Ilawsiti18
1Oonaay harꞌii, weer malaktaayi tibreetee nꞌati yꞌee rhan. Baruuh akraat hadꞌaayi iibri, aree umatuunuuh kastooh toobuut eeraasiya.2Baruuh tageega hissii waliikiya:“Dhibta! Baabilyoon tuuwin dhibta!Batuuh ijinee dehaay gaw tikiaree amag shuukeet bꞌakwt tiki,kasseeh ijinsaayi kilay inajjasamaawwa yꞌatoorbiyaayi gawwa tiki.3Kassaah yhash batiiyooh whawꞌamaag oojkuuniib gwꞌiyaan.Tubuuti hadꞌa batiiyooh geeb jikuun shagaamiyaana,aree tubuuti tijar han batiiyooh oomraayiib iwinniit millaleemiyaan.” idi.4Malya weer hiss tibreetee amaasiw, whiss:“Yaa udehayu, batiisooh firꞌana,aflaay batiiyooh geeb tumaagnaay shaaraki kitdiina,aflaay batiiteeh tinasiibeetee han naat iyaay kitdiina.5Idanuubaah teebri ookiik koomaab ikatiina,aree Ukwaasana batiitooh toomaag shꞌiya.6Batuuh tiweereet toona weerna,batuuh tidꞌiyeet toona malu doora weerna.Batiiyooh ookaas ooknaay malu doora shaawnaat gwꞌasaana.7Batuuh ugarooyooh tisoowin aree millaleesta akay,batooh gwida jasa jasaayaana aree lhasaana.Batuuh uginꞌiisooh tinfiish,‘Ani tooy tehadꞌaatiit eestꞌi, ani ibraatfaatkiit kaaki,aree door han gadabi kaadi.’ tindi.8Shaawti bꞌeeb gaal tinasiibeetaah batiiyooh kehii ansirami iyadna:yatwa, gadabwa, hargwiitwa ikatiin.Batuuh nꞌeetii ituuliw tindi,Wꞌankwana Ukwaasana batooh haakamiiniib alyaabi.” idi.9Tubuuti hadꞌa batiiyooh geeb jikuun shagaamiyaanwa, batiiyooh geeb millaleemiyaanwa, batiitooh tꞌatoolwooytii itfarꞌi ukwaraar rheenihoob waawi iyadna, aree batiiyooh kehii gadabi iyadna.10Batiiyooh ijasa rikwitiit baraah sigiiti gadtiit waawi iyadna:“Tidhikwii! Tidhikwii tumadiina tuuwin,yaa Baabilyoon yꞌakrireet tumadiina!Gaat saaꞌaatiib ukwidhuuk yꞌaabi.” iyadna.11Tubuuti tijar milooti iyadna, aree batiiyooh kehii gadabi iyadna. Bareeh shaawti gaal han igadhꞌeehna hooy dilba iyaay kiidi.12Dimꞌaraay gadhꞌeehwa, ashteetwa, alya aweebwa almaaswa, nꞌakw naayloonwa, hariirwa, dabalaanwa, kasseeh ijinsaayi daayi hindiiwwa, kasteeh wꞌaaji jinsaayee daamaat teenaawwa, alya hindiiwwa, baloobwa, diitwa siigwꞌeebwa,13girfaabwa, baharaatwa, libaanwa, mirwa, kwararti libaanwa, haabwa saliitwa, nꞌakw bꞌuukwa gamhiiwwa, shꞌaabwa anootwa, hataywa kaaroobwa, igaroowwa eeshuukwa udehayiib ikatiin.14Baraah batiiyooh dehaay, “Batuuk dehaay hayꞌaat tiiktiyeet taana tinafit hook giigiyaan. Kassuuh umraayuukwa umatuunuukwa kwidhiyaana, shaawti bareeh imaar kitdii!” iyadna.15Aatjar teen teena idlibniit batiisooh oomraay rayiimiyaan sigiiti ingid iyadna. Baraah batiiyooh ujasaay ireekwna, milooti iyadna aree gadabi iyadna.16Baraah waliiki iyadna:“Tidhikwii! Tidhikwii tumadiina tuuwin,batuuk nꞌakw tootriin tikweet, adaarhamaashwa dabalaanwa tikweet,dimꞌaraay buubtiniit, alya aweebwa almaaswa tikweet, tidhikwii!17Uun uumraay kassuuh gaat saaꞌaatiib kwidhi indi.” iyadna.Ubhari kabtina kassaahwa, falluukaatii iibaabeen kassaahwa, ubhariyaywa, ubhariib shagaamiit timꞌariitooh imeer kassaahwa, baraah sigiiti ingid iyadna.18Batiitooh tꞌatoolwooytii farꞌamiiniib ukwaraar rheenihoob, baraah “Toon tumadiina toowin tꞌiiteet madiina door han daayaat tiiktii?” iyadna.19Baraah igirmaayeehna kehii falfuut iigid iyadna, waaweewwa gadabeewwa waliiki iyadna:“Tidhikwii! Tidhikwii tumadiina tuuwin,ubhariib falluukaat ibariin kassaahbatiiyooh umraayii gabiyaana!Batuuh gaat saaꞌaatiib kwidhta.20Yaa taabri, batiiyooh kehii afirhaana!Ukwaasanaay dehaywa, ilinguumiyaawwa, inabiyaawwa afirhaana!Batuuh bareek tiweereet toonaati sabbii Ukwaasana batooh haakamiya.” iyadna.21Malya alya malaktaayi win awi riyaat tꞌiiteeb yakisiyaayt ubhariib igid, malya bak idi:“Baabilyoon tumadiina tuuwinoon bak tꞌiiteet ribshaaytii nꞌati ituugid tindi,Shaawti door han itmir kitdi.22Baasankwooy waandhootiiwwa dehayi hissaawwa, ambiilhooytwa fuufinneetwashaawti door han hook itmissiw kiidiin.Bꞌiishraayiini takgaal han masi hook daayi kiidi.Riyaati hissshaawti door han hook itmissiw kiidi.23Lambaati nuurshaawti door han hook buubi kiidi.Udoobaawwa tidoobaati hissaawwashaawti hook itmissiw kiidiin.Batiiyaak aatjar tuduniyaati wawinda iiktiin.Batuuk tusehartiisook kastooh tuduniyaati hash kwakwidhistaayii.24Inabiyaayi booywa, Ukwaasanaay dehayi booywa, kasseeh baliib tubuutiib itoodaarni booywa batiiyooh imri.” idi.
The Seed Company