Sarmur Randak13
Abram ma Lot suvesisye
1Abram isasyar bur sup Mesir kuker swari ma nana vebor vyena ve sup Negeb, ma Lot i kako iso.2Abram snonkaku venana rirya; ismai ve domba, kambing, sapi, sarak ma brawen.3Imbran vyeryar ro mov mnaisu iya ve mov mnaisu iya wer veso yov Betel, mov fafis iyafa syoyai randak roya swaf Betel kuker Ai4ma mov daker apen farsarserya ro. Ro mov anya iso Abram dap randak kaku snonsnon Manseren Allah I.5Lot i kako nya kina ma manfyan infyan, domba, kambing ma sapi si.6Imbape saprop ma maper ro mov anya imkei va snar rofanfan suvesya sibor rape.7Irya newari mbrov ro fandu manfarandous Abram vyesya ma manfarandous Lot vyesyi. Fafisu anya snonkaku Kanaan ma snonkaku Feris sya sna mnu ro sup anya kako.8Mura Abram dawos ve Lot i, “Kuinema kina oser, inja fanfavri ma rapapik naisya awer fandu aya ma au ma kako rofandu manfarandous ayesya ma manfarandous besya.9Imbo sup aniwara ikei, inja ipyum syadi kuvesisye. Kwinfir ro saprop ine mov risai wamarisen i, wabur ve var ine ido na yabur ve varo vese.”10Lot myam ve vandivar ma sneri pyoserbos kaku kadwas Yordan isof ro sup Soar snar war na nabor kaku ro dwas anya, imnis kaku yaf Eden orovaido imnis raris sup Mesir. Irya payamyum ro vepon ro randak Allah vye ninyan sup Sodom ma Gomora vaim.11Inja Lot kyinfir kadwas Yordan kasiper, insape ibur Abraham i ma ryave var wamurem. Rarirya snonkaku ansuya suve sisye.12Abram kyain pdef ro sup Kanaan, vape Lot syoyai ro kadwas Yordan ro kota vefanam ve Sodom.13Kawasa vekenem ro Sodom sya sivarvor fafayava ma sifrur sasar nabor kaku ro varpon Manseren Allah I.Abram isasyar ve Hebron
14Posa ro Lot ive sisye kuker Abram i kwar ido, Manseren Allah dawos faro Abram i, “Mam farma ve vandivar, mam kako ro mov wores ro iya ve wamurem ma wambarek, wambrur ma wamires;15Sup vebor mam kwar annane nari Yavuk na faro au ma faro kpu besya isof fyoro-fyoro.16Ma nari Yafrur fa kpu besya sibor kaku, isof oso fa nari kyor napok siva. Rarirya osova kako fa nari kyor napok oref vero saprop, rarirya kako kuker kpu besya oso fa nari kyor napok siva.17Fasos, wambran yar sup ine raris kawanwan ma avavamya, snar nari Yavuk na faro au.”18Posa Abram rya fa vyawes soyai fanam aiknam tarbantin vero Mamre vefanam Hebron, ma rodiya vyawes apen farsarserya faro Manseren Allah I.The Seed Company