kasiyɛ nya, i au ɗɔbiirɛ.14Yesɔ lɔ kopi atu ziti. Ɓayi niinɛ jashonɛ, <<N lɔwɔtɛ ɔ ɔ̃ a nkɔni,>> I yɛn sholɔɔtɔ ɔ nwari shɔ Ɗanyaruubii,15ɔ kaka suru kɔ̃linɛ shɛshinɛ yɛ ɔ̃ ɗɔn.16Shɔgbete Yesɔ lɔ kopi atu ziti i nii nɛ: Siman(Yesɔ ãu nii nɛ Bituru);17Yakubu Zebedi ɓɛɛ jaa ɓezɔ̃ nii nɛ Yɔhana (Yesɔ ãi nii nɛ Bowanajis, ukɔ ɔ̃rɛ shɔ jalɛyi);18Wɔɔ Anduru, Filibu, Batalomi, Matiyu, Tomasi, Yakubu Alifayus ɓɛɛ jaa, Tadiyos, Siman shɔgbete ɔriu wɛrɛ koo waanɛ yɛ,19A Yahuda Isikariyoti, shɔu mɛli Yesɔ yɛ.Yesɔ a Bezabu
20Kɛɗɔn Yesɔ yɛ wɛrɛ rɛ, toti mooyi gɨu a dɔɔni au jadɔyini i ji kpaa karaa vishanɛ ɓa.21Naa Yesɔ ɓɛɛ shɔzɛyi ntatɛ nankɔ, i shɛ ɓili i kãu ɗɔrɛ, aru gbete shɔ shanɛ,<<Rii rãntɛǃ>>22Shɔmala nyaãsinɛ Musa gbeteyi a Urushalima yɛ i shanɛ,<<U rãma vɨri biini! Pɛ kpati rãman ãu kaka rãman shɛshinɛ rɛ.>>23A Yesɔ ɓainya nwarinya atette ruɓusinɛ shanɛ: <<Japɛ̃pɛ̃ɛ̃ shɛshi kpati japɛ̃pɛ̃ɛ̃ pikoviya?>>24Naa kou kɛ vɔsiu yuunɛ a kɨ̃nkɨ̃n u waaba a ɓɛzɔɔni, kou yɛ shiɓa.25Wɛrɛ gbete kɛ vɔsiu yuunɛ a kɨ̃nkɨ̃n u waaba a ɓɛzɔɔni, wɛrɛu yɛ shiɓa.26Japɛ̃pɛ̃ɛ̃ lakpati kɛ vɔsinɛ kɨ̃nkɨ̃n u waaɓa ai nɔɔ, u kpati roonɛu yɛ shiɓa, si yisinyatɛ.27<<Shɔwɔɔ yɛ to shɔ kaka wɔɔ wɛrɛ ɓa nɛn seu viɓa setɛ mau tɛtɔ; Kɛɗɔn yɛ seu vi kɛkn.>>28N gelɔɔtɛ nizɛ, shɔ ruuvini a shɔgbete i lɛsi Ɗalapa nii yɛ piti kpai, Ɗalapa yɛ yasiyi ruuvinitɔ.29Ama shɔu kɛ sha ruukɔ̃linɛ nɛ a Ɗa suru yuu, shɔ yɛ yasiu ruuvini ɓa; aru pɛli ruuvini au sɔ̃nya ɓayɛ.30Yesɔ Sha ruum aru shɔ gãsiyi shalinɛ,<<Nɛu suru kɔ̃linɛ abiini.>>31Kɛɗɔn Yesɔ ɓini a ɓezɔ̃yini i au ɗɔbii i shi ɓili, i shonyarɛ nɛ shɔ ɓaa Yesɔ nya.32Mooyi gbete i ɔ̃li au ɗɔbii, i geliu nɛ, <<Kɨnnɔɔ pɛ, ɓini, mɛzɔ̃yini a mɛnani i ɓili i kasa zɛnɛ.>>33Yesɔ kasinyanɛ<<Mani piya? Mazɔ̃yi piya?>>34Kɛɗɔn kɨnnɔɔ a shɔ gbeteyi au ɗɔbii a shanɛ, <<kɨnɔɔ pɛǃ Nkɔ mani a mazɔ̃yini yɛm!35Shɔgbeteu kɛ pɛli vigbete Ɗalapa kasiyɛnɛ ukɔ ɔ̃rɛ mazɔ̃, mana, a mani ni.>>The Word for the World International