JOSUA5
1Ol king* blong ol laen blong Amoro* bifo, long saed blong Jodan Reva long wes, mo ol king blong ol laen blong Kenan* bifo we oli stap klosap long Mediterenian Si oli fraet nogud long Josua olgeta. Mo taem olgeta oli harem nius we Hae God i mekem Jodan Reva i drae i stap, gogo olgeta ya oli kamkros long hem, tingting blong olgeta i foldaon olgeta.2Long taem ya, Hae God i talem long Josua se, “Josua. Yu mekem ol naef long ston ya flin,* mo yu mekem we olgeta man evriwan we oli laen* blong Isrel* oli sakomsaes.*”3Nao hem i mekem ol naef olsem, mo long hil ya we tede nem blong hem Gibeat Haharalot, we i min se “Hil blong mekem sakomsaes”, hem i mekem we olgeta man ya evriwan oli sakomsaes.4Stamba blong bisnes ya i olsem. Bifo, long taem ya we olgeta oli aot long Ijip, ol pikinini blong olgeta oli sakomsaes finis. Be long foti yia ya we oli stap long draeples, olgeta we oli bon long taem ya oli no sakomsaes yet. Mo olgeta ya we oli bigman finis taem oli aot long Ijip, we oli naf blong go long faet, olgeta ya oli ded evriwan. Olgeta ya oli no bin obei long Hae God, nao hem i bin mekem wan strong promes* long olgeta, se bambae oli no save go kasem gudfala graon ya we i gat ol gudgudfala samting long hem, we hem i promes finis long ol olfala blong yumi bifo blong givim long yumi.7Ol pikinini blong olgeta ya oli no sakomsaes yet, mo olgeta ya nao we Josua i mekem sakomsaes long olgeta.8Nao taem oli mekem sakomsaes long olgeta ya finis, olgeta evriwan oli stap wet long ples ya, gogo kasem taem we olgeta ya oli kam gud bakegen.9Nao Hae God i talem long Josua se, “Tede, mi mi tekemaot olgeta sem ya we yufala i gat from we yufala i slef* blong ol man Ijip bifo.” From samting ya, oli putum nem blong ples ya se Gilgal, we i min se “Tekemaot”, mo nem ya i stap yet kasem tede.10Nao long namba fotin dei blong manis* ya, olgeta oli stap yet long Gilgal, long levelples ya klosap long Jeriko, mo long sapa, oli mekem Lafet* ya blong Pasova.*11Mo long nekis dei blong hem, oli kakae ol bale* we oli rusum, wetem ol bred* we i no gat is long hem, mo hemia i fastaem blong olgeta blong oli kakae ol kakae ya we i stap gru long kantri ya.12Mo long taem ya, kakae ya mana* we i stap folfoldaon i kam long heven, hem i no moa folfoldaon, nao olgeta oli no moa kasem kakae ya bakegen. I stat long taem ya, oli stap kakae ol kakae ya nomo we i stap gru long kantri ya.13Nao wan dei, taem we Josua i stap wokbaot klosap long Jeriko, hem i sek long wan man we i kamtru, i stanap stret long fes blong hem. Man ya i stap holem wan naef blong faet, nao Josua i go klosap long hem, i askem long hem se, “?Yu yu wan long mifala, no yu wan enemi blong mifala?”14Be man ya i talem se, “No, mi mi komanda blong ol soldia blong Hae God, taswe mi kam.” Taem Josua i harem olsem, hem i bodaon long man ya we fes blong hem i godaon long graon, i mekem wosip long hem, mo i talem long hem se, “Masta, mi mi man blong wok blong yu nomo. ?Yu wantem we bambae mi mekem olsem wanem?”15Nao komanda ya i talem long hem se, “Yu tekemaot sandel blong yu. Graon ya we yu yu stanap long hem, hem i tabu.” Nao Josua i mekem olsem we man ya i talem.
Bible Society of the South Pacific