Sarmur Randak37
Yusuf ma naek vyesi
1Yakub ikenem ro sup Kanaan mov kmar Ishak ikenem ro,2ma ine irya fawar vekur Yakub kina vyesi:Fafisu Yusuf, Yakub romawa vyani vye pasibarek samfur eser seser di fik, iwaren kambing domba warpu naek veba vyesi, sisoine Bilha ma Silpa romawa suvesi, Yakub kya vyansuya. Yusuf ikofen vadir ve kmari, naek veba vyansya roi vevyeva sifrur na.3Yakub iswar syadi Yusuf i ro naek min vyesi, snar vye veyaven ro fafisu vye mansar kwar. Ras oso yakub iwan fa sisip syatu vepyum kaku yave Yusuf i. 4Rofyor naek veba vyansya smam ma Yakub iswar syadi Yusuf i mura simarisen i va ma simewer sakawos pyum yov indi.5Rov oso Yusuf myafu, ma fafis fyawar mafafu anya faro naek veba vyansi, mura naek veba vyansi sembrov nakraf kaku i.6Snar Yusuf fyawar ve si radine, “Indo mkorower!7Yamafu koisya ri yaf fa kororvos pokem, kniko ido pokem bos ayeja dores avyover. Pokem bos mkovesya sores padadwar pokem bos ayedi ma skunem yov i.”8Mura naek veba vyansya sikofen ve i, “Kwara vo wove nari ve wairek ve inko ma nkove manfamyan ve au?” Inja naek veba vyansi sembrov syadi kaku i snar mafafu vyena ma kako wos ikofen na.9Swafo wer ido Yusuf myafu wer, ma fyawar wer ve naek veba vyansi, “Yamafu wer, yamam ori, paeki ma mak samfur seser oser skunem ma svan suba ve aya.”10Mafu anya fyawari kako ve kmari, inja kmar ikofen ve i, dove, “Mafu risai vera diryani? Kwara vo wove, aya, snami ma naek bansine nkorafa nkokunem nkovan suba ve au?”11Yusuf naek veba vyansya sisnesna naduf kaku faro i, imbape kmar ikram ma kyara mafafu anna ro snerido.
Yusuf vye vevov ma sun i ve Mesir
12Ras oso Yusuf naek veba vyansi srave Sikhem fa siwaren sinan kma skovanya kambing ma domba vyesi,13inja Yakub ikofen ve Yusuf i, “Rwa ve Sikhem, ve mov naek veba bansya siwaren kambing domba kovansya ro iwa.” Yusuf kyarem, “Kamam na yara.”14Kmar dove, “Rwa mam kara pan naek veba bansya kuker kambing domba ansya sisya kuker payamyumke, posa kwaver ma insa wakofen vadir ve aya.” Mura ryir fa Yusuf imbran ro dwas Hebron ryave Sikhem.Fyoro va ido syuver ro Sikhem.15Fafis Yusuf imbran syewar naek veba vyansya mura muma ro maper, isrow kuker snon oso vefuken ve i, “Rosai swewarya?”16Yusuf kyarem bei “Naek veba ayesya sisya siwaren kambing ma domba, sinan wafawi mov sisya roya?”17Snon ani kyarem ve i, “Sibur mov ine kwar. Yamnaf sikofen vo sove ive srave Dotan.” Mura Yusuf iyom naek veba vyansi ra isrow si ro Dotan.18Vyinkwan kaker vo naek veba vyansya smami kwar, inja rya fyanam si vaim, sna wos oser fa smun i ra imar.19Sikofen yaye ve si, “Mkomame,” “Romos vemafafu anya isiyama.20Indo komuni ma kosawen baken vyeja ro war veyer eve warva ine. Nari kokofen vo kove aiwan verafdisya smuni. Komam kara pan rosai nari evesya kuker mafafu vyannani.”21Ruben ryower wawos anna, mura vyesewar infa fyaspar Yusuf i. Inja ikofen, “Komun awer i.”22“Kosawen monda i ro der war veyer vero maper ine, imboi koprer awer rova komer par awer i.” Ikofen ra dirya snar kyara fasis fa ive fyaspar Yusuf i ma iwan i fa ibur ve rum.23Fafis Yusuf rya isrow kuker naek veba vyansya kwar ido, naek vyansya sper syatu vepyum kaku vyanya. 24Insape sismer i ra sisawen i ro der war veyer vesyorya.25Posa skain sanan, fyoro va ido smam kawasa Ismaelsya sisya ro marandan veraker Gilead ma unta sesya sivyawen rampa-rampa mampasa kif, ma kesi vo ive sra ve Mesir.Unta vevyawen rampa-rampa26Muraido Yehuda ikofen ve naek min vyansya vo dove, “Fainda rosai kosmaiya fyor komun veknik kovanya ma koyofek mamun inenya?27Mkorama kovov i ve kawasa Ismael siya. Kove i ra movo nawer. Snar veknik karyer kovedirya.” Naek vyansya siso wos vyani,28ma fafis manfarvyan Ismael sya sunuk, Yusuf veba vyansya sisasyar i ro war veyer vesyor anya ma svov i ve kawasa Ismael ansya kuker kumpan sarak samfur di suru. Muraido snonkaku vefarvyan ansya sun i ve Mesir.29Fafis Ruben kyaver ve der war veyer ani ma myam Yusuf isya ro diya va mura pyansawek sansun vyena snar fyafko.30Kyaver ve naek vyansya ma ikofen, “Romawa anya isya ro diwa va! Rosai ive yafrur ro fafis inenya?”31Mura skokaruk kambingya posa skosowen Yusuf syatu vyanya ro rik na do.32Insape skun syatu anya ve kma skovanya ma skokofen: “Syatu ine nkosrowi, kamam mamkarapan imbude romawa banya syatu vyediryandi?”33Yakub myam bavir syatu anya, inja ikofen, “Kaku, ine syatu romawa ayanya vyediri! Aiwan verafdino smuni kwar. Sye, romawa yedi Yusuf imar kwar snar aiwan verafdisya sarek akuki kwar!”34Yakub pyansawek syatu vyeja ma syansun sansun farbabe. Ras ve ras kyain fyarswar ma myandak romawa vyani.35Romawa vyansya, snon sya ma vin sya srama svuk wos sneprei ve i, fama imnaf siva. Ikofen ra dine, “Nari yafarswar ma yamandak romawa ayedi isof yamar.” Rarirya Yakub vye varop romawa vye Yusuf i vesyakwar.36Swaf anya, ro Mesir, snonkaku Ismael ansya svov Yusuf i faro Potifar i, inido Snon mamun eve vukor ve manfadwaren ro aidoran Firaun vyedi.
The Seed Company