Yɔhana2

Yumusinɛ Aru So Tɛnɛ A Kana Tipi Galili

1Akɨnti lee ziti shɔ pɛli yumusinɛ so tɛnɛ a koomo a Kana tipi Galili. Yesɔ ɓini u si ji a ɗɔukɔ,2shɔ wa Yesɔ nya ji au jaadɔyini a ɗɔɔ yumusinɛ so tɛnɛuni.3Naa i mii inabi yisi nyatɛ,Yesɔ ɓini Mariyamu geliunɛ,<<U mii inabi toti ɓa.>>4Yesɔ risinyanɛ,<<Mɔkɔ gelin vigbete n yɛn pɛliyɛ kɛrɛya, n ɗaa ji pɛli pɛ̃nɛ̃ɓa.>>5Yesɔ ɓini geli Yesɔ jaawɛrɛyi nɛ, <<Vigbete kɛ gelɔɔnɛ piti kpai ɔ pɛli-ɓɛjitɔ.>>6Yahudawayi i nya-ãsinɛ aɗɔn gbete i gɨnyɛ aru visɔkinɛ, arumkɔ i ɓɛsɛ aɗɔn gbete shɔ maa a tari a ɗɔuni mangbete, ko-pi shɔpiya tuu mɛnɛ lita laa maani.7Yesɔ geliu jaawɛrɛyi nɛ,<<Ɔ yiki kparimiyinɛ a mii.>>I yikirɛ lot-lot,8kɛɗɔn geliyinɛ,<<Dɔdɔrim ɔ onɛ ɔ n ti yupɛ̃ni yumusinɛ so tɛnɛrɛ.>>I n-tiu miiurɛ,9Kɛɗɔn miiu rikɛ mii inabi, jagbete tɛ sou nta miiurɛ au rii mii inabiu, ji zɛ ɗɔgbete mii shɛ aɗɔn ɓa, (Ama jaawɛrɛyi gbete i n ti miiu i zɛ ɓɛtɛttɔ); kɛɗɔn ɓaa jagbete tɛ sou nyarɛ,10a geliunɛ,<<Kopiya si shɔ ãu pɛji mii inabi tɔ̃vɨn kɔ ɗekɨn, naa shɔ yumusiyi so tɛnɛ i kɛ ɓoonɛ a yukarara, kɛɗɔn u n ti gbeteu kaka ɓa ɓamɓa kɛkn. Ama a ɓusi mii anabi tɔ̃vɨn see dɔdɔrim!>>11Yesɔ gaa vibii-zaanɛm pɛlinɛ a kana a tipi Galili; tasiu bassinɛ a ɗɔukɔ, u jadɔɔyi i ã sisɨntɔ au biini.12Kɛu kɨnti ni, Yesɔ a ɓini, ɓɛzɔ̃yi au jadɔɔyini i yɛkɛ Kapanahum i ɔ̃ a ɗɔukɔ dii mɛnɛ dɔɔ ziti.

Yesɔ Koo Wɛrɛ Ɗa

13Naa shɔ Yahudawayi ɗagbete i sha vishaanɛ aru yumusinɛ tɛnɛda atɛ maani, Yesɔ yɛkɛ Urushalima.14A jaa Ɗa gakinɛ kpaa shɔ a ɗɔɔ napu, mɛrɛ̃ɛ̃ a koroni mɛlinɛ, a shɔ saa kɔsinɛyi i ɔ̃tɛ a tɛburuyi.15Kɛɗɔn zaa rii kpataa a yikiyi awuni a shɛshi vivaayi ɓili, mɛrɛ a napu ni a jaa Ɗa; sãti shɔ saa kɔsinɛyi i teburuyi a saani a tipi kpai;16A ãsi shɔ koroyi mɛlinɛyi i nya nɛ, <<Ɔ shɛshi koroyi kati a ɗɔnni! Ɔkɔ risi mayɛ wɛrɛnɛ lumo!>>17U jadɔɔyi i kpaa sisɨn rɛ a yuu vigbete laabeenɛ shayɛ nɛ,<<N kaagɨntɛ aru wɛrɛ gbete shɔ gakaa aɗɔnyɛ bang.>>18Shɔ Yahudawayi i risi Yesɔ nya i hɨnɛ, <<A yɛ tasiu kɛpi vibiizaanɛ gbete piya gbete yɛ tasuunɛ a kaka vim pɛlinɛ aɗɔn viya?>>19Yesɔ kasiyinyanɛ, <<Ɔ zɨnlinɛ wɛrɛ Ɗannɛ, n yɛn maa sɔ̃n a lee taati.>>20Kɛɗɔn i hɨunɛ<<wɛrɛ Ɗam tuu saa laa ziti atu maangbete shɔ ɗɔɔ maanɛ! A tɔnɛn maa sɔ̃n a lee taati ya?>>21Ama wɛrɛ Ɗa gbete Yesɔ nwanya ayuu ukɔ ɔ̃rɛ u bi.22Arumkɔ akɨnti gbete Yesɔ yulapa a sàà, u jadɔɔyi i kpaa sɨsɨn tɔnɛ sha vimtɛ, i ã sisɨntɔ a Ɗa nya ruubiini, a vigbete Yesɔ shayɛni.

Yesɔ Zɛ Shɔ Sisɨn Tɛttɔ

23Aɗagbete Yesɔ u si a Urushalima yɛ aru yumusinɛ tɛnɛda, shɔzɛ waanɛ i ã sisɨn tɔ au biini aɗagbete i zɛ vibii zaanɛ au pɛliyɛ.24Ama Yesɔ sisɨn jo rooɓa ai biini ɓa, aru zɛi sisɨn tɛttɔ kpai.25Ji kasiɓa nɛ shɔwɔu u gelin ruu wɔɔ a shɔzɛ yuuni ɓa, aru gbete u au yuu zɛ vigbete ai sɨsɨn tɛttɔ.

The Word for the World International

https://app.library.bible/content/6fec21b499f7e625