1Koranti14
Vimatinɛ Ayuu Viãnɛ Gbete Ɗa Suru ã Shɔyɛ
1Ɔ mabii jo aru zɔ ɔrinɛ, ɔ pɔ̃ sisɨn a vigbete Ɗasuru ãyɛ i kãnɛ, naa shɔ Ɗalapa nyaruubii tɔ̃vɨn nwanɛ.2Shɔgbeteyi i nwanya shɔzati wɔɔyi yɛ i ji nwa ɓa a shɔwɔyini ɓa ama i nwanya pɛ a Ɗalapa aru shɔwɔɔ ntayi nya shɔzatiu ɓa. I nwanya ruutɔ̃vɨng ɓusinɛ gbete Ɗasuru ãi yɛ.3Ama shɔgbete i nwari shɔ Ɗalapa nyaruubii yɛ, i nwanya a shɔni a pɔ̃siyi naarɛ a bilakinɛni wɔsɔ̃n a sisɨn roorinɛ.4Shɔgbeteyi nwanya ai nya shɔzatiyi yɛ i pɔ̃si naa ɓɛjo ai yuukɔ sheeli, ama shɔgbete i nwari shɔ Ɗanyaruubii i pɔ̃si naa ɓɛjo shɔ Da gɨnnɛyikɔ piti kpai.5N yɛn kasitɔ ɔ nwanya a nya shɔzati piti kpai; ama n kasirɛ ɔ nwari shɔ Ɗalapa nyaruubii, aru shɔgbete nwari shɔ Ɗalapa nyaruubii tɛɛ shɔgbeteyi nwanya shɔzati tot-tot yɛ tɛttɔ. Ama naa shɔu kɛ ɔ̃nɛ a shɔruu dɔɔtanɛni yɛ pɔ̃si shɔ Ɗa gɨnnɛyi naatɔ piti kpai i zɛ ruwu dɔɔ rɛ.6Kɛɗɔn masayi naa nkɛ awɔ ɗɔbi nɛ n nwanya a ɔkɔni a nya shɔzati gbete ɔ nta ɓayɛ n nyanwanɛu yɛ ɔ̃kɛ pikovi tɔ̃vɨn awɔ ɗɔbi ni n tasɔɔ dɔɔ ruu aru vizɛnɛ ko Ɗanyaruubii nwarinɛ ko shɔvi matinɛ a nyaba Ɗa nyaruubiini viya?7Kɛ ɔ̃nɛ aru vigbete i ɓa a suru ni ɓa, naa vɨtaa i yeenya shɛ ɓa waanɛ ɓa, shɔwɔɔ yɛ nta vigbeteyi gee yɛ ko i waa yɛ kɛpiko viya?8Naa shɔji gee vigeenɛ ɓa a kakani ɓa, piya zɛnɔɔ bimanɛ pi aru bawaanɛni piya?9Sɔ̃nji nyabankɔ, shɔ yɛ nta ruugbete ɔkɛ shanɛ a nya shɔzati naa ji shɛ ɓili ɓa kɛpi koviya? Ɔ nya yɛ sãti ɓɛjo ayuu sɔrɔ wezeǃ10Nyakoo aɗɔn a kotipini tot-tot waanɛ, ko-pi shɔgbete piya u vishonɛ aɗɔn.11Naa n ji nta nyakou gbete shɔ nwayɛɓa, shɔgbete i nwa nyau pɛ shɔzatiyi ang ɗɔɔ biini ang yɛ ɔ̃ sɔ̃njo shɔzati ai ɗɔɔ biini.12Jinankɔ awɔ ɗɔbiini, nagbete ɔ zanɛyi si kpaa vi ãnɛ gbete Ɗasuru ãyɛtɔ, ɔ̃rɔɔtɛ kaka jazɨn a kɔrɔɔ se ɔ lakibii ayuu vigbete pẽnɛba ɔyɛ pɛliyɛ piti kpai Ɗalapa nyaruubii uyɛ ɗekɨn yɛ.13Aru nankɔ shɔgbete ai nwanya a nya shɔzatiyɛ, kɛɗɔn ɔ̃riyitɛ kaka jazɨn a kɔrɔ i gaki Ɗatɔ u ãi sẽrẽ ruu dɔɔtanɛ gbete shɔ shayɛ.14Aru n kɛ gaki Ɗa nɛ a nyabankoo, pɛn n suru gaki Ɗarɛ, ama n sisɨn pɔ̃nɛ ɓa ɗɔni ɓa.15Kɛɗɔn n yɛn pɛli kɛpikoviya? N yɛn gaki Ɗa kɛ ang suru, ama n yɛn gaki Ɗa sɔ̃n ang sisɨn; n yɛn ntɔ so Ɗa nii bɛlinɛ ang suru wɔsɔ̃n ang sisɨn.16Naa a ji pɛli ɓa dɔkɔ ɓa, akɛ dɔ̃ri Ɗa nɛ aa surukɔ sheeli, yɛ ɔ̃ kɛ pikovi a shɔgbete i ji zɛvi ɓa i shanɛ, <<Nankɔ,>>ayuu dɔ̃rinɛ gbete a pɛliyɛ, naa i ji nta vigbete a shayɛ ɓa viya?17Aru gbete a dɔ̃ri Ɗalapatɛ waanɛ, ama mɛzɔ̃yi i ji kpaa viwɔ ɓa atete vigbete a shayɛ niɓa.18N dɔ̃ri Ɗalapatɛ waanɛ aru n nwanya shɔzati wɔɔyitɔ tot-tot ntɛ̃ɔrɛ piti kpai.19Ama a shomni piti kpai aɗɔgbete moo shɔ Ɗa gɨnnɛyi toli nya gee Ɗa nya aɗɔnyɛ n nwanya a ruu tot-tot maani gbete iyɛ ntattɔ nɔgbete i yɛ mati shɔwɔɔyi vi i zɛrɛyɛ, ɓa nɛ nwanya a ruu tot-tot waanɛ a nya shɔzati wɔɔyi ɓa.20Masayi ɔ vizɛnɛ kɔ ɔ̃nɛ naa jajja ɓɛɛ; ɔ pɛli nankɔ aɗɔ vikɔ̃linɛ pɛlinɛ naa jajja bɛ̃rɛ̃tiyi, ama aru Ɗalapa gɨnnɛ ɔ pɛli vi naa shɔruu zɛnɛyi.21Shɔ beetetɔ a Musa ãsinɛ nɛ,<<N yɛ shovi a shɔgbete i nwanya a nya shɔzati wɔɔyiN nwanya ang shɔbiiyini, Uɓeyelapa sharɛ.N yɛn nwanya a yini a shɔzatiyi nyakoo,a shɔmi kpai n shɔbiiyi ji wesho ɓa ang nyani ɓa.>>22Kɛɗɔn Ɗa Suru viãnɛ aru nyanwanɛ a nyakoo tot-tot, ɓa shɔgbete i ã sisɨntɛ a Ɗabiini i ɓɛɛ ɓa ama pɛ shɔgbete i ji ãsisɨn ɓa Ɗa biini ɓa i ɓɛɛ, viãnɛ aru Ɗalapa nyaruubii nwanɛ pɛ shɔgbete i ãsisɨntɛ Ɗa bi i ɓɛɛ, ɓa shɔgbete iji ãsisɨn ɓa ɓɛɛ ɓa.23Aru nankɔ naa shɔ Ɗalapa gɨnnɛyi i kɛ toli nyanɛ ko-piya aɗɔgbete nwanya a nyakoo wɔɔ tot-tot, naa shɔgbete i ji zɛvi ɓa ko shɔgbete iji ãsisɨn ɓa Ɗa biini ɓa ikɛ to ɗɔunɛ i sha ɓa nɛ ɔ rirãntɛ ɓaya?24Ama naa ko-piya kɛ nwanyanɛ aru Ɗalapa nyaruubiini aɗagbete shɔ ai ji zɛvi ɓa a shɔgbete i ji ãsisɨn ɓa a Ɗanyaruubiini ɓa ikɛ to ɗɔunɛ,iyɛ zɛ kɛkn nɛi pɛ shɔ ruuvini ayuu ruu vigbete i ntayɛni, kɛɗɔn iyɛ yeeri i yuu ruu kɛkn yuu nɛi pɛ shɔruuvini.25I ruukɔ̃linɛ pɛlinɛ sisɨn yɛ shɛ kɛkn a ɓelin. A nyabankɔ i taa a yugboti a gee Ɗa nyarɛ a shanɛ,<<Nizɛ kɔ Ɗalapa u pɛ awɔ atete ni!>>Nya ãsinɛ a Ɗa wɛrɛ
26Masayi shompɛ nɔgbete viwu ɔ̃yɛ. Aɗagbete ɔkɛ toli nyannɛ aru Ɗa nii ɓɛlinɛ, shɔwɔɔ yɛ u ɔ̃ shɔ so Ɗa nii bɛlinɛ ntaanɛ, shɔwɔɔ u ɔ̃ shɔgbete matinɛ shɔvi aru Ɗalapa nyaruubii, shɔwɔɔ u ɔ̃ shɔgbete tasi shɔ dɔɔ nɔgbete ruwu ɔ̃yɛ, shɔwɔɔ u ɔ̃ shɔgbete yɛ nwanya a nyakoo wɔɔ yɛ, shɔwɔɔ sɔ̃njo shɔgbete tadɔɔ ruuyɛ. Ko iviya ɔ̃tɛ kaka jazɨng a lakɔrɔ u pɔ̃ Ɗalapa nyaruubii u yɛ ɗekɨn.27Naa shɔwɔɔ awɔ tete yɛ nwanya a nyakoo wɔɔ tot-tot, ikɔ tɛɛ shɔzɛ taatinɛ gbete iyɛ nwanya yɛ nɛ, i nwanya jo gbete akɨnti gbete, ɔ̃tɛ kaka jazɨng a lakɔrɔ shɔzɛ gbete awɔ tete u tadɔɔ vigbete i shayɛ.28Ama naa shɔgbete yɛ tadɔɔ ruu ji ɔ̃ ɓa, kɛdɔn kopiya a tolinɛ shɔ Ɗa gɨnnɛwi a ɗɔuyɛ i ɔ̃ shok, i gaki Ɗarɛ ai sisɨn.29Shɔgbete ai nwari shɔ Ɗanyaruubii ziti ko taati i nwanyarɛ, gãsi shɔwiyi se i gaa rɛ i yeeruu ayuu vigbete ai shayɛni.30Ama naa shɔwɔɔ awɔ a ɗɔɔ ɔ̃nɛ atette shɔgbete ai ɗɔuni tɛɛ Ɗanyaruubiitɛ, shɔu au ɗɔ nyanwanɛu u shirɛ shok.31Ɔ piti kpai ɔ zɛnɔɔ shɔ Ɗalapa nyaruubii nwarinɛtɔ gbete gbete, a nɔgete kopiya yɛ mativirɛ u bi u lakirɛ.32Janyagadi suru ukɔ kɔyirɛ i pɛliyi vishonɛrɛ.33Aru Ɗalapa u pɛ Ɗalapa gbete n ti binyatɔ̃nɛ yɛ, ama ɓa gbete n ti yukɔnɛ yɛ ɓa.A Ɗa wɛrɛ aɗɔgbete shɔ gɨnnɛyi i toli nya aɗɔnyɛ,34soroyi ɔ̃ a nyani a ɗɔgbete shɔ Ɗa gɨnnɛ i toli nya a ɗɔnyɛni, aru gbete shɔ ji ãi naa ɓa nɛi nwanyarɛ ɓa, i ɓɛɛ ɓɛjo gɨnnɛ vigbete nyaãsinɛ ãsiyɛ gɨnnɛ sheeli.35I kɛ kasi viwɔ ntanɛ nɛ a vigbete shɔ shayɛ ni, i yɛ hɨ ɓɛjo i ɓɛvɔ a wɛrɛ, pɛ viyusẽ soro u nwanya aɗɔgbete shɔ toli nya shɔ maruu a Ɗa wɛrɛni.36Ɔ tunɛ Ɗalapa nyaruubii gaa ji awɔ bi koya ko aa jo awɔ ruubiikɔ sheeli ya?37Shɔwɔ kɛ tunɛ nɛn pɛ janyagadi ko shɔgbete tunɛ nɛn a vigbete suru ãnyɛ aɗɔn, kɛɗɔn u zɛtɔ nɛ vigbete n beerɔɔmi pɛ Uɓeyelapa nya ãsinɛ.38Shɔgbete ji weshoo ɓa a nyani ãsinɛni ɓa, ɔkɔ weshoo nɛ au nyani.39Kɛɗɔn masayi ɔ ɔ̃ sisɨn Ɗanyaruubii nwanɛni, ama ɔkɔ zãri shɔgbete i nwanya a nyakoo wɔɔyi tot-tot nyanwanɛ nɛ.40Ɔ̃rii kopiyatɛ kaka jazɨng akɔrɔ u pɛli vishonɛ jo tɔ̃vɨn nɔgbete Ɗa yɛ tɛyɛ.
The Word for the World International