1 Timoti4
Shɔmala Nyayeenɛyi
1Ɗa suru sha tɛttɔ wasa-wasa nɛ a lee gadi shɔwɔyi yɛ yaa sisɨn ãnɛtɔ; i yɛ gɨn kɛ suru nyayeelinɛyi nya i gɨn vigbete rãmayi i mati shɔyɛ.2Vimatinɛ ɗɔmiyi pɛ shɔ shɔɗakinɛ nyayeelinɛyi ikɔyi sãti ruumrɛ, shɔ gbeteyi sisɨn vɔ tɛttɔ, naa shɔ too a saka shẽshẽ.3Shɔ ɗɔmiyi i mati shɔ vinɛ so tɛnɛ ɓa tɔ̃vɨn ɓa, i geli shɔ sɔ̃nnɛ shɔkɔ shaa zɔng vishaanɛ wɔɔyinɛ. Ama Ɗalapa shɛshi vishaanɛ miyi nɛ shɔu shaatɔ, shɔgbeteyi ã sisɨntɛ i zɛ tɔ̃vɨntɛ i tɛrɛ i tasi dɔ̃rinɛ i shaarɛ.4Kopiviya gbete Ɗalapa shɛshiyɛ pɛ tɔ̃vɨn; shɔkɔ bɛ̃ɛ̃ viwɔɔnɛ, ama ko-iviya shɔ tɛrɛ shɔu dɔ̃ri Ɗalapa au yuuni,5aruviya Ɗanyaruubii a Ɗa gakinɛ ukɔ pɔ̃rɛ a ɔ̃ wɔsɔ-wɔsɔ Ɗalapa tɛrɛ.Kirisi Yesɔ Jawɛrɛ tɔ̃vɨn
6A kɛ mati shɔ sisɨn ãnɛyi vimiyinɛ, a yɛ ɔ̃ Kirisi Yesɔ jawɛrɛ tɔ̃vɨn, vim tasi akɛ mataa yuu vitɔ̃vɨng miyi nɛ ruu sisɨn ãnɛ a suru wɔsɔ̃n vimatinɛ tɔ̃vɨn gbetaa gɨnyɛ.7Ama a bɛ̃ɛ̃ vigbete ji shɛ ɓa a Ɗalapa ɗɔbii ɓa matinɛtɔ, a ruuɓere kɔ̃linɛyi, gbeteyi pɔ̃ shɔrɛ shɔu bassi Ɗalapa ɓa, ama a yɛ ɗekɨn a vigbete Ɗalapa kasiyɛ naa pɛliyɛ matinɛni.8Bi kasinɛ a jazɛbii u jaa vishonɛ aɗɔn ama bi kasinɛ a suru ko-pi nyaba shɔpiya tɛɛ ko-ivayatɛ, aruviya pɔ̃si shɔ naatɔ ko aa ɔ̃nɛ a suruni ko knti gbete a vɔtɛ.9Nya shanɛm pɛ nizɛ, yɛtɛ nɔgbete kopiya u tɛrɛ u ã sisɨn aɗɔn.10Aruumkɔ u mabiirɛ u pɛlishonɛ fɛ̃ɛm, aruviya u pɔ̃ sisɨn a Ɗalapa gbete u suru aɗɔn bi, shɔ gbete ukɔ ɔ̃rɛ shɔ-shɔraanɛ kpai, badijo shɔ gbeteyi ã sisɨntɛyɛ.11A kɔsiyinyamtɔ a vimatiyi vimiyitɔ.12Mɔkaa yaa shɔwɔnɛ u tɔnɛ a vimatinɛ ɓa tɔ̃vɨn ɓa aru nɛ apɛ jujaa, ama aa nyanwanɛ a ɔ̃kɛ shɔ sisɨn ãnɛyi vitasinɛ, aa ɔ̃nɛni, aa shɔ ɔrinɛ, aa sisɨn ãnɛ, wɔsɔ̃n a suru sɔɔnɛ wɔsɔ-wɔsɔni.13Setɛ n atɛ, a shɔ ɗekɨn a ãyuutɔ a mabiitɔ a laabeenɛ Ɗanyaruubii ɓalinɛni, a nwari shɔ Ɗanyaruubiitɔ a mati shɔ vitɔ.14Mɔkaa yaa vishonɛ suru pɛlinɛ nɛ gbete aa binɛ, shɔ gbete shɔ ãyɛ aɗagbete janyagadi nwanya a shɔpɛ̃ni dɔlaayi pɔ̃saanaa yuuyɛni.15A pɛli jo vimiyikɔ a ãyuu aɗɔn, nɔgbete shɔ yɛ zɛa a vishonɛ ɗekɨn yɛnɛ kpai.16A kɔyuutɔ fɛ̃ɛm aa vimatinɛni. A yɛ ɗekɨn a vimiyi pɛlinɛni, aruviya a kɛ pɛlinɛ, a yɛ raa a yuutɔ a shɔgbeteyi ntaa vigbete a shayɛni kpai.The Word for the World International