1 Tasaloniyayi4

Ɔ̃nɛ Gbete Ɗalapa Ntabiinyatɔ̃nɛ Awuni

1U nyayisinɛ u shɔbiiyi ɔ mati tɛttɔ au bi nɔgbete ɔ ɔ̃ ɔ̃nɛ gbete Ɗalapa ntabiinyatɔ̃nɛ a wuniyɛ. Shom pɛ nizɛ, ji naa gbete ɔ ɔ̃ ɓankɔ. Dɔdɔrim u gakɔɔtɔ u masɔɔbii a Uɓeyelapa Yesɔ nii ɔ pɛlirɛ u tɛɛ shɔmtɔ.2Aruviya aka Uɓeyelapa Yesɔ kaka ɔ zɛ nyakɔsinɛ gbete u kɔsɔɔyɛ tɛttɔ.3Ɗalapa kasinɛ ɔkɔɔ pɛli kpangtannɛ ko fɛ̃ɛ̃, ɔ ɔ̃ wɔsɔ-wɔsɔ kpai.4Ɔ vɔshɔyi kopiya u mati nɔgbete yɛ ɔ̃ ɔ̃nɛ yuu sãnɛ a mɛsoni a nyaba bassinɛ wɔsɔ-wɔsɔ,5ɓa ɔrinɛ kɔ̃linɛ gbete shɔ kasi roonɛ a zɔni ɓa, naa shɔ gbete i ji ãsisɨn ɓa Ɗalapa biini ɓayɛ.6Arumkɔ shɔwɔkɔ pɛli u shɔbii vikɔ̃linɛ nɛ ko ukɔ kuli u shɔbii i nɔnɛ. U gelɔɔ si tɛttɔ, U gɔ̃wɔ yusho a kakani shɔ gbete kɛ pɛlinɛ Uɓeyelapa yɛ tasiyi raatɔ.7Ɗalapa ji ɓaunya ɓa nɛu ɔ̃ a ɓuzɨn kpantang pɛlinɛ ɓa ama kasi nɛu ɔ̃ ɔ̃nɛ wɔsɔ-wɔsɔ.8Aru nankɔ shɔgbeteu kɛ bɛ̃ɛ̃ vimatinɛm nɛ ji bɛ̃ɛ̃ ɓa shɔzɛ ɓɛɛ ɓa ama bɛ̃ɛ̃ pɛ Ɗalapa ɓɛɛ, shɔ gbete ãu Ɗa suruyɛ.9Aru zɔ ɔrinɛ dɔdɔrim ji tɔ̃ɓa u beerɔɔ vi a yuuni ɓa ɔ awɔ yuu Ɗalapa matɔ tɛttɔ nɛ ɔ ɔri zɔtɔ.10Ji nankɔ ɔ ɔri shɔ sisɨn ãnɛyi tɛ kpai a Makidoniyani. Arumi nankɔ u gakɔɔtɔ u shɔbiiyi, ɔ pɛlirɛ u tɛɛ shomtɔ11Ɔ mabii ɔ ɔ̃ ɔ̃nɛ gbete yɛ tasi shɔwɔyi raa ɓayɛ, ɔ kɔjo ɔ vipɛlinɛ sheeli, gbete ɔ kpaa vishaanɛ gbete ɔ shaayɛ, ji nagbete u gelɔɔ siyɛ.12A nyabang kɔ shɔ gbeteyi ãsisɨn ɓayɛ i yɛ basɔɔtɔ, ɔ yɛ debii ɓa shɔwɔ biini ɓa aru vigbete ɔ kasiyɛni ɓa.

Uɓeyelapa Anɛ

13U shɔbiiyi u kasirɛ ɔ zɛ ruu tɔ̃vɨntɔ aru shɔ gbeteyi vɔtɛyɛ, nɔgbete ɔ sisɨn yɛ lɛsi ɓa, ɓa naa shɔgbeteyi sisɨn pɔ̃nɛ ɓayɛ.14U ãsisɨn tɛttɔ nɛ Yesɔ vɔrɛ a yulapa sɔ̃nrɛ a saa, aru nankɔ u ãsisɨntɛ nɛ Yesɔ kɛ sɔɔ kotipi nɛ Ɗalapa yɛ yusi shɔgbeteyi vɔlitɛ ai ãsisɨn au bi u ɗɔbiitɔ.
15Vigbete u matɔɔ dɔdɔrim pɛ Uɓeyelapa vimatinɛː U shɔ gbeteu a suruni dɔdɔrim a lee gbete Uɓeyelapa yɛ sɔɔyɛ, u yɛ yɛɓa a ɗekɨn u yaa shɔgbeteyi vɔlitɛttɔyɛ ɓa.16Pɛ ji Uɓeyelapa au yuu yɛ nɔrɛ a kolapa yɛ ãsinya a kakani, shɔ yɛ nta yupɛ̃ni Ɗajashonɛlapa yeenya, a Ɗalapa gãnti geenɛni. Shɔ gbeteyi vɔliyɛ ai ãsisɨn a Kirisi bii shɔyɛ yusilapa shɔnɛ pɛ ikɔyi a suru ni;17Kɛɗɔn u shɔ gbete u yɛ ɔ̃ a suru ni a ɗauni, u yɛ tolinya a yini a sabu u kpaa Uɓeyelapa a konyasi.18Aru nankɔ ɔ masi zɔ bitɔ a ruumni.

The Word for the World International

https://app.library.bible/content/6fec21b499f7e625