1Foron tualikmemtuul, biil kemtuulen sisiit sabin isi fas gam ini aunbiing, le biing sah, Kumguui in fis lo.2Wara gam usum rokap tom le, paipaifis ke Kumguui in tapiek arae tom sisii i la isi suksukuum na wor.3Aunbiing fanu ri ususe u la le, “Biil keme tafe ti tatawin. Kere liu ini siaroh sau.” Ke fanpil tara tatawin ik tapiek lo ri, arae fangungut ae nenge fifin i kalsakai u aunbiing fatat in fafang. Biil ifasi rin alfe u e tatawin ae.4Isau le gam, foron tualikmemtuul, biil gam kiis na kubunor isi biing ae ik fabitit gam arae nenge tom sisii, biil.5Gam berberat tina malal ke tina kiptin ien. Kere biil tina wor le tina kubunor, biil.6Pesu, gong kere arae fanu ae ri masun. Keren mat ma ik poh e wolwol kirer.7Wara le, foron tom masmasunmet, ri masun la na wor ke foron tom ininmet, ri yin la na wor.8Isau le, kere fanu tina ien, i rokap le wolwol kirer in malal. Keren kilkiliis ini unune ke famais arae nenge dangan aen una tel kale matan mangia kerer. Ma keren luukluuk ini unune le God in faliu kerer.9Wara le, God biil i tim pes ta kerer isi keren kalsakai fangungut na ngaliaf kia, biil. I tim pes ta kerer isi keren kep fafaliu sing Kumguui kirer, Iesu Karisito.10I met ta isi kerer, isi keren liu turim tura, taftawa le kere liu le kere met, keren liu tom tura.11Pesu, gamen farakrakai faliu gam ke gamek fakuum faliu unune kimi, arae tom gam tel u la.
Farfarop na Orek
12Foron tualikmemtuul, kemtuul sising gam isi gamen bulat lon fanu ae ri foim rakrakai na fatpoto gam arae foron famfamu kimi na foim ke Kumguui ma ri fausum gam la.13Gamen lala bulat lo ri ini famais, wara na foim kiri. Ke gamen liu ini siaroh faliu ini gam.14Foron tualikmemtuul, kemtuul sising gam isi gamen fanau foron tom angos, gamek farakrakai foron tom matmatlawen, gamek lupes fanse ae unune kiri biil i rakrakai ma gamek fofo ini fanu tikii.15Gamen tumarang, isi gong tikas lo gam i kiliis laulau ini laulau. Isau le, fitliu gamen rakrakai isi tel sinang ae i rokap usuf temtem tikii lo gam ke usuf fal sabin.16Gamen laes la masau.17Ke gamen sising mulmul.18Gamen fotrokap usuf God na foron tier tikii ae i tapiek sing gam, wara le God i ier le gam ae ke Karisito Iesu, gamen tel u arae.19Gong gam pusmete yiif ken Tanwa Kalkaluu.20Gong gam ire foron orek profet.21Isau le, gamen tof ri tikii ke gamek pose papte sani ae i rokap.22Alfe marmarsan sinang laulau tikii.23Kemtuul sising le God tom ae i ta siaroh la, in fakalkaluu gam isi gamek kalkaluu sikit. Kemtuul sising sabin le God in fofonoi na tanwa gam, na wolwol kimi ke na pununfo gam isi biil in mel e tuk lo gam na biingen paipaifis ke Kumguui kirer, Iesu Karisito.24God ae i tawi pes ta gam, in tel u arae, wara le i fasuut orek kia la tom.25Foron tualikmemtuul, gamen sising isi kemtuul.26Aunbiing gam fatafe, gamen fador faliu ini gam ini sinang ae i kalkaluu.27Ia piispiis gam na asa Kumguui le gamen wes leta igii usuf foron tualikrer tikii.28Famais ke Kumguui kirer, Iesu Karisito in kiis tura gam.