????3
1Mazɔ̃yi a manayi ɔkɔɔ ɔ̃ shɔmalanɛ bang. Nagbete ɔ zɛtɛttɔ nɛ shɔmalayi shɔ yeeriyi ruu a nɔɔ pɔ̃sinɛni au tɛɛ shɔgãsiyi ɓɛɛtɔyɛ.2Ù nijo a vipɛlinɛni piti kpai. Ama naa shɔ gbete au nii ɓɛjo au nya shanɛni ɓa, si ikɔ zɛnɔɔ ruu shanɛ ɓɛjo au kɔuyuu dɔɔtɔyɛ.3U hãsi gbengteng saanya aru u gɨu nya, uyɛ zɛunɔɔ pɔ̃nɛtɔ u n-tiu ɗɔgbete u kasiyɛ.4Ko u kpaa sisɨn pɛ latosi: au banɛni piti kpai soro dɔ̃u a kaka shɔzaau a jaa laa saka, u yɛ ɗɔgbete shɔzaanɛu kasiyɛ.5Ji nankɔ a rɛɛtini: u pẽtẽrẽ ãgugu ayuu vi pẽniba. Ɔ kɨnnɔɔ sɔ̃n pɛ a jaa laa, shɔkɛ ɓaa yaanɛ ji jaa sɔ̃sɔ̃nɔ yaa yɛ tɛti jaa laaurɛ!6Rɛɛtiu ji naa yaakɔ. Upɛ koo nyazɔ̃, au bi piti kpai u ɗɔɔ nyazɔ̃ tɛ̃ɛ̃nɛ a ɗɔnni. Jo rɛɛtikɔ sholiu sisɨn u ãlirɛ, shɔ dɔɔ rɛɛti au yuu a wɛrɛ yaa.7Jashɔzɛ zɛnɔɔ vivaayi yuu zaanɛ dɔɔtɔ piti kpai- vi ɓiliyi a jaanoyi, vi gɔ̃nɛ a buruyi a jazɨng ni.8Ama shɔwɔ ji zɛunɔɔ rɛɛti yuu gɔ̃nɛ dɔɔɓa. Upɛ vikɔ̃linɛ gbete nta shɔnya ɓa, u zɔ̃ɔpɔ̃ shɔ nyɔnɛ ɗɔn.9U dɔ̃ri Uɓeyelapa jo a ukɔɔ a Ɓeyeni u wiri shɔ gãsiyi jo a ukɔɔ, shɔgbete Ɗalapa shɛshiyi jo au shẽbiiyɛ.10U nwa ruu Ɗalapa dɔ̃rinɛjo a ukɔɔ nya gbetenkɔ shɔ wiri shɔ sɔ̃njo a ukɔɔ. Mazɔ̃yi a manayi ukɔɔ pɛlinɛ namkɔ!
Yushɔ Gɔ̃nɛ Au Ɓɛzɔwɔ Kirisa I Yuu
11Tomii gbetenkɔ yɛ ã mii shɔ̃tinɛ kati au gãgãni ya?12Mazɔ̃yi laa sĩti yɛ rɛɛjaa laarɛti katiya ko laarɛti yɛ rɛɛjaa laa sĩti katiya? Ji nankɔ a tomii gbete u mii shɔ̃tinyatɔ yɛ shɛshi mii ntayẽ dɔɔ ɓa.13Shɔwɔ kati awɔ tetteni au kpẽnɛ ɗɔn a vizɛnɛniya? I tasi shɔpɛ ai tete ɔ̃nɛ tɔ̃vɨn a vishonɛni gbete au shɛ ɓa ayuu roorinɛ a sẽrẽni.14Ama aa sisɨn ɓuzɨn gɨn kaanɛ ɗɔn, a lanɛni, a yuukasinɛni, si a jo maasi nyaɓa aru tɔ̃vɨn ni ɓaya?15Sẽrẽ naa shɔm ji a ɓa lapa ɓa; ɓɛɛ koo tipi ɓɛɛ, ɓɛɛ ɓa suru ɓa, ɓɛ japɛ̃pɛ̃ɛ̃yi ɓɛɛ.16A Ɗɔgbete gɨn kaanɛ kɛ ɔ̃nɛ a ɗɔn a yuukasinɛni, shɔ kpaa yuu vɔsinɛ ji ɗɔwakɔ a vikɔ̃linɛni piti kpai.17Ama sẽrẽ gbete au shɛ a lapayɛ pɛ ukɔ ɗekɨn wasak; ukɔ n ti ɔ̃nɛbiinyatɔ̃nɛ rɛ, upɛ shɔ wesaa sãnɛ waanɛ, a shɔu ɔri shɔ waanɛ; nta shɔ raatɔ fɛ̃ɛ̃m, ukɔɔ n ti vitɔ̃vɨng pɛlinɛrɛ; u ɓa shɔgbete au kanɔɔ ɓa a shɔni ɓa, pɛlivi a sisɨn gbete.18Jo nɔɔ zɔvi tɔ̃vɨnkɔ sheshi jaa tɔ̃vɨn jo a shɔ sisɨn puru i ɓaa a sisɨn puruyɛ.The Word for the World International