1 Timoti1
1Sẽkoom shɛ ang naa Bulus, n pɛ Kirisi Yesɔ jashonɛ, pɛ Ɗalapa u shɔ-shɔraanɛ a Kirisi Yesɔ au pɔ̃sisɨn au bi lɔng-rɛ nɛn ɔ̃ jashonɛ.2N beeri sẽkoom pɛ mɔkɔ Timoti, n javɔshɔ tɔ̃vɨn a nyaba sisɨn ãnɛ:
Mɛnɛ Ɗalapa Uɓeye a Kirisi Yesɔ Uɓeyelapa u ãwɔ tɔ̃vɨn shonɛ, raantanɛ, a ɔ̃nɛbiinyatɔ̃nɛni.
Mɛnɛ Ɗalapa Uɓeye a Kirisi Yesɔ Uɓeyelapa u ãwɔ tɔ̃vɨn shonɛ, raantanɛ, a ɔ̃nɛbiinyatɔ̃nɛni.
Yushogɔ̃nɛ ayuu vimatinɛ nyayeelinɛ
3Nagbete n masɔɔbiiyɛ aɗagbete n si nyaba Makidoniya yɛnɛ n kasirɛ a ɔ̃ a Afisa, aruviya shɔwɔyi aɗɔgbeteyi mati shɔ ruunyayeeli a ɗɔnni, a pɔ̃yirɛ i yaatɔ.4A geliyi nɛi yaa sisɨn ãnɛtɔ a ruuɓere kɔ̃linɛyini au ɓɛuruyi nii raaki gɨnnɛni, vimiyi pɔ̃si shɔ naa ɓa n ti shɔ nyamasinɛ, shɔ pɛli ɓa vigbete Ɗalapa kasiyɛ au shɛ atette sisɨn ãnɛ ɓa.5Ruu sisɨn ãnɛm ukɔ ɔ̃rɛ shɔu tadɔɔ zɔ ɔrinɛ wasa, au shɛ sisɨn tɔ̃vɨn, a lɛrinɛ tɔ̃vɨn a sisɨn ãnɛ gaanɛ.6Zɔ gãsiyi risi vim kntitɛ, i nwalikɛ ruukɔ̃linɛ gbeteu vishonɛ ɓa.7I kasinɛyi ɔ̃ shɔmala nya-ãsinɛ Ɗalapa, ama i zɛ ruu gbete i shayɛ ɓa ko vigbeteyi nwanya ayuu fɛ̃ɛm kakani i ji zɛ ɓa.8U zɛ tɛttɔ Musa nya-ãsinɛ pɛ vitɔ̃vɨng, shɔ kɛ pɛlivishonɛ nɛ awuni tɔ̃vɨnyɛ.9U zɛ tɛttɔ, shɔ ji bee Musa nya-ãsinɛ ɓa aru shɔ tɔ̃vɨnyi yuu ɓa ama aru shɔgbeteyi ka nya-ãsinɛ a shɔ ruuvini kpete-kpetiyi yuu, shɔ gbeteyi Ɗalapa ɓa ai ɔ̃nɛni ɓa, a shɔ ruuviniyi, shɔ gbeteyi bassi Ɗalapa ɓayɛ ko a suru, a shɔ gbeteyi nyo ɓeyeyi ko ɓiniyini, a shɔ yuvɔnyonɛni.10A shɔgbeteyi roo a shɔ soni ko a shɔ vɔshɔni, a vɔshɔ gbeteyi roo a vɔshɔni ko so gbeteyi roo a ɓɛzɔɔ soni, a shɔ gbeteyi ɓɔɔ shɔyɛ, a shɔ gbeteyi pɛli vi totti vigbete yɛɓa gbete a vimatinɛ tɔ̃vɨn ni ɓa.11Vimatinɛm tɔ̃vɨn shɔ kpaa a ruu tɔ̃vɨn gbete shɔ kosinnya nɛn shayɛ, ruu tɔ̃vɨn shapɛ a Ɗalapa gbete shɔ basiuyɛ a Ɗa tasiu susãri tɛttɔ biini.Dɔ̃rinɛ aru Ɗalapa raantanɛ
12N dɔ̃ri Kirisi Yesɔ Uɓeyelapatɛ, shɔ gbeteu ãng kaka n vishonɛyɛ. N dɔ̃riutɛ aru gbete gang re a lɔng-rɛ nɛn pɛlin vishonɛ,13piti nɔgbete si tɛ̃ɛ̃tɛ̃ɛ̃ n sha ruukɔ̃linɛ a Kirisi yuuni, n tasiu raatɔ, n dãutɔ. Ama Ɗalapa ntanraatɔ aruviya sin ji ãsisɨn ɓa, aruumkɔ sin ji zɛ vigbete n pɛliyɛ ɓa.14Uɓeyelapa nterin u tɔ̃vɨn shonɛtɔ fɛ̃ɛm ayuu a ang sisɨn ãnɛ a ɔrinɛ gbeteu ɓɛɛ aka yuɓasinɛ a Kirisi Yesɔ.15Shom pɛ ruu nizɛ a shɔ shayɛ nɛ, yɛ tɛttɔ nɔgbete shɔ tɛyɛ kpai shɔ ãsisɨn aɗɔn: Kirisi Yesɔ a kotipi aru u raa shɔruuviniyi. Atette shɔruuvini kpai nkɔng ɔ̃rɛ shɔ gbete tɛɛ a ruuvinini,16Ama Ɗalapa ntanraatɔ aruviya n shɔ gbete n ruuvini tɛɛ kpai pɛlivishonɛ a nkɔni u tasi nɔgbete Kirisi Yesɔ sisɨnmɛɛnɛ au yisinya ɓa aɗɔn, u ɔ̃ kɛ vitasinɛ aru shɔ gbeteyi i yɛ ãsisɨn au bi, i kpaa suru gbete sɔ̃nya ɓayɛ.17Mɛnɛ kpati au ɔ̃ dangdang, shɔ gbete yɛ vɔ ɓa, a shɔgbete shɔwɔ yɛ zɛu ɓa, ukɔ Ɗalapa gbete sheeli, tɛ banɛ a bassinɛni dangdang. Nankɔ.18Majaa Timoti, n ãa nya-ãsinɛm ji nɔgbete janyagadiyi sha si knti aa yuuyɛ. Pɛli vishonɛ ji ruumiyikɔ naa viyaa bawaanɛ nɔgbete a waaba a wuni tɔ̃vɨn,19a sã a sisɨn ãnɛ a vigbete a lɛrinɛni tɔ̃vɨn. Shɔwɔyi i ji wesho ɓa a vigbete i lɛriyɛ tɔ̃vɨn ni ɓa, i ji wesho ɓa a vigbeteyi lɛri ai ãsisɨn tɔ̃vɨn ni ɓa.20Ai tete ikɔyi ɔ̃rɛ Himeniyu a Alezanda, shɔgbete n ãyitɛ a japɛ̃pɛ̃ɛ̃ naa u tasiraa; vim yɛ mati nɔɔ i yaa ruukɔ̃linɛ nwalinɛ a Ɗalapa yuuni.The Word for the World International