YESƆ JASHONƐ I Vishonɛ17

Nyayunɛ Tasalonika

1Bulus a Silani i yɛrɛ i sɔɔ Ampiboli a Apoloniya ai to Tasalonika rɛ, ɗɔ gbete Yahudawayi ɗɔ-ɔ̃nɛ aɗɔn.2Ji naa gbete Bulus pɛli a lee-lee, a to Yahudawayi ɗɔ-ɔ̃nɛrɛ. A lee susunɛ lumoo taati shɛ̃ri-shɛ̃ri Bulus nakiruutɔ a shɔni a vi gbete laabeenɛ Ɗa nyaruubii shayɛ.3U tasiyidɔɔ ruu Ɗa nyaruubiirɛ, au tasiyinɛ Shɔshɔraanɛ yɛ ɓooratɔ, u yurɛ a sàà ni. Bulus sha sɔ̃n nɛ, <<Yesɔ gbete nkɛ gelɔɔ u ruubiinɛm, ukɔ ɔ̃rɛ Shɔshɔranɛ.>>4Kɛɗɔn Yahudawa gãsiyi a Helinayi gbeteyi gɨn Ɗalapa yɛ wɔsɔ̃n suu yupɛ̃niyi waanɛ shɔ sã yuurɛ, i ɓasi yuurɛ a Bulus a silani5Ama Yahudawayi kaagɨn i toli jasɔrɔ wɔɔyi nya a nyabalanɛ. Kɛɗɔn i yusi nya a koouni, i yurɛ yɛnɛ jawɔɔ wɛrɛ u niinɛ Jaason, nɛi kã ɗɔ Bulus a Sila aru i n-tiyi shɔ ɗekɨn.6Ama naa i ji kpayi ɓa, kɛɗɔn i gɔ̃ki Jaason a shɔ sisɨn ãnɛ Ɗabii gãsiyini, i n-tiyi shɔ ruuyeenɛyi ɗekɨn, ai kaa nya i shanɛ,<<Shɔ miyi n ti shɔ yukɔnɛtɛ kopiɗɔpiya a koo, dɔdɔrim i atɛ au koo7a Jaason ãi ɗɔsusunɛ au wɛrɛ, i kpai i ɗɔ kayisar nya-ãsinɛ kanɛ i shanɛ kpati wɔɔ aɗɔn, au niinɛ Yesɔ.>>8A ruumkɔ mooyi a yupɛ̃ni koowi i sisɨn ji rooɓa.9Yupɛ̃ni koowi i pɔ̃rɛ Jaason a shɔwɔɔyini i shɔ saa rɛ aru shɔ yainaa.

Bulus a Sila i Yɛ Beriya

10Naa zɨmba pɛlitɛ tɛ̃ɛti, shɔ sisɨn ãnɛyi Ɗabii i sho Bulus a Silani a Beriya, naa i totɛ, i yɛ Yahudawayi ɗɔ-ɔ̃nɛrɛ.11Yahudawamiyi i sisɨn si tɔ̃vɨn i tɛɛ shɔ gbeteyi a Tasalonikatɔ, aru i tɛ Ɗaruubiitɛ naa kaziti, ko-pi lee piya i zɛ Ɗa nyaruubiitɔ aru nɛi zɛpɛ vi gbete Bulus shayɛ nizɛ ya.12Aruumkɔ Yahudawayi waanɛ i ã-sisɨn Ɗalapa bi, a suu yupɛ̃ni Helenawa a shɔ gbete shɔ ntanyatɔ wɔsɔ̃n Helenawa vɔshɔyini.13Ama naa Yahudawayi gbeteyi a Tasalonika i ntatɛ nɛ Bulus u ɗɔ Ɗa nyaruubii nwanɛ a Beriya, i yɛrɛ i wòònya a shɔ ɗɔbii nɛi pɛ shɔ gbeteyi pɔ̃ shɔ sisɨn rooɓa.14Ji ɔ̃ ɓa ɗɔkɔkɔ ɓa shɔ sisɨn ãnɛ a Ɗabii i pɔ̃ Bulus yɛ nyaɓootirɛ, ama Sila a Timotini i shi ɓɛji a ɗɔukɔ.15Shɔ gbeteyi i dɔ̃ Bulus dɔɔyɛ i n-tiurɛ yɛnɛ Atina, kɛɗɔn a ɗaa Beriya sɔɔnɛ Bulus shoirɛ yɛnɛ Sila ɗɔbii a Timotini nɛi arɛ i kpau tɛ̃ɛ̃ti, ai yɛrɛ.

Bulus nwari shɔ Ɗa nyaruubii a Atina

16A ɗagbete Bulus u ɗɔ gbete ga Sila a Timotini a Atina yɛ, naa zɛtɛ koomou vigãnkiyi raatɛ kpai u sisɨn hm fɛ̃ɛm.17Arumkɔ naki ruu a Yahudawayi ɗɔ-ɔ̃nɛ a Yahudawayini a shɔgbeteyi ɓa Yahudawa ɓa gbeteyi i bassi Ɗalapayɛ, ko-pi lee piya shɔ gbete a lumo kpai naki ruutɔ a yini.18Abikuriya wɔɔyi a shɔmala Sitokiyayi i masinyatɔ awuni ni, gãsiyi hɨnɛ, << Rãnmi kasi i vi shanɛ viya?>>
Wɔɔyi kasinya nɛ, <<Naa shɔ gbeteyi nwari shɔ ruu jaaɗa wɔɔyi ɓa shɔ ɗɔnkɔɓa,>> I sha ruum aru Bulus nwari shɔ ruu a Yesɔ yuu a nɔgbete yurɛ a sàà yɛ.
19Kɛɗɔn i n ti Bulus ɗɔ gbete mooyi yupɛ̃niyi tolinya aɗɔn gbete shɔ ɓaanɛ Arasa, i shanɛ,<<U yɛu kasi u zɛ vimatinɛ sɔɔmtɔ gbete a ɗɔɔ shanɛm.20Gãsi vi gbete a shaliyɛ u ji ntaɓa shãɓa, u kasi u zɛtɔ.>>21Aru jaa tipi Atinayi a shɔzɛtini gbeteyi a Atina yɛ i kasi ɓɛɛ ruu sɔɔ ntanɛ aru i nwanya a yuuni.
22Kɛɗɔn Bulus yulapa a Yupɛ̃niyi ɗekɨn a shanɛ, ɔ shɔ Atina n kɨnnɔɔ n bilirɛ ɔ pɛ shɔ nyaba gɨnnɛ waanɛ ko-pi nyaba shɔpiya.23Aru n rakitɛ awɔ koomo, n bilirɛ n zɛ vi gbete ɔ gɨn yɛ, n zɛ laazãã wɔɔ gbete shɔ bee vi au yuuni au shanɛ,<<Ɗalapa gbete shɔ ji zɛ ɓa>> Shɔ gbete ɔ gɨurɛ ɔ ji zɛɓamkɔ, n nwarɔɔ nya ji au yuukɔ.
24Ɗalapa gbete au shɛshi kootipi a vi gbete au ɓuzɨn ni, ukɔ ɔ̃rɛ Uɓeyelapa au lapa a tipini, ɔ̃ ɓa wɛrɛ Ɗa gbete shɔzɛ mayɛni ɓa.25Ji nankɔ kã shɔzɛ vinaa au pɛliyɛ ɓa, kã viwɔɔ ɓa, aru ji ukɔ au yuu ã shɔzɛ sururɛ a ɔ̃kinɛni a vi gãsiyini kpai.26Ukɔ shɛshi shɔrɛ a koo kpai a nyaba shɔzɛ gbete, a pɔ̃yirɛ nɛi ɔ̃ a kootipi kpai, pɔ̃si kopiya ɗagbete i yɛ ɔ̃ yɛ tɛttɔ a kooni kpai a ɗɔ gbete kopiya i yɛ ɔ̃yɛni.27Ɗalapa pɛli vim aru nɛ shɔu kãn ɗɔtɔ, wɔɔɓa i kɛ kãlinɛ i kpaurɛ, ko shɔmni kpai Ɗalapa u ɓa kpɛlɛ a ukɔuni ɓa.28<<Uru ji a Ɗalapa yuukɔ sheeli u shaa vi u ɓoorɛ, u bi gulunɛ ji ukɔ, u ɔ̃nɛ a suruni ji ukɔ.>>Na gbete ɔ shɔ sɔɔ tɔ̃nɛ wɔyi shanɛ,<<Ukɔma u ji mɛjaayikɔ>>
29Asitɛ ukɔu ɔ̃tɛ Ɗalapa ɓɛɛ jaayi ya, ji tɔ̃ɓa u pɔ̃ a sisɨn nɛ Ɗalapa shɛ zɔ a jasuru tarimɛɛ ɓa, ko saka gbete shɔ ɓaanɛ a zurfa ɓa, ko tari ɓa, a shɔzɛ tɔ̃ri au sẽrẽyɛ ɓa.30Si tɛ̃ɛtɛ̃ɛ Ɗalapa ya kopiyatɔ u yɛ ji u nyaba, aruiviya i ji zɛ nyaba gbeteyi au ɗɔbii ɓa, Ama dɔdɔrim kopiya ãsiunyatɛ nɛu ya ruuvinitɔ.31Aruviya pɔ̃ dii tɛttɔ au yɛ vɔsi shɔ ruu tɔ̃vɨn a kɔ̃linɛni a koo a shɔzɛ gbete lɔ yɛ kabii, Ɗalapa tasi kopiya tɛttɔ a koo a nyaba au yusi jau a sàà yɛ!32Naa i ntatɛ Bulus nwanya aru yuunɛ a sàà yɛ, kɛɗɔn gãsiyi i ãriu-nya, Ama wɔɔyi shanɛ,<<U kasirɛ u nta vi gbete a yɛ sha aru ruum pɛtti.>>33A ɗaukɔ Bulus yaa ɗɔ-ɔ̃nɛurɛ.34Shɔ gãsiyi i sɔɔu ɗɔbii ai ã-sisɨnrɛ. Ai tetteni si Diyonisu, Yupɛ̃ni Yahudayi jaadɔ, si suwɔɔ aɗɔn u niinɛ Damari, a shɔ gãsiyini.

The Word for the World International

https://app.library.bible/content/6fec21b499f7e625