Sarmur Randak8
Favruvya imyomek
1Allah iswarepen Nuh i ma aiwan vebor vefarso fnovek i ro wai veba anya dori. Allah Vyuk wamya fa ikbun, isof warya imyomek fawase.2War mkamor vebor vero sapropya dori ma vero mandep iyaswa Isisen nakam. Mekemya imnai,3ma warya imyomek pdef. Ras usin oser samfur di rim nawas ido warya ikaki werva.4Ro ras eve samfur seser ri fik ro paik eve fikya, wai veba anya ider ro bonpir oso ro bonvepampyam Ararat.5Warya imyomek pdef ma ras randak ro paek eve samfurya bonpir na navyak.6Ras samfur ri fyak nawas ido, Nuh syeven varare oso vero wai anya,7ma ryir manwawa oser fa irov. Man anya kyaver ve wai veba anyava imboi irov pdef mura muma isof warya imyomek ra ivro.8Swafo wer ido, Nuh ryir mandunya fa irov fa myam karapan warya imyomek kwar ke rovaim.9Imbape snar warya ikawef kaker sapropya bori, mandun anya ismai movo fa irwai ra kyain rova. Mura irov kaver ve wai veba anya; Nuh iser i ma dun kaver i ve wai veba anya dori.10Nuh iwaf ras ri fik wer, posa ryir mandun anya fa irov wer.11Fafisu oriwai mandun anya kyaver ma darek epen saitun kakyeiya. Inja Nuh ifawi warya imyomek kwar.12Iwaf ras ri fik wer ido, ryir mandun anya fa irov wer; ro rarwan ine mandun anya kyaver ve i werva.13Fafisu Nuh ikenem vye pasivarek usin ri wonem seser oser, ro ras randak ma paek randakya, warya imyomek ra ivro fafewa. Nuh syeven sosef vero wai veba anya, ma myam be vandivar. Myam ido saprop anya bori isyor kwar.14Ro ras eve samfur di suru seser di fik ro paek eve suruya, supya bori isyor kwar.15Insape Allah Ikofen ve Nuh i,16“Wasasyar bur wai veba iya kuker swambri, romawa bansya kuker swa sesi.17Wasasyar kako man vebor ma aiwan vesesya, veba ma kasun, insa sikapar siryewen ma sfamakmok supswan ine.”18Mura Nuh isasyar bur wai veba anya kuker swari, romawa vyansi ma swa sesi.19Man vebor ma aiwan vero vande sisasyar kako bur wai veba anya sfarkyam syos oser-oser.Nuh vyuk farsaser
20Nuh vyawes apen farsarser oso faro Manseren I. Dun oser-oser ro Man ma Aiwan vese venapes sya, insape ikun si ve farsarser ro apen farsarser anya bori.Apen farsarser21Diref vemarfir ro farsarser anna nafrur marisen Manseren Allah I, mura Ikofen ro sneri, “Nari Yafras supswan ine werva; snonkaku sya kakara ma frur sena navyeva fyor sibavaya mumyas, rariryano nari yapyos snonkaku ma roi vebor bekenem ro supswan ine bori wer va raris rosai Yafrur kwar ine.22Fyor supswan ine isya kaker, fafisu naisya, isoine fafisu amom kaker ma fafisu aninek, fafisu supya iprim ma fafisu supya isam, fafisu dares ma fafisu imayanyun, isnai ma rov.”The Seed Company