Hiburuyi10

1Musa nyaãsinɛ nwanya ɓɛɛjo aru vitɔ̃vɨng gbete i kanɛ ɗekɨn yɛkɔ sheeli ama i ɓa tɛpɛ-tɛpɛ ɓa. Jo Viyuu ãnɛ gbetenkɔ i ãrɛ leelee dangdang saa ayuu saa. Kɛɗɔn viyuu ãnɛm yɛ sɨn shɔgbete i kanɛ a Ɗalapa ɗɔbii i ɔ̃ kɛpikovi tɛpɛ-tɛpɛ viya?2Kɛ ɔ̃nɛ shɔgbete i bassi Ɗalapa nizɛ shɔ sɔkitɛ ai ɓuzɨn ruuvini ni i yɛ yɔriyuu tokɨn ɓa i yi ruuvini toti ɓa.3Nagbete ɔ̃tɛmi viyuu ãnɛ gbete shɔ ã ko pi saa shopiya ɓɛɛ ji aru sisɨn kpaanɛ ayuu ruuvini shɔ pɛliyɛ.4Aru kpaa napu a kpaa jaa gbete shɔ ã viyuu ãnɛ wuniyɛ yɛ zɛnɔɔ shɔ ruuvini sɔ̃rinɛ ɓa.
5Arumkɔ aɗagbete si Kirisi ɗaa anɛ a koo tipi atɛ maani yɛ, kɛɗɔn a geli Ɗalapa nɛ,<<A ji kasi viyuu ãnɛ ɓa a vi ãnɛni ɓa,ama a pɛ ɗɔgbete a tɔ̃rin biiyɛ.6A nta binyatɔ̃nɛ ɓa a vivaah gbete shɔ ãyɛ niɓa ayuu lazãani nɛu sɔki shɔ ruuvini ɓa ko viyuu ãnɛ gbete tusi shɔ ruuvini yɛ ni ɓa.7Kɛɗɔn n shanɛ, <<Nkɔng yɛm, n pɛlaa vishonɛ a kasiyɛ, Ɗalapa, ji nagbete shɔ bee ang yuu a labeenɛ nya ãsinɛyɛ.>>>
8Yesɔ gaa shanɛ nɛ, <<Aji kasi viyuu ãnɛ ɓa a viãnɛni ɓa, a vivaah wɔnɛni ayuu laazãni aru ruuvini sɔkinɛ niɓa.>>Shavim aru viyuu ãnɛ a shɔ vi ãnɛni nagbete Musa nya ãsinɛ shayɛ .9Kɛɗɔn shanɛ,<<Nkɔng yɛm, n pɛlaa vishonɛ pɛ.>>Aruukɔ Ɗalapa pɔ̃ viyuu ãnɛ kagbete a pɔ̃kɛ Kirisi au yuuni.10Aru Yesɔ Kirisi pɛli vigbete Ɗalapa kasinɛu pɛliyɛ, u piti kpai shɔ sɔkiu ruuvinitɛ aru gbete ãuyuutɛ ɓagbete au yuu piti kpai.
11Ko pi shɔlansi nyawaanɛ Yahudawa shopiya ãviyuu ãnɛ gbetenkɔ a lee-lee; Ama viyuu ãnɛnkɔ yɛ zɛ shɔnɔɔ ruuvini sɔkinɛ ɓa.12Ama Kirisi ãu yuu viyuu ãnɛ ɓagbete sheeli dangdang, au ruuvini, kɛɗɔn a ɔ̃ a Ɗalapa nakɨn.13A ɗɔukɔ garɛ nɛ Ɗalapa u pɔ̃u shɔ nɔɔpɔ̃yi pogɔ u naliyi a dɔɔ.14Aru viyuu ãnɛ gbetenkɔ Ɗalapa sɨnrɛ nɛ shɔgbete shɔ sɔkiyi ruuviniyɛ nɛi ɔ̃ tɛpɛ-tɛpɛ dangdang.
15Suru Wɔsɔ-wɔsɔ kɔ shirɛ au yuuni. Au gaa shanɛ nɛ,16<<Shompɛ ruumanɛ gbete n yɛn maa a yiniyɛUɓeyelapa shanɛ a dii gbete kanɛyɛːN yɛn pɔ̃ng nyaãsinɛ ai sisɨnn bee ai sisɨn.>>
17Kɛɗɔn a sha sɔ̃n nɛ, <<N yɛn kpaa sisɨn tokɨn ɓa ai ruuvini a vikɔ̃nlinɛ gbete i pɛliyɛni ɓa.>>18A knti gbete shɔ yasiyi ruuvinitɛ, viyuu ãnɛ au sɔki shɔ ruuvini u vishonɛ tɔɓa.

U Kpaabii a Ɗalapa Maani

19Arugbetekɔ mazɔ̃yi u kpa nyabatɛ auyɛ too ɓuzɨn ɗɔɔ Wɔsɔ-wɔsɔtɛ aka Yesɔ vɔnɛ.20Ɓeliu nyaba sɔtɛ, nyaba au suru ɗɔnyɛ, fãrã nyejaa, ukɔɔ ɔ̃rɛ u bi.21U kpa shɔlansi pɛ̃niɓatɛ gbete sã Ɗalapa wɛrɛyɛ.22Aru ukɔ u kpa bi maani a Ɗalapani a sisɨn ãnɛ gbete, a sisɨn gbete shɔ sɔkiu ruuvinitɛ a bi gbete shɔ sɔki a mii tɛpɛ-tɛpɛ.23U sã sisɨn pɔ̃nɛ katakata aru shinɛ knti, aruviya shɔgbete u ma ruum a wuniyɛ, Ɗalapa upɛ shɔ vitɔ̃vɨng pɛlinɛ.24U kɔzɔtɔ u pɔ̃si zɔ naatɔ, u tasi zɔ ɔrinɛ a tɔ̃vɨn pɛlinɛni.25Ukɔɔ yaa ɔ̃nɛ nyazɔnɛ, nogbete zɔwɔyi pɛliyɛ. Kɛ ɔ̃nɛ nankɔ, u masi zɔ bitɔ piti kpai, nagbete ɔ zɛtɛtɔ nɛ Uɓeyelapa dii ɓatɛ maani.
26Aru viyuu ãnɛ wɔɔ toɓa auyɛ sɔkiu ruuvini yɛ ɓa, naa ukɛ yɛ ɗeknnɛ a ruuvini pɛlinɛni a knti gbete shɔ tasiu tɔ̃vɨn tɛttɔyɛ.27Naa si tɔnɛn ɔ̃ ɗɔkɔyɛ, vigbete yaayɛ u ga ɓɛɛ jo a tete zaanɛ gbete ruyeenɛ au kanɛ a setinim aru kpẽnti yaa yɛ shaa shɔgbete i ɓɛ̃ɛ̃ Ɗalapa ruubii a nɔɔniyɛ.28Shɔgbete ji gɨn Musa nya ãsinɛ ɓa shɔyɛ nyɔu vɔrɔtɔ, rantanɛni ɓa, naa kpaa shɔzɛ ziti ko taatinɛ ikɛ maanyanɛ aa yuu si ruu sãtɛ.29Naa shɔu kɛ bɛ̃ɛ̃ Ɗalapa ɓɛɛjaanɛ, pɛli foo tɛ a kpaa ruumaanɛ gbete tɛ̃ɛ̃ au yuu nɛ u sɔkiu ruuvini gaa Suru Wɔsɔ-wɔsɔ sɔ̃ntɛ. Aa zɛnɛ shɔyɛ yeeriu ruum pikoviya?30Aru u zɛ shɔgbete au shanɛ,<<Nɔkɔsinɛ pɛm n ɓɛɛyɛ, au sha sɔ̃nnɛ Uɓeyelapa yɛ yeeri ɓeshɔzɛyi ruurɛ.>>31Ɔ̃tɛ viseti shɔu too a Ɗalapa au suruyɛ ɗɔnyɛ naa!
32Kpaa sisɨntɔ nɔgbee Ɗalapa ɗɔsẽsẽ koli aa yuuyɛ, a ɓoora a vi waanɛ aji nta bi sɔ̃n ɓa aa vipɛlinɛni ɓa.33A ɗawɔɔ shɔ dãwɔ a shɔ nɔɔ, shɔ tasɔɔ raa a shɔ nɔɔ, a ɗawɔ ɔ rakijo a iri shɔ ai booraa naa ɔ ɓɛɛmkɔ.34Aru ɔ nta shɔgbete shɔ maayi a jahmɔ raa ntanɛtɔ, ɔ tasi shɔ sisɨn puru ntanɛtɔ aɗagbete shɔkɛ raa vigbete ɔ a wuuyɛ nɛ, aruviya ɔ zɛtɛttɔ nɛ ɔ vinaa aɗɔn gbete yɛ sɔwɔ ɗɔbiiyɛ dangdang.35Ɔkɔɔ vɔsinɛ a bi maanɛni, aru yɛ n-tiɔ vitɔ̃vɨng pɛ̃niɓa.36Ɔ shitɔ dɔkaziti, nɔgbete ɔyɛ pɛli vigbete Ɗalapa kasinɛ ɔ pɛliyɛ ɔ kpaa vigbete shanɛ ãwɔyɛrɛ.37Nagbete laabeenɛ Ɗanyaruubii shayɛ nɛ,<<Yɛ ɔ̃ ɓa ɗɔkɔkɔ ɓashɔgbete kanɛ yɛ atɔ;yɛ yisiɗaɓa.38N shɔbii tɔ̃vɨnmiyi i yɛ ã sisɨntɔ i ɔ̃ a suru ni;ama kɛ wanɔɔnɛ kntiN yɛn ntabiinyatɔ̃nɛ ɓa awuni ɓa.>>
39Ama u ɓɛɛ ɓa naa shɔgbete i gɔ̃bii a knti i nii nyabarɛ, u ɓɛɛ shɔgbete ai ã sisɨn i kpaa naaraanɛrɛ.

The Word for the World International

https://app.library.bible/content/6fec21b499f7e625