Sarmur Randak43
Yusuf naek vyesi kuker Benyamin i srave Mesir
1Basbiser vemun anya imsinba ro sup Kanaan, fafisu Yakub kina vyansya san pres pokem sun ro Mesir ansya ra sivro, mura Yakub ikofen faro romawa vyansya, “Mkora mura wer ve Mesir fa mkokoves pokem no veko.”3Mura Yehuda ikofen faro i, “Faker wairek Mesir dawos pakrek kaku ve inko vo dove nkun vedar kasun nkovanya va ido nkopok fa nkores ro varpon vyejava.4Kamam wamarisen fa vedar kasun nkovanya iso ido, nari nkora nkokoves rovean no.5Imboi kamam wamarisen fa Benyamin iso nkova ido, na nkorava, snar faker wairek Mesir anya ikofen vo dove vedar kasun nkovanya isova ido nkopok nkores ro varpon vyeja vaveri.”6Yakub ikofen, “Mkofrur fa saneri ipreiva, snar mkovadir faro i vo mkove mkona vedar kasun yandi.”7Skokarem faro i, “Snonkaku anya ifuken nko vesyakwar ma kako kina kovanine, dove, ‘Sinan kma mkoveja ikenem kaker? Mkona vedar kasuno?’ Inja nkokarem fakfuken vyenakam. Nkofawiva nari iwan fa nkun vedar kasun nkovanya.”8Mura Yehuda ikofen faro kmari, “Wamarisen fa romawa anya iso, insa nkora mura fasau imbude komindi imar snar basbiser ine ndi.9Ayaiso nari vemam warek i ma eve sano warek i, imboi yun kaver i kuker payamyumba ido kamam buk sasar ve aya ma yavar sasar ine ro ras kenem yedi kasiper.10Rarirya kove yaryerva rirya kada, nari nkora mura rarwan ri suru kwar.”11Mura sinan kma skovanya ikofen, “Imbo rarirya ido, mkun nana vepyum kaku ro sup ine, mkoserna ro inoken mkovanna fa ne faferes faro faker wairek Mesir ani: Kesi, roveinem, rampa-rampa ma aibon kemiri ma aibon kenari.12Mkun kako kumpan sya apaper ri suru, snar kumpan mkosrow ro inoken mkovannasya ivye mkokaver si. Imbude srir sasar si ndi.13Mkun veknik mkovanya vo mkokaver fasau.14Ivye kada Allah Vepoik Syadi vyuk fa faker wairek Mesir aniwa sneri so mko ma kyaver Benyamin ma Simeon su. Imboi faro aya, rofyor romawa ayansya ive sidawer bur aya ido, rosai ive yafrurya?”15Posa Yusuf naek vyansya sun faferes anna ma kumpan apaper ri suru vo sra ve Mesir kuker Benyamin i. Skora ro Mesir kwar ido insape skorafa skores ro varpon Yusuf i.16Fafisu Yusuf myam Benyamin i ma naek veba vyansya mura ikofen faro manfamyan eve vukor ro rum vyani, “Wun snonkaku sine ve rum ayedi. Nari sanan so aya ro mun orikok ine, inja kwaruk rofanfan osero ramnai wakun i.”17Manfamyan anya ifrur rosai Yusuf ikofen na ma dun Yusuf naek vyansya ve rum faker wairek vyanya.18Yusuf naek vyansya simkak kaku fafisu sun sko ve Yusuf rum vyani, skokara radine, “Sun ko ma rodine, snar kumpan kosrow ro inoken kovanna ro fafisu korama vepon anya. Nari sfor ko ramnai sun keledai kovansya posa sna kove women.”19Inja, fafis skofanam ve kedwai ro Yusuf rum vyani, skokofen faro manfamyan eve vukor ro Yusuf rum vyani,20“Nkor fakman ro amber au, fafisu veyande kwar iyafa nkorama nkokoves roveyan.21Fafisu nkobur, ro fyor nkoveryar fa nkenef, nkovas inoken nkovena. Nkomam ido kumpan nkovuki vyak pokem ansya sisya svarek ro pokem syabo. Nkofawi mansei verir kumpan sya ro inoken nkovannani. Kur ine nkun kaver kumpan ansine faro amber au. Ma nkun kako kumpan siyawer fa nkovuki kyoves roveyan.”23Manfamyan anya ikofen, “Mko knon. Mkomkak awer. Allah mkovedi, isoine Allah sinan kma mkovanya isyom ani, I verir kumpan ansya ro inoken mkovanna ni. Vavyak mkovuki vyak pokem ansya yasmai si kwar.”Raposa isasyar Simeon i ma dun i ve sko,24Posa dun si fa ssun ro rum. Vyuk war na fa skovuki vyan wemin skovena ma kako roveyan faro keledai skovansi,25posa ido, skofasos faferes na fa skovuk faro Yusuf ro fafisu ryave rum ro mun orikokya, snar skomnaf kwar, nari skonan kam so i ro mun orikokya.26Fafisu Yusuf ryama kwar ro rum ido, naek vyansya svuk faferes na faro i ma skunem ro varpon vyedi.27Yusuf ifuken, skoisya kuker payamyumke, ma ikofen, “Mkofawar ve aya kwar, sinan kma mkovedi eve mansar kwar ani. Rariso kuker i? Isya kuker pyum ke?”28Skokarem be i, “Manfyan bedi, sinan kma inkovani, isya kuker payamyum” insape skunem svan suba be i.29Rofior Yusuf myam veknik vye Benyamin i mura, ikofen, “Inja, ine vedar kasun mkovedi, mkokofen badir kwar ve aya nanya? Ivye kada Allah vye navye au, romawa yedi.”30Yusuf sneri muk kaku snar sane raro vyena faro vedar kasun vyedi. Indokada sneri idworem ba, inja ibur sko ra syun be sim vyedi ma kyanes.31Posa ipyos mkarui vyena, ramnai fyarmku vo isasyar wer, Yusuf iwan fa sfasos anan ma aninem.32Yusuf danan ro karabaja iya vardi, ma naek vyansya sanan ro karabaja eveseya. Snonkaku Mesir vero diyansya sakanan ro karabaja eveseya kako, snar smam snonkaku Ibranisya ve snonkaku vekaryonba.33Yusuf naek vyansya sanan ro karabaja vekar mufa ve Yusuf i, skain raris mov sikapar si raya, randak ro romawa rak isof ro romawa vepupes. Fafisu skomam rarwas anya, muraido skomam yaye sko ma skokmome.34Svuk ve sko roveyan vero karabaja Yusuf vyedi, imboi Benyamin i ma ismai rarwas nabor syadi rarwan di rim ro naek veba vyesi. Ramnai san sinem kuker Yusuf i isof sarbor kaku.
The Seed Company