Bulus sẽkoo yɛnɛ shɔ Galantiyayi3
Nya-ãsinɛ ko Sisɨn-ãnɛ
1Ɔ shɔ Galantiya rãnmiyiǃ pi tuwɔ sisɨn piya? Ɔ shɔgbete ɔ zɛ ruu Yesɔ kirisi naa ɓanɛ laa tɛttɔ fɛ̃ɛmǃ2N yɛn hɨn ɔ ruu gbete sheeli: Ɔ tɛ Ɗa suru a nyaba vigbete nya-ãsinɛ shayɛ ya? ko nyaba gbete ɔ nta ruu tɔ̃vɨn awɔ ã sisɨnrɛ a ɗɔniya?3Ɔ ɔ̃ rãn pikoviyaǃ Ɔ gaa a Ɗa suru; dɔdɔrim ɔ kasiu nya yisinɛkɛ awɔ kaka ya?4Ɔ raboonɛ ayuu vigbete ɔ pɛliyɛ ɔ̃kɛtɛ weze ya? Pɛ nizɛ ɔ̃tɛ viwɔǃ5Ɗalapa ãwɔ u surutɛ ɔ pɛli vibiizaanɛ awɔ atette aru ɔ pɛli vigbete nya ãsinɛ ãsiyɛ ya ko aru ɔ nta ruu tɔ̃vɨn ɔ ã sisɨnrɛ ɗɔn ya?6Ɔ kɨnnɔɔ pɛ a Ibirayi vizɛnɛ; nagbete Ɗanyaruubii shayɛ nɛ, <<Ibirayi ã sisɨntɔ a Ɗa biini, jo au ruu sisɨn ãnɛkɔ Ɗalapa tɛu naarɛ aru u shɔtɔ̃vɨng.>>7Ɔ kpaa sisɨntɔ nɛ, Ibirayi jawuru tɔ̃vɨnyi ikɔyi ɔ̃rɛ shɔgbete ai ã sisɨn a Ɗabiiyɛ.8Ɗanyaruubii shatɛttɔ nɛ, Ɗalapa yɛ pɔ̃ shɔgbete i ɓa Yahudawa ɓa au kabii a nyaba sisɨn ãnɛ. Aruukɔ Ɗanyaruubii geli Ibirayi ruu tɔ̃vɨn tɛttɔ nɛ: <<Jo aa kabiikɔ Ɗalapa yɛ tasi shɔ vɔɔ susãrirɛ bi a koo piti kpai.>>9Ibirayi ã sisɨnrɛ a Ɗalapa tasiu vɔɔ susãrirɛ abi; aruukɔ shɔgbete ai ã sisɨn yɛ piti kpai Ɗalapa tasiyɛ vɔɔ susãrirɛ abi nɔgbete tasi Ibirayi yɛ.10Shɔgbete ai kɛ gɨnnɛ nya-ãsinɛ, i yɛ wiriyitɔ. Aru Ɗanyaruubii shatɛttɔ nɛ, <<Shɔgbete au ji gɨn vigbete a yɛti laabeenɛ nya-ãsinɛ ɓa a lee-lee ɓa i yɛ wiritɔǃ>>11Dɔdɔrim tasi tɛttɔ wasa-wasa shɔwɔɔyɛ ranaa ɓa a nya-ãsinɛ gɨnnɛni ɓa, aru gbete nya-ãsinɛ shatɛttɔ nɛ,<<Se shɔgbete Ɗalapa tɛi naa kɔsheeli ukɔi yɛ kpaa naraarɛ i ɔ̃ a suru ni.>>12Ama nya-ãsinɛ yuu ji wau ɓa a sisɨn ãnɛni ɓa, ama Ɗanyaruubii shatɛttɔ nɛ,<<Shɔgbete kɛ pɛli vigbete nya-ãsinɛ ãsiyɛ nɛ kpai yɛ ɔ̃ a suru ni.>>13Ama Kirisi rautɛ a wirinɛ gbete nya-ãsinɛ n-tiuyɛni; aru Ɗanyaruubii shatɛttɔ nɛ, <<Shɔgbete shɔkɛ bau naa nɛ a yulaa si Ɗalapa wiriutɛttɔ.>>14Kirisi pɛlivim aru vɔɔ susari gbete Ɗalapa ma a Ibirayi nɛ shɔyɛ ã shɔgbete i ɓa Yahudawa ɓa a Yesɔ Kirisi kabii, a nyaba sisɨn ãnɛ uyɛ tɛ Ɗa suru gbete Ɗalapa ma nɛn ãuyɛtɔ.Nya-ãsinɛ a ruumanɛ
15N shɔbiiyi n yɛn nwanya a ɔkɔɔni n pɛli vishonɛ a vitasinɛ ko-pi ɗaviyaː Naa shɔzɛ ziti i kɛ maruunɛ i pɔ̃naa a yuuni, shɔ wɔ yɛ zɔ̃ ruu dɔɔɓa ko u pɔ̃ viwɔ au yuuni ɓa.16Dɔdɔrim Ɗalapa maruu a Ibirayi a ɓɛuruyi ni. Ɗanyaruubii shatɛttɔ nɛ shɔyɛ ɓaa ɓa nɛ,<<Ɓɛwuruyi ɓa,>> ukɔ ɔ̃rɛ shɔzɛ waanɛ, ama ji shɔgbete ɓa waanɛ ɓa shɔ ɓaa nɛ, <<ɓɛwuru,>> ukɔ ɔ̃rɛ shɔzɛ gbete sheeli, u niinɛ Kirisi.17Vigbete n sha a ɗɔmyɛ ukɔ ɔ̃rɛ shom, Ɗalapa maruu a Ibirayi a marɛ nɛ ruu manɛu yɛ ɔ̃tɔ. Nya ãsinɛ gbete shɔ ã a saa laa -laa ziti au jaa bmati atu kop akɨnti, shɔ zɛnɔɔ ruu manɛu vɔsinɛ dɔɔɓa a nyɔ Ɗa ruu manɛurɛ ɓa.18Si shɔ tɔnɛ Ɗalapa vi-ãnɛ shi ayuu ruu nya-ãsinɛkɔ sheeli, kɛɗɔn si shɔ ji shi ɓa ayuu ruu maanɛni ɓa. Si ɓɛjo a ruumanɛnkɔ Ɗalapa ã Ibirayi vi-ãnɛurɛ.19Kɛɗɔn nya ãsinɛ vishonɛu ɓɛkɛ iviya? Shɔ pɔ̃ nya-ãsinɛm aru shɔu tasi vigbete vikɔ̃linɛ pɛliyɛ, sɔ̃nya aɗagbete Ibirayi laduruyi yɛ a yɛ, shɔgbete a Ɗalapa maruu a wuniyɛ. Nya ãsinɛ Ɗalapa ã a Ɗajashonɛlapayi naa, ai tuurɛ i nɔsi a Musa naa, kɛɗɔn Musa tuu nya-ãsinɛu a ã shɔ a naa.20Ama ayuu ruumanɛu Ɗalapa ji kã shɔ ruudɔtinɛ ɓa; Ɗalapa ji gbete.Nya-ãsinɛ Vishonɛ
21Nya-ãsinɛu tasikɛ nɛ ji kasi Ɗalapa ruumaanɛu ɓaya? Ɓa, Ɗalapau zãritɔ! Naa shɔzɛ kɛ tɛ nya-ãsinɛ gbete yɛ n-tiu suruyɛnɛ, kɛɗɔn ko-piya au kɛ gɨn nya-ãsinɛunɛyɛ shɔ yɛ pɔ̃u a Ɗalapa kabii.22Ama Ɗanyaruubii shatɛttɔ nɛ kotipim piti kpai ɔ̃ atette ruuvini kaka; kɛɗɔn ruumaanɛ gbete shɔ ã shɔyɛ, shɔ ã jo nɔgbete i kaka sisɨn ãnɛ sãyɛ a Yesɔ Kirisi kabii, shɔ ã jo shɔgbete ai ã sisɨn aɗɔnyɛ.23Ama aɗagbete si ɗaa sisɨn ãnɛ ji a ɓayɛ, nya-ãsinɛ mau naa shɔjahmyi yɛnɛ ɗagbete sisɨn-ãnɛ tasiu yuuyɛ.24Aru nankɔ nya-ãsinɛkɔ sãurɛ yɛnɛ ɗagbete Kirisi a yɛ, nɔgbete au nyaba sisɨn-ãnɛkɔ Ɗalapayɛ tɛunaarɛ.25Dɔdɔrim ɗaa sisɨn ãnɛ atɛ yɛm, nya-ãsinɛ u kaka tɔɓa au yuuni ɓa.26Ji nyaba sisɨn ãnɛkɔ ɔ piti kpai ɔ ɔ̃ Ɗalapa jaayirɛ a Yesɔ Kirisi kabii.27Shɔ pɛlɔɔ batizimatɛ piti a Yesɔ Kirisi kabii, dɔdɔrim ɔ hã fãrã tɛ u shapɛ nankɔ, ɔ tosi Kirisitɛ naa fãrã a bi.28Kɛɗɔn vɔsinɛ wɔɔ ɓa atette Yahudawayi a shɔgbeteyi ɓa Yahudawa ɓa yini, vɔsinɛ ɓa atette fooyi a shɔ wezeni ɓa, atette vɔshɔ a soroyini ɓa; aru ɔ piti kpai ɔ gbete a Yesɔ kirisi kabiini.29A kɛ ɔ̃nɛ kirisi ɓɛɛ, ɔ̃kɛtɛ ɔ pɛ Ibirayi ɓɛwuruyi ai yɛ kpaa vigbete Ɗalapa mayɛtɔ.The Word for the World International