Read Luk 1

Luk1bjp_wbt

¹Usuf Tiofilus:Ifuun e fanu ri totof rakrakai isi rin siit papte foron tier ae i tapiek ta na fatpoto kemem.²Fanu ae ri par ta foron tier igii ini kolson matri tina tanwara, ma ri fafas la ini orek ke God, ri fas ta kemem ini foron tier igii.³Pesu, iau tom ia ka tatang rokap tah ke ia ka tafe ta foron tier tikii tina tanwara, ma ia wol le i rokap sabin le ian sisiit usuf o, Tiofilus, wo tara kaltu. Ia siit u tom arae i tapiek tah,⁴isi ok usum le foron tier tikii ae ri fausum ta wo ini, i tekentu.

Angelo i Fas Sakaria le Antu in Fang ti Kalalik

⁵Na aunbiing ae Erot i king na falifu na Iudaia, imel e nenge pris asa e Sakaria, i tina uh na pris ke Abia. Antu, asa e Elisabet, i sabin tina mat ke Aron.⁶Ru turim ru iwun tom tortores na mata God, ma ru misuut la tom na foron orek ke Kumguui ke na foron nagogon kia.⁷Isau le biil ti kalalik kiruh, wara le Elisabet i koros. Ka wok mang ke Sakaria sabin ka tubunkak mang.⁸Nenge biing Sakaria i foim arae pris na mata God, wara le na aunbiing ae, uh na pris ke Sakaria ri tel foim na Felun Tunmapek.⁹Na sinangun foron pris una tim pes se lo ri in kau na Felun Tunmapek, ri fangfang satu ke asa Sakaria ka tapiek. Ma ka kau una palgan Felun Tunmapek ke Kumguui isi ik fasok foron tier ae bau lo i furung rokap.¹⁰Ma na aunbiing mang una fasok foron tier ae bau lo i furung rokap, gur na fanu ri ka famam sising turim awii na maleh na Felun Tunmapek.¹¹Ke nenge angelo ke Kumguui ka tapiek sing i, ma ka soti awii isi mia na salan tunmapek ae ri fasok foron tier ae bau lo i furung rokap la.¹²Aunbiing Sakaria ka par u, ka nananar ma sokeh ka kuruung u.¹³Isau le angelo ae ka tara sing i aragii, “Sakaria! Gong o sokeh. God ka ongen ta sising kiam. Elisabet antum, in fang ti kalalik kiam, ke on foteng u ini Jon.¹⁴On lala laes ke balam in gesges isi, ma fanu fuun rin laes aunbiing in pang,¹⁵wara le in laumet na mata Kumguui. Biil in umin wain la le umin dan rakrakai. Ma in fuun ini Tanwa Kalkaluu aunbiing biil biitom i pang.¹⁶Ma in lame fafis in fuun e fan Israel usuf Kumguui, God kiri.¹⁷In la famu lo Kumguui, ini matngan tanwa ke rakrakai arae Elaija, ke in sokiliis balan foron tamankak isi rik ier isi berberat kiri, ke ik sokiliis wolwol ken foron tom ongen fabulwar isi rik mi na polo na wol ken foron tom tortores. In tel u arae una fageges fanu isi tapiek ke Kumguui.”¹⁸Ke Sakaria ka diik angelo aragii, “Arafa ian usum arae le tier igii in tapiek? Wara le ia ka tubunkak mang ke antung sabin ka wok mang.”¹⁹Ke angelo ka kiliis u aragii, “Ia Gabriel. Ia soti la na mata God, ma i wuun iau isi ian fas wo ini rokap na fafas igii.²⁰Ongen u, igii in kut e ngusum ma biil ifasi on orek papang na biing tier igii in suut, wara le biil o unune na foron orek kiak, ae in tapiek na aunbiing tom lo.”²¹Na aunbiing ae, fanu ri ka nene pane Sakaria, ri ka wol pane le, isi sani ka muduung awii na Felun Tunmapek.²²Aunbiing ka suu fis tina Felun Tunmapek, biil mang ifasi in orek. Ri ka usum ta le i par nenge parpar awii na Felun Tunmapek, wara le i famam fakileng sau ini lima usuf ri, ma ngusu i kut ta tom.²³Ma aunbiing ka farop foim kia, ka fis una maleh kia.²⁴Nami sau, antu Sakaria, Elisabet, ka tian ma na ilim e funiil biil i suu tina fel.²⁵Ke ka tarah, “Tier igii Kumguui tom i tel u usuf iau. Ia koros tah, ma na foron biing igii, Kumguui ka mais iau ke ka tel ufu matlawen kiak na matan fanu.”

Angelo i Fas Maria le in Fang Iesu

²⁶Na fawon u e funiil ke Elisabet, God ka wuun angelo asa e Gabriel una Nasaret na falifu na Galili.²⁷Ka wuun ufu usuf nenge tah ae biil biitom i borong turan ti kaltu, asa e Maria. Ri fakale ta u isi in telpes nenge kaltu asa e Josep, tina mat ke king Dewit.²⁸Ke angelo ka tapiek sing i, ma ka tarah, “Tinier, on laes. Kumguui i kating kanaka wo ma i kiis turam.”²⁹Aunbiing Maria i ongen foron orek kia, ka lala purngis e bala ma ka wolpane le, sani e kamtina.³⁰Isau le angelo ka tara sing i aragii, “Maria, gong o sokeh. God i laes kanaka ini wo.³¹Ongen u. On tian ke ok fang nenge kalalik tamat, ke ok foteng u ini Iesu.³²Asa in laumet, ma rin foteng u ini kalalik ke God Buuii kanaka na Mawe. Ma Kumguui God in luun u na nian kiiskiis an king ke Dewit tama.³³In nagogon fitliu na mat ke Jekop ma matanfuntih kia biil in to rop.”³⁴Maria ka diik angelo ae aragii, “Arafa in tapiek arae e tier igii, wara le biil biitom ia borong ta turan ti kaltu?”³⁵Ke angelo ka kiliis u aragii, “Tanwa Kalkaluu in susuef ulo wo, ke rakrakai ke God Buuii kanaka na Mawe ik kumef o. Ke ier ae on fang u, in kalkaluu ma rin foteng u le Kalalik ke God.³⁶Par u, sikinting lo wo, Elisabet, ka wok mang. Ri tara la sing i le i koros, isau le igii ka tian mang, ma ka won ta e funiil kia.³⁷Wara le biil ti tier ae God biil ifasi in tel u.”³⁸Maria ka kiliis u aragii, “Ia fafauun ke Kumguui. I rokap, ik tapiek arae lo iau, arae tom o ka use ta u.” Ke angelo ae ka la koseng u.

Maria i Laum Elisabet

³⁹Na aunbiing ae, Maria ka aptih ma ka sangar una nenge maleh na foron pungpung na falifu na Iudaia.⁴⁰Aiwa, ka kau una fel ke Sakaria ma ka faorek pes Elisabet.⁴¹Aunbiing Elisabet i ongen Maria i faorek pes u, kalalik ae na bala ka miliu ke Elisabet ka fuun ini Tanwa Kalkaluu.⁴²Ke ka perek aragii, “O kalok lon kelefin tikii, ke kalalik sabin ae on fang u i kalok.⁴³Isau le ia matngan fifin arafa tom ae tina Kumguui kiak ka tapiek sing iau?⁴⁴Aunbiing sau ia ongen o faorek pes iau, kalalik igii na balang ka miliu ini laes.⁴⁵O kalok, wara o unune le sani Kumguui i use ta u usuf o, in suut.”

Seksek ke Maria

⁴⁶Ke Maria ka tarah,“Balang i usefages Kumguui,⁴⁷ke tanwang ka laes ini God,Tom Fafaliu kiak,⁴⁸wara i mais iau le,ia nenge fafauun foes sau kia.Tipesu igii, foron ulul tikii rin use u le ia kalok,⁴⁹wara le, God ae i Rakrakai,ka tel ta foron tier laumet usuf iau,ma asa i kalkaluu.⁵⁰Ma famais kia i la usuf fanu ae ri bulat la lo,tina foron ulul tinpakanini, una foron ulul ae namih.⁵¹Ka tel ta foron rakrakai na foim ini lima:Ka tel sarara ta fanu ae wolwol kiri ifuun ini sinangun got.⁵²Ka fapu ta foron tom nagogon tina foron nian kiiskiis kiri,ma ka falaumet fanu ae ri fapuh ri la tom.⁵³Ka fen ta fanu ae ri fitol ini foron rokap na tier,isau le ka wuun ufu ta fanu ae ifuun e minsik kiri ini pungun limri.⁵⁴Ka lupes ta Israel,tom foim kia,wara le i wolpes Abaramturan berberat kiafitliu ini famais,arae tom ka use ta u singforon tubutamat kerer.”⁵⁶Maria ka melmel tura Elisabet pes ituul e funiil, ke nami ka fis una maleh kia.

Elisabet i Fang Jon Tom tel Bapitaiso

⁵⁷Ka aunbiing mang ke Elisabet una fafang, ka fang nenge kalalik tamat.⁵⁸Fanu ae ri mel fatat u turan foron sikinting lo, ri ka ongen u le Kumguui ka finngas tara famais kia usuf Elisabet, ke ri ka laes turim tura.⁵⁹Na fawal u e biing ken kalalik, ri ka geges isi rin kiit pununfo, ke ri ka ier isi fafenngo ini Sakaria, tama.⁶⁰Isau le tina ka tarah, “Biil. Rin foteng u ini Jon.”⁶¹Ri ka tara sing i aragii, “Biil ti sikinting lo wo i kep ta u e as ae.”⁶²Ke ri ka fapik tama, isi as sa tom i ier le rin luun u lon kalalik.⁶³Sakaria ka tutus isi ti tier in sisiit lo, ke ka siit u le, “Asa e Jon.” Ma fanu tikii ae ri ka lala bitit.⁶⁴Fanpil ngusu ka sapeng, kerme ka malmalos, ke ka tipes orek, ma ka usefages God.⁶⁵Ke fanu tikii ae ri mel fatat ri, ri ka fuun ini sokeh. Ma ususe na foron tier igii ka sarara na foron maleh ae na foron pungpung na falifu na Iudaia.⁶⁶Fanu tikii ae ri ongen u, ri ka lala wol lo, ma ri ka diik aragii, “Kalalik igii in tapiek matngan kalalik arafah?” Wara le lima Kumguui ae lo.

Seksek ke Sakaria

⁶⁷Tanwa Kalkaluu i susuef ulo Sakaria, tama Jon, ke ka orek profet aragii,⁶⁸“Ususefages usuf Kumguui,God ken fan Israel,wara le ka tapiek ta usuf fanu kia,ma ka fiil fasengsegeng ri.⁶⁹Ka fapti ta nenge rakrakai na Tom Fafaliu usuf kerer,tina mat ke Dewit, tom foim kia,⁷⁰arae tom i use ta u na ngusun foron profet kalkaluu kia tinpakanini.⁷¹Ke in faliu kerer koseng foron tuui kirer,ke tina liman fanu tikii ae ri ememse kerer.⁷²I tel u arae una finngas famais kiausuf foron tubutamat kerer,ke isi ik fasuut puput kalkaluu kia,⁷³ae i falimlim ta iniusuf Abaram tubutamat kerer,⁷⁴le in faliu kerer tina liman foron tuui kirer,isi kerek foim sing i ma biil keren sokeh,⁷⁵ini sinang ae i kalkaluuke i tortores na matana foron biing tikii ae kere liu lo.

⁷⁶Ma wo, keng kalalik,rin foteng o le, o profet ke God Buuii kanaka na Mawe,wara le on la famu lo Kumguui,ma ok fageges sal sala,⁷⁷isi famalal fanu kia le God in faliu ri,aunbiing i pa ufu foron sinang laulau kiri,⁷⁸wara na tara famais ke God kirer.Pesu, malal tina kukulii in susupiek ulo kerer,arae pisiih i susupiek na biingbiing.⁷⁹In popos ulon fanu ae ri kiis na kubunor,ke ulon fanu ae malmaluu na minet i afit ri,ke ik lame kerer na sal ae i siaroh.”

⁸⁰Ke kalalik ae ka laulaumet la, ma ka lala rakrakai na tanwa. Ka mel na falifu foes papang na aunbiing ka tapiek malal usuf fan Israel.