Sarmur Randak19
Sasar varvor kawasa Sodom
1Snondi kyor anskoiya skove ryar so Abraham i ra posa, manakya ri suru ansuya sumbran ve Sodom ma sura ro diwa ido fanam rov kwar. Lot isya kyain ro kedwai veba kota ani. Ma rofyor myam manakya ansuya, iyori ma imbran ra isrow kuker su, kyer wepur ro varpon suveja ma kyunem yov su,2ma ikofen yov su vo dove, “Amber anmuine, ivye kada mumnaisu ro rum ayedi. Amber anmuine muvan wemin muvesya posa muyenef ro rum ayedi. Mumarisen ido meser arwo primya insape mumbran pdef marandan muvedi.”Imbape snon ansuya sukofen vo suyove, “Kasumasa, nuyenef ro dine monda, ro vuves kota ine kwar.”3Lot dor samsom kaku, isof ro susun ma suyenef so i ro rum vyedi. Lot fyasos rovean vemafen ma ryap mamami nabor kako, insape skonan.4Imbape snon dakam vyansuine suyenef vaim, snon Sodom sya srama saiwarek rum ani. Snon ansine randak ro mansarsya isof ro romawa babo, sisya kam ro mov ani.5Sor naba ve Lot i vo sifuken, “Snon di suru rov ine verama eve ryar so au suya suroiso? Rwir su ve inko insama nkomamfar su.”6Lot isasyar ro rum vyedi ma, kyen kedwaiya warek su,7insape dawos ve kawasa ansi vo dove, “Naek yena mko yor kaku ve mko, mkofrur awer mnuk varvor ine!8Indo mkorower, yana inai inkbor ri suru. Ivye yarir su ve mko ma mkofrur su raris marisen mkovena, imboi snon dakam ayesuine mkofrur awer royo faro su; snar surama sufadiren ro rum ayedi.”9Imbape snon Sodom ansya sikofen be Lot i, “Wakren bur! Mandaman monda ris au, wove farkor inko? Wakren fasau! Orovaido na nkoprer au nabasyadi ro rosai nari nkofrur faro snon ansuya ni.” Inja spampum Lot ibur vo, ive srer bas kedwai i.10Imbape snon ansuya susawar fa supau Lot i fa syun be rumya dori ra posa suken kedwai anya.11Snon ansuya sufrur mkamor snon vebor ansya sena fa npampan, isof sifawi kedwai anyawerva.
Lot ifrar ibur Sodom
12Snon dakam ansuya suve vadir faro Lot i, “Ausya nwa romawa snon ma inai, ma kako mambikin orovaido naek evese, sisya ro kota ine ido, wun si fa sisasyar bur mov ine,13snar kota ine ive nu ve ninyan i! Manseren Allah ryower wos kursof vemarvak vekur kawasa vero kota ine, inja nusmai wanwan fa nuve ninyan kota Sodom.”14Insape Lot ryafa isrow kuker romawa ive nya ve mambikin ansuya, ma ikofen, “musasyar fasaw bur mov ine, snar Manseren Allah nari Vye ninyan i.” Imbape suyoverada Lot dawos fnak monda.15Fafisu orya dompis vaim, manakya ri suru ansuya sudif kaku Lot i fa isasyar fasaw. Sukofen faro i, “Wasamberen kaku.” “Wasasyar fa wabur fasaw kuker swambri ma vinkbor bansuya bur mov ine, insa mkomar awer rofyor kota ine yave ninyan i.”16Lot vye virvar. Imbape Manseren Allah iswar i; inja snon dakam ansuya sukfin Lot i ma swari kuker inai inkbor vyansuya fa skosasyar bur kota ani.17Posa rodiya manakya ansuya sumindi ikofen, “Mkofrar, mkofaspar mankun mko! Mkopambar fa mkomam be varpur awer ma mkomnaisar awer ro dwas Yordan. Mkofrar ve bonvepampyan iwa insa mkomar awer!”18Imbape Lot kyarem ve i, “Sye, Amber wawan awer fa nkofrar ve bonvepampyam naiwa.19Amber wasaramper aya ma faspar kenem ayeja kwar. Imbape bonvepampyan naiwa nvinkwan kaku; ma fafisu yafrar kaker mura, kota Sodom vye mompraf kwar inja nari yakmar kako.20Mam mura, kota mkun vefanamya iso iponwa. Rwir fa yafrar mura ve diwa insa yavye.”21Manakya ani kyarem ve i, “Ipyum, rarirya ido kota mkun aniwa na yamun iva.22Wasamberen, wafrar! Snar nari yafrur royo vaim rao wafrar ra ro diwa resari.”Snar Lot dove kota anya ibava, mura kota ani snir i ve Soar.
Sodom ma Gomora suve mompraf
23Orya dompis kwar, fafisu Lot ryaro Soar.24Fyoro va ido Manseren Allah isabu karui veve for vesapi ro nankya mufes namnis mekem ro bo Sodom ma Gomora.25Kota ansuya suve mompraf, kako dwas anya kasiper ma rokaker nakam fnovek kawasa vero diyansya.26Imbape Lot swari iknenef fa myambe varpur, mura fyarwe fa vye adir karu-masen.27Arwori fyase, ro arwo baboya, Abraham imbran samberen ve mov mandovindi dores ro varpon Allah i anya.28Abraham myam mura ve Sodom ma Gomora ma dwas Yordan kasiper, ma myam pau na nek ro sapropya bori, imnis pau bero fafen veba kaku.29Irya fafisu Allah vye mompraf kota-kota vero dwas mov Lot ikenem ro, Allah iswarepen fararyor ro Abraham i inja isaramper Lot i fa ifrar ibur.Varpur ro Snonkaku Moab ma Snonkaku Amon
30Snar Lot imkak kyain pdef ro Zoar ri, inja ryave bonvepampyan anna kuker inai vyan suya, ma skokenem ro avyav oso.31Inai veba veponya ikofen faro vedar kasun byedi, “Kma kuvanya vye mansar kwar, raimnaido ro sup ine kasiper snon no sisyava fa nari sfarvuk kuker ku insa kukapar romawano.32Rwama, kufarirem kma kuvanine ra imser, raimnaido kuyenef so i insama kuna romawa.”33Rov anya ido, sufarirem kma suvanya kuker anggur, posa inai veba veponya denef us kmari; snar kmari imser mura ifawi royova.34Mun arwoya, inai veba vepon anya ikofen faro vedar kasun vyanya, “Rovanja yenef kuker kamami kwar! Nari rov ido kufarirem i fa imser wer. Ramnai ido wenef us i, na kukame kuna romawa.”35Irya rov anya sufarirem Lot i ra imser, posa inai eve suru vyanya denef us i. Snar Lot i imser, ifawi royo va.36Mura Lot inai vyan suya sufadores snar kma suvanya.37Inai vebaya ikapar romawa snon oso ma nyir ive Moab. Vye up faro kawasa Moab ro fafisu ine.38Inai eve suruya, ikapar romawa snonya, nyir ive Ben-Ami. Vye up faro er Amon ro fafisu ine.The Seed Company