Wos Ananun27
1Warer awer mankundaw snar ras meser iyamyase,snar wafawi mnis rosai nari vekur au ro ras anyava.2Ivye snonkaku vesesi veyararer au,isyadadi kaku snonkaku wafawivasya.3Karuiya myarvak ma karyenya kako myarvak,imboi sneduf snonkaku vefawi rorovaya ifrurya myarvak syadi.4Masasorya ivyeva kaku ma vyedar vave momprafya,mamfadadirya ivyeva syadi.5Wos sansonek fababaipyum syadi ro syowi eve fasasis.6Manivovya iprer kuker saswar,imbape mbrovya dawrepen kuker swaruser vevyeva.7Snonkaku veyarborya, umber syano fyamnersi;mboi ibiser ido, roi vesarmar na nanpyum.8Snonkaku vebur rum byeja,imnis man vebur narem byedi.9Raris mani vespum ma vediref pyum nafrur marisen snewar,rarirya kako manivovya frur pyum vyena nafrur sneprei.10Befnder awer manivov bedi rova manivov kmam vyedi.Fafisu ausya ro ananjar wor awer fanfnovek ro naek bedi;snonkaku vekenem fanam au sve fandun syadiro naek vevinkwanya.11Romawa yedi, ivye kada firnanemya isya ro au, wafrur fa sneri iryavinsa yavuk kankarem faro snonkaku veyawos ninyan ayansya.12Snonkaku veswar nanem ikandenbur rofyor myam roi nari veyun marmar;snonkaku vefawi nanemba imbran pdef rao ismai vavyevaya.13Mundiri vekara fa vevak pyan nyaki snonkaku vese,ivye nana vyena neveyun fa ne vekram isof vyak ap vyedi.14Mundiri vekofen arwo vevye faro manivov vyedi kuker mkarem veba fafis arwo prim kaku,skara ive snonkaku veyor fras.15Vin vekain rakrokimnis war vepaporem ro rum rido vemananaiva ro fafisu imyun.16Ivor kyain fasis rari,imnis wam kodwarek napokvama mani koserepen ro vrabamba.17Imnis mankarmomenya iyas mankarmomen,rarirya kako snonkakusya sfarkor ro min sesi.18Mansei vefaduru ai knam, nari dan bon vyena.Manfamyan vewaren pyum amber vyedi nari ismai syowi.Aiknam vevebon19Imnis varpon bedi syonin ro war veknon,rarirya kako snembri fyasnai vadir mankundau.20Raris mun aivuiya doren snonkaku vemarsyano isyopenba;rarirya kako fandun snonkaku napok namananaiva.21Brawen ma sarak sikunsi ro for fa sijaren insa sisren;snonkakuyo smambir i ro rari vyedi fyor ismai ararer.22Snonkaku vefawi nanembaya siprer marvak kaku i,imbape fawawiva vyeja ipok imyomenba.23Mambavir pyum kaku kambing domba besya,faduru pyum rofanfan besi.24snar kayan na nari nkain fyorova.Rarirya kako wower snoporya nari kyain fyoro-fyorova.25Avris ro maper ma vero urek se vekaruk ma siryursi faro rofanfan besi,mbape fafisu anya kako avris babo sisur wer.26Wasmai sansun ro domba bansya bur sesya,ma kumpan wasmai ro kambing bov ansya buki skoves saprop vebabo.27Ro kambing bansya vedawersya wasmai sus dur faro mankundau ma kina bedi,kako faro mamfamyan infamyan besi.
The Seed Company