Wos Ananun7
1Romawa yedi, wakifepen pyum kaku wawos ayena ma befnder awer asyoser yavuk kwar faro au.2Waso pyum wos ananun ayena, insa wakenem kawan kuker aski. Wasopyum kaku farkarkor ayena raris mov mamwarek pyum mkamor besuyara i.3Waswarepen vesyakwar farkarkor ayanna, ma warduna ro snembrido.4Nwa firnanemya ve naek ma fawawiya ve bati bedi.5Firnanemya nari dun au fa wandebur vin veknonbasya, ro vin evesewar kuker wos vemarnden.
Vin vekakuva
6Ras oso yakiki ro kovkir vero rum ayedi.7Fafis anya yamam romawa snonkbor vemarkboisya; mkasi syo-epenkaku faro romawa snonkbor vefawinanemba oso ro fandu si.8Fyor mandira murvav fafisu pampanya dunkwar, snonkbor anya imbran isof fyanam nyan vrapur veso yov mov vin oso vyarek roya.10Vin anya vin veknon pyum ro rum risyava. Kero isya ro nyan andir, posa wer ido isya ro buves, fyor fyornoido dores iwaf ro nyan farsamna. Vin ani fyarmku ma ifawi imaiva. Yamam syaye kuker sansun imnis vin vevov vinkun, ma isrow kuker snonkbor anya kuker swaruser vevyeva vyena.13Vin anya dawrepen snonkbor ani ma isyumi. Ifawi imaiva ma ikofen,14“Ras ine yavuk farsarserkwar faro Allah I infa vyak ap ayedi, ma aiwan farsarser ansya kraf vedawersya sisyakaker.15Evewar yasasyar fa yasewar au, insa wanan ro rum ayedi. Fafis ine yasrow au kwar!16Kamboi anenef ayedi yakawef i kwar kuker kruven vefarawriwek veraker Mesir,17ma yasepeki kuker maniy vespum ro rokaker vediref pyum.Rokaker vediref pyum18Kurine, rwama kurafnak ma kuyenef kayam ro rov mankwan ine.19Swa ayedi isyaro rumba, isyaro marandan vevinkwan kaku.20Dun kumpansya sibor kaku, ma nari ibur ro paekya faduri.”21Rarirya vin ani dembuk snonkbor ani kuker wos vemarnden; wos anna nposer snewar isof snonkbor ani isoyuser i.22Kyara resariva vo iso monda vin ani imnis sapi sfes sasukor vo sun ra sive skaruk. Imnis snonkaku vefawi nanemba sfesepen vo sun fa ismai mamun sfasoskwar;23kero monda ikoiya myun pansar sneri. Imnisra man verov yov denem, rarirya snonkbor anya ifawiva rur vyedi isyaro marindi.24Rarirya, romawa yenamko, mkomnaf ve aya. Mkomamepen wos ananun ayenane.25Buk swaf awer ve vin vera diryanya fa ifrowes au; rwa swewar awer i,26snar ifrurfa snonsya sibor kenem sena nemompraf. Snon ifrowes fa vemarsya skor napoksiva.27Rwave rum vyedi imnis waso nyan veknampu vesoyov marmari.The Seed Company