Bulus sẽkoo yɛnɛ shɔ Korinti Yutasinɛ Bulus sẽkoo au pɛsiyɛ yɛnɛ shɔ Koranti,12

Bulus Nɔrinɛ

1Ɔ̃tɛ kaka jazɨng akɔrɔ n baasitɔ, ko shɔ kpaa viwɔ ɓau yuuni ɓa. Ama dɔdɔrim n yɛn shavi ayuu vigbete Uɓeyelapa tasin a nɔrinɛ a vitasinɛni.2N zɛ jaa Kirisa wɔɔ gbete u saa kopi atu maani nɛm, Ɗalapa tuurɛ yɛnɛ kolapa feemfeem, ko u si au bi shɔzɛ ya ko a suru ya Ɗalapa kɔ sheeli zɛrɛ.3N sha sɔ̃npɛ, n zɛ tɛttɔ jaam Ɗalapa tuurɛ yɛnɛ Ɗawɛrɛ, (toti, ko u si au bi shɔzɛ ya ko a suru ya n ji zɛ ɓa),4a ɗɔwakɔ nta ruu gbete shɔ sha dɔɔɓa a shɔzɛ nyakooni ɓa, a vigbete shɔzɛ gànya sha ɗɔɔɓa ni.5N yɛn baasi a jam yuukɔ ama n yɛn baasi ɓa ang yuuni ɓa, see ayuu vigbete tasin nwesiyɛ.6N si tɔnɛn kasi baasinɛ, n yɛn nwanya ɓa naa rãng ɓa, aru n yɛn geli shɔ vinizɛ. Ama n yɛn baasi ɓa, aru n ji kasi ɓa shɔwɔ u tunrɛ u tɛɛ nɔgbete zɛn vi pɛlinɛ ɓa, a nɔgbete nta vi ang nyayɛni ɓa.
7Ama aru Ɗalapa ji kasi ɓa nɛn baasirɛ ayuu vinɔlusinɛ waanɛ gbete n zɛyɛni ɓa, a yanrɛ nɛn ɓoraa a vɔrɔ au kɔng a bishɔzɛ, vim ɔ̃kɛ naa japɛ̃pɛ̃ɛ̃ jashonɛ wanrɛ a zãrin yuu ɗenɛ.8N gaki Uɓeyelapa ɓa taati aru u vɔsintɔ a vimni,9ama u nyarisinɛ nɛ, <<N tɔ̃vɨn shonɛ ji vigbete a kasiyɛkɔ, aru n kaka ɔ̃ fɛ̃ɛm a ɗagbete a nwesiyɛkɔ>> n nta sisɨn purutɔ fɛ̃ɛm, n baasi ang ruu nwesinɛni, aru Kirisi u kaka shɔ kukinɛ u ɔ̃ a nkɔni.10Aru nankɔ n nta sisɨn purutɔ ang nwesinɛni, naa shɔ kɛ dãnnɛ, ko n kɛ ɓooranɛ, ratasinɛni a raɓoonɛni a Kirisi yuu. Naa n kaka ji ɔ̃ ɓa, a ɗaukɔ n kaka aɗɔn fɛ̃ɛm.

Bulus yuuyɔrinɛ aru shɔ Korantiyayi

11N pɛli vi naa rãng awɔ yuu, ama ɔkɔɔ pɔ̃ng-rɛ n pɛlirɛ. Tɔ̃rɛ ɔkɔɔ ɔ ɓɛlinjo. ko n ɓa viwɔ ɓa, ji tasi ɓanɛ ɔ <<Jashonɛ>> pɛ̃nibayi nɛi tɛntɛ ɓa.12Ɗalapa pɛli vibiizaanɛ a vinɔlusinɛni waanɛ awɔ ɗɔbii ang kabii, ang tete sisɨnmɛɛnɛ tasi tɛttɔ nɛn pɛ jashonɛkɔ nizɛ.13Kɛ nyaba shɔpi n tasinɛ ɔ ɓa zali a shɔ Ɗa gɨnnɛyi wɔyini ɓa viya? Ko kɛ aru gbete n zarɔɔrɛ ɔ pɔ̃sing naa ɓa a saani ɓaya? N gakɔɔtɔ ɔ yasin ruuvinintɔ naa n ji pɛli ɓa tɔ̃vɨn ɓayɛ!
14Shom pɛ ɓa taati dɔdɔrim gbete n mabii n arɛ n ɗewɔrɛ, n yɛn pɔ̃ wɔ ɓanɛ ɔ ãng viwɔrɛ ɓa aru n kasi ji ɔkɔɔ, n ji kasi ɓa wɔ saa ɓa. Ji tɔ̃ ɓa jajayikɔ i nti ɓeye a ɓini ni viwɔrɛ ɓa, ama jaaɓeye a ɓini kɔ i nti jaayi vijo.15N yɛn nta sisɨn purutɔ n nyo vigbete n a wunini kpai, piti ang yuuni aru gbete n pɔ̃sɔɔnaa. N ɔrinɛ kɛ ɔ̃nɛ bang, kɛ ruviya ɔ ɔ̃rinkɛ fɛ̃ɛ viya?
16Ɔ yɛ kasitɔ a vigbete n shayɛni, n tɛ saa ɓa awɔ naani ɓa. Ama shɔwɔ yɛ shanɛ n tasɔɔ ruu kpɛ̃nɛ, n ɗawɔtɛ a nyayeenɛni.17N mɛwɔ kɛpikovi ya? A nyaba jashonɛ wɔ gbete n shou awɔ ɗɔbiini viya?18N gaki Titus u yɛrɛ, n showɔ sɔ̃n shɔ sisɨn ãnɛ Ɗabii awuni. Ɔ yɛ shakɛnɛ Titus mɛwɔ tɛya? Nkɔng a ukɔɔni ɓa vigbete n-tiurɛ ɓaya? U gɨnɓa nyaba gbete ɓaya?
19Ɔ pɔ̃ a sisɨn tɛ̃ɛ-tɛ̃ɛ nɛu kasiu yuu raanɛ awɔ ɗɔbiini, ɓa nankɔ ɓa! U sha vim naa Kirisi si shayɛ a Ɗalapa ɗekɨn, a vigbete u pɛliyɛ kpai, n shɔ ɔrinɛyi u pɛli aru gbete u pɔ̃sɔɔnaayɛ.20N ntaseti, naa n kɛ yɛ wɔ ɗɔbiinɛ n kpawɔ toti ɓa naa gbete n kasiyɛ ɓa, ko ɔ kpang toti ɓa naa gbete ɔ kasiyɛ ɓa. N ntaseti n kpawɔ a ɗɔ bawaanɛ, n kpawɔ a ɗɔ gɨnkaanɛ a zɔni, n kpawɔ ɔ aɗɔ sisɨntuunɛ a zɔni, a yuu kasinɛ, a zɔdãnɛ, a zɔ woonɛ, yuubasinɛ a bayusinɛ.21N ntaseti lewɔ n kaanɛ awɔ ɗɔbii n Ɗalapa yɛ pɔ̃ng-rɛ n ɓooyusẽrɛ awɔ ɗekɨn, n yɛn sɨntɔ aru shɔzɛ waanɛ gbeteyi pɛli ruuvini tɛ̃ɛ-tɛ̃ɛ, shɔ gbeteyi ji yaa ruuvini pɛlinɛ ɓa, ai pɛli kpatang zɔ kaanɛ roonɛ a soni a vɔshɔ gbete ɓai ɓɛɛɓa.

The Word for the World International

https://app.library.bible/content/6fec21b499f7e625