FAS KRONIKEL20
1Nao long nekis yia blong hem, long manis ya we kolkol mo ren i finis, mo i no moa gat plante wok long garen, we ol king oli luk se i gudfala taem blong go mekem faet, King Deved i stap nomo long Jerusalem,* be Joab i lidim ol soldia blong hem oli go long kantri ya Amon. Olgeta oli go raonem taon ya Raba, nao oli mekem faet long hem, we oli spolemgud.2Ol man Amon ya, oli gat god blong olgeta we nem blong hem Milkom, mo long taon ya, i gat pija blong hem i stap we olgeta oli wokem long ston. Long hed blong hem, i gat wan hat blong king i stap we oli wokem long gol mo oli flasem long wan gudfala flas ston, mo taem olgeta oli skelem hat ya, oli faenemaot we hevi blong hem i samwe long toti fo kilo. Nao king i tekemaot hat ya, i putum long hed blong hem, mo hem i tekemaot plante narafala samting tu long taon ya.3Mo hem i tekem ol man blong taon ya, i mekem olgeta oli stap wok blong hem, we sam oli yusum so, mo sam oli yusum hou mo akis we i beswan. Mo hem i mekem sem fasin tu long ol man blong ol narafala taon ya long Amon. Nao biaen, hem wetem ol man blong hem oli kambak long Jerusalem.4Nao biaen ol laen* blong Isrel* oli go faet bakegen long ol man Filistia long taon ya Gesa. Mo long taem ya, i gat wan man Husa we nem blong hem Sibekae, we i kilim wan lariken man blong ol man Filistia i ded, we nem blong hem Sipae, nao ol laen blong Isrel oli winim olgeta.5Mo biaen bakegen, oli go faet long ol man Filistia, nao Elanan, we papa blong hem Jaere, hem i faet long Lami, we i brata blong man Gat ya Golaeat, nao i kilim hem i ded. Man ya, handel blong spia blong hem i bigwan olsem rafta blong haos.6Mo biaen bakegen, oli go faet long olgeta long taon ya Gat. Long ples ya, i gat wan lariken man blong olgeta, we i kamaot biaen long ol lariken man blong bifo, we hem i gat twelef fingga long han blong hem, sikis long wan, sikis long wan, mo i gat twelef fingga tu long leg blong hem, sikis long wan, sikis long wan.7Man ya i singaot i kam long ol laen blong Isrel blong wan long olgeta i go faet long hem, nao Jonatan, we papa blong hem Sama ya we i brata blong King Deved, hem i go kilim man ya i ded.8Trifala lariken man ya oli kamaot biaen long ol lariken man blong Gat bifo, mo King Deved wetem ol man blong hem oli kilim trifala i ded.
Bible Society of the South Pacific