Wos Ananun30
Wawos Agur vyena
1Ine irya wawos vefo firnanem ro Agur, Yake romawa vyedi:Ikofen radine: “Yamor rape, sye Allah,yamor kaku! Samambrav ayena navro!2Snar ayaine yafawi nanemba syadi snonkaku vesesya,swarnanem snonkaku naisya ro ayava.3Firnanemya yafarkori vaveri,yafawi royovaveri vekur Allah Vesren Venapes.4Snonkaku mundiri veyek ve nanki ramnai vedo kaver?Mundiri vekifepen wamya ro vrasi?Mundiri vekpan epen vedokya kuker kruven?Mundiri verirepen supswan ine was vyena?Inido snoriso, ma romawa vyedi snoriso?Auma na wafawi!”5Allah svayo vyenakam navye nanapes.Vye adai mamun faro snonkaku vefadiren ro I.6Wawos pam awer rosai Ikofen na,insa Isonek awer au ma Myam au ve vekofen rokakuva.7Sye Allah, yor yov Au,rofyor yamar vaim, Buk ve aya roi ri suru, susoine:8Pampum ro vandi bur aya frur vekarfiva ma wos ankarkar.Buk fa yasavarar awer rovaido yanana awer.Buk ve aya rosai yave fandun na monda.9Insa, rofyor yarbor ido yafamyun awer Auma yafuken sei: Manseren Allah inido?Rovaido, rofyor yasavarar ido nari yakarau,isof yafrur anonef Allah yedi snosnon vyedi.10Wakofen awer wos vekakuva vekur manfyan oso faro amber vyedi,insa ifras awer au ma kyor au ve vesasar.11Snonkaku ono sifras kma sesyama se vok sna sesyava.12Snonkaku ono kako skara vo sovo sisren,orovavoi smamas kaku.13Snonkaku ono skara vo sovo sikada sipyum syadima snonkaku evesesya sefaindava.14Snonkaku ono sisya sinambri ma skarfiva simnis aiwan verafdi ma sinas nasar,ma sifrirepen snonkaku vesavarar ma veryarvasya ra sirisem rofandu snonkakusya.15Wepoiya nya inai ri suru;suna snonsnon oser isoine “Ayenairi”!Roi ri fyak i vesyopenba isoine:16Mun aivuiya ma vin vepasnasem vesararan romawa,saprop eve fandun mekem vesyakwar ma for vesber kakek ve mov nakam.17Romawa vefankoryaye kmariorovaido snari eve mansar insar kwar,vye vesawen ve bondi insamanwawasya sisos mkamor vyesi ma mankankansya san baken vyedi.18Roi ri fyak vesamswen kaku yafawi mnisva:19mankankan verov ro farsyos,ikak ve saves ro bo karui wonon,karures veyayun ro soren bro,ma romawa inai babo veswar yayesu.Mankankan20Ine irya rari vin vefarvuk eve sonei:dan raposa isvuyar svari ma ikofen: “Ayama yafrur royova!”21Roi ri fyak vefrur kanandor snonkaku ro supswan ine:22Manfamyan vesmai nasan wairek,snonkaku venawnower vesmananem roi vebor vye fandun na,23vinfyan oso snonkakusya simariseniba, vesyavo varpurya fyarvuk,vinfyan vefasyar kankon vin amber vyedi.24Ro supswan ine aiwan rifyak vebava syadi sisya,imbape sifawi nanem kaku:25Anirsya, aiwan kasun veryarva sirya,imbape sfasos anan sena ro fafis supya idares.26Rambav sop , aiwan veryarva,imbape vefrur nas vyedi ro urek kapis veve kerui.Rambav sop27Mankampam, aiwan vena manfarkinva,imbape sve maran oser.28Kanfnar aiwan sfor kako kuker vramin,imbape isya kako ro waireksya aidoran sena.29Roi rifyak vefrur kamanen rofyor komam mov simbran raya, isoine:30Singa, aiwan vesambrav kaku imkak faro royova veri;31kambing snoman ma mankoko snoman vembran ararer,wairek vembran ro varpon rak mamun vyesi.32Inja snar fawi nanemba ma kuker marares bena kwara fa wafrur roi vevyeva,waswarepen!33Snar fafisu wun srai masya fa rwawri ra myawai ma wakafos inido, nari wasmai papraf vyedi.Rofyor waprer snonkakuyo ro snonisi, nari snonisi irike.Rofyor wasurvawes dormomen, irya wafnai vedar mbrise.
The Seed Company