Tiituus3
1Udehayook shꞌasaa Yhaakmaawwa yhadꞌaawwa isnaakiirneet toona, atꞌaab ikatiineet toonaati. Baraah tudaayiinaayti dꞌuuyii dehaay eetmiirneet toonaati.2Baraah amaagna gaalnaay han biihadiidayna, tari biiꞌamgwasaarna. Baraah ibakii kasseeh udehayii dehaay shibootwa daayiinaaytwa idꞌaneet toonaati.3Hinin suur agim akay niifi, ibhali kinsinaakir, akish niikti, masi aree kasteeh tiniyaateenwa tinafirnayti kishiyaawwa niikti. Hinin maagnaaytwa giiraatwa niibri. Uudehay kassaah iiribna hoon, hinin han oodehay kasseeh niirib.4Laakiin Ukwaasana Wꞌishidhhiin kak shibootwa daayiinaaytwa ibariyeet toona rhisiya hoon.5Baruuh ishidhhan hoon, hinin nidꞌiyeet daayiinaaytii kiiki laakiin barooh ooknaayt rhamaatee ishidhhan hoon. Eeshuuk Imugaddasaayee ishaagwidh hoon aree gayiit firaytwa gayi midhhanwa yhii hoon.6Baruuh Yasuuꞌaab Wꞌishidhhiiniyoon geebii Eeshuuk Imugaddasa winneet kehoon ifif idꞌi,7aflaay Yasuuꞌa hinin toona tꞌastehalnayeenaati mhakwal daayiib iweer hoon. Baruuh hinin Ukwaasana agbiliiniyeeb ikwaas hoon, aree umidhhan udaayimi sꞌaya yhii hoon.8Tuun tudiigwat sidik tikati. Uun utꞌaliim anfꞌiini, aree oodehay kasseeh eeshtiim. Uudehay aree oon utꞌaliim eetriimeet toona akraab sooteeneet toona hookna aharriiw. Aflaay Ukwaasana aamaneen baliin kassaah daayiinaayti shaga shagaameen ikatiin.9Laakiin afrii amgwasuura hoobeet sifaarariyooytiib baadꞌiina. Muusaay whaggiib baaꞌamhasasaayna aree baafinaasamaana. Bak tꞌiiteeb wꞌamgwasuura rayiib kiibari aree takweet kiibari.10Oodehay igwirha igwabib aree door gaal tari malu doora daayiib sooyaana. Beenaay harꞌii, bareeyooh geeb tꞌayaaytookna singadna.11Baraah itehaliigna, aree idanuubaahna aakna gwababikina ikatiineet toona rhisiina, aree igarooyeehna baraah aakna haakameen.
Ukwaasanaayt tinꞌima kasseeyookna geeb baꞌiiktiin.
Aakhareet tiwasi
12Ani Artimaas tari Tiikiikoos barook beeti afandiigeet toona niyaamani. Baruuh kantiimihoob, ani oowiyaay door beentooy eesitꞌeet toona niyaamanayt, anaahook baruuk Niikooboolseeb aneeb beeti eetniyeet toona winneet jarraba.13Seenaas whaggi koojaawwa Aboollooswa tꞌiibaabtii dehaay eetmiirnihoob, daayiib shamna, aflaay baraah yhariwneenaaka imeerneet toonaati.14Udehayuun idamaneehna rayiistiniinaawwa takweet tibariinaawwa idꞌaneet toona ibakii allamameen ikatiin.15Tooy eefeen uudehay kassaah salaameen hookna. Wꞌiimaaniib araween ikatiin aree kasseeh salaamaana.Ukwaasanaayt tinꞌima kasseeyookna geeb baꞌiiktiin.
The Seed Company