Hiburuyi8
Yesɔ Ukɔ Ɔ̃rɛ U shɔnyanwaanɛ Pẽnɛɓa
1Ruum dɔɔtanɛ ayuu vimiyi piti kpai ukɔ ɔ̃rɛ nɛ, shɔnyanwaanɛ pɛ̃niɓa gbete u a ɗɔ ɔ̃nɛ aka nakɨn aɗɔ Ɗa kpati roonɛ a kolapa.2Shɔnyanwaanɛ pɛ̃nɛɓam u ɗɔ vishonɛ pẽnɛɓa aɗɔ wɔsɔ-wɔsɔ, ɗɔwakɔ ɔ̃rɛ tali nizɛ gbete Uɓeyelapa tɔ̃riyɛ, ɓa jashɔzɛ tɔ̃rirɛ ɓa.3Ko pi shɔnyanwaanɛ pẽnɛba gbetepiya shɔ lɔurɛ nɛu n-tiu viyuu ãnɛ a vivaa yuu ãnɛ a Ɗalapa ɗɔbii, kɛdɔn ɔ̃tɛ kaka jazɨng a koro kopi shɔnyanwaanɛ gbetepiya u n ti viwɔtɔ aru viyuu ãnɛ.4Si kɛ ɔ̃nɛ u a kotipi si ji ɔ̃ shɔnyanwaanɛ ɓa ko fɛ̃ɛ̃, aru si tɛ̃tɛ̃ɛ shɔnyanwaanɛ i a ɗɔn gbete i ãi viyuu ãnɛ a nyaba Musa ãsinɛ matiyiyɛ.5I vishonɛ ɓɛɛ jo nagbete shɔlansiyi nizɛ sheeli gbete i zɛyi vipɛlinɛ ai tasiyi vigbete a kolapayɛ ji zɔ gbete a Musa ɓɛɛni. aɗagbete Musa ɓanɛ tɔ̃ri tali ɓuzɨnɛ, Ɗalapa ãsiu nya geliunɛ, << pɛli vi jo kpai nɔgbete shɔ tasaa kɔpɔ pɛ̃niɓayɛ.>>6Ama dɔdɔrim, shɔ ã Yesɔ vishonɛ nyanwaanɛtɛ gbete teeyi ɓɛɛtɛ, ji naa ruumanɛ gbete Ɗalapa ma a ɓɛshɔzɛyi gbete tɔ̃vɨnyɛ, aru ruwu shi pɛ ayuu ruumanɛ vitɔ̃vɨng.7Si ɔ̃nɛ a gaanɛ nɛ ruumanɛu kɔ̃linɛ ɓa ɗɔnɓa, shɔsijo sho viɓa au shɔ pɛsinɛni ɓa.8Ama Ɗalapa zɛ ɓɛshɔzɛ vikɔ̃linɛ a shanɛ,<<Uɓeyelapa shanɛ lee kanɛ,gbete n yɛ ma ruu sɔɔ a mashɔbii Israilayi a shɔ Yahuda yini yɛ.9Yɛ ɔ̃ ɓa naa ruumanɛ gbete n maa a ɓɛwuruyi ni ɓa.alee n tuyi ang naa a shɛshirɛ a tipi masarani.i ji ã sisɨn ɓa a ruumanɛ gbete n ma ayini ɓa,n kɔma n yɛn wesho ɓa ai nyavɔ gbete i sɨriyɛ niɓa.10Dɔdɔrim shompɛ ruumanɛ gbete nyɛ ma a shɔ Israilayi ni yɛUɓeyelapa shanɛ leegbete i kanɛ ɗekɨn yɛːN yɛ pɔ̃ n nyaãsinɛ ai sisɨnn bee ai sisɨnn yɛn ɔ̃yi Ɗalapaiyɛ ɔ̃ mashɔzɛyi.11Shɔgbete wɔ kasi ɓa nɛ mati zɔ virɛ ɓako geli shɔnyakãsiri ruurɛ ɓaruu Ɗalapa zɛnɛ ɓaaru i piti kpai iyɛ zɛnɛtɔyuunɛ pẽtɛ̃rɛ yɛnɛ pɛ̃nɛɓa12N yɛn yasiyi ruuvinitɔn yɛn kpa toɓa ai yuu ruuvini ɓa.>> m13Aru nyanwaanɛ ayuu ruumanɛ sɔɔ, risi gbaali kɛ ɔ̃kɛ sɔɔ, yɛ ɔ̃ ɓa dɔkɔkɔ ɓa yɛ sɔ̃nyatɔ.The Word for the World International