Fiilibeeb4
1Shaawti, yꞌarawaan, ani areeyani hookna aree irheeyookna dehaay hayꞌaabu, yaa yꞌarawaan, anaahookna Wꞌankwanaay wꞌiimaaniib akirna gadna.2Afuudiyaawwa Sintiikheewwa anaahookna gaat turaawti geeb taafagaana. Bataakna Wꞌankwanaay wꞌiimaaniib kwaat tikatiina.3Baruuk han, yaa aniib wꞌaraaw usidki, teen teemꞌat teeshtiimeet toonaati. Bataah anii geeb shagaamiyaaniit Usakana Udaayiib ibrirna. Kileemantiiwwa yꞌaraw geebu shagaameen aarawwa ismaayaahna Ukwaasanaay umidhhani kitaabiib kataba.4Wꞌankwanaay diimaab afirhaana. Masi andi hookna: Afirhaana!5Oodehay irawi geeb shiboobna. Wꞌankwana willa yꞌi indi.6Naatii han baahasiikna. Laakiin tusileeltiyookna toona tutehariwneet Ukwaasana raataana, aree diimaab barooh hamaadi ginꞌii raataana.7Aree Ukwaasanaay umꞌasig, kastooh tufhamaati mhakwal eefeeb, iginꞌaayeekwa igirmaayeekwa Umasiih Yasuuꞌiib eefeen iigwꞌad indi.8Aakhar, yꞌarawaan, igirmaayeekna teena tidaayiit whamaad astehaleent tibna. Teena oosdik ikatiint, sharafwa, shibootwa, nhisuuytwa, reerwa, hamooyseewwa ikwasiint tinaatee igirmaayeekna tibna.9Anii timriineet tukanaan haay shagaamaana. Aniit tikalmaawwa aniib ushagaaywa timriineet toona haay shagaamaana. Aree Ukwaasana umꞌasig iniiw geebookna baꞌiikti.10Baraakna masi weer door haay tikwinnaheeb akay, Wꞌankwana winneet ahammiid. Sidik baraakna kassoohoob aniib whaaliib tiikwinna, laakiin haay rhistiineet fursa door han miraab kitteena.11Ani toon toona shanhatiyaat iibri miyaad akay kaadi, laakiin ani toona tꞌabariyeet haay ganaamaniyeet toona akan.12Uunaaw naan ikatiyeeb akteen, tugwidaanaay han naan tikatiyeeb akteen. Ani kassooh whaaliib akwiri. Tehargwi tari taagab naan ikatiineeb akteen. Gwidaana abariyeek tari shalikna abariyeek akteen.13Ani ootaad iniiwu Umasiihi geebii naatka sakaniyeet toona adgirani.14Laakiin aniib igwirhaayeeb baraak geebu tingadneet tuuna winneet daayiiti.15Yꞌarawaan Fiilibeeb eefeen, ani Magadoonyaay Usakana Udaayiib bhaliitiib badooyanihoob tiiktiit toona baraakna shꞌiteena. Ani beentooysii giiganihoob, tukaniisi aneeb tishamt bareekna eebhat tikatiina. Aniib urayiiwwa tehasarwa geebu imꞌadhaadh bareekna eebhat tikatiina.16Ani Tasaaluuniikaay iifiyihoob han, shanhatiyaat iibriyihoob baraakna doorka doorka tishamnaheeb.17Ani bareesookna miyaawi nuunamti kaahariw. Laakiin whisaabiyookna rayiib imeeshiwiyeet toona asehariiw hookna.18Ani naatka maksabii kwasaayu, ani gwidaana attiyeewaay. Baraakna Abafrooditoosi geeb diigwattaaneeb oomiyaaw oontꞌa ayhi. Uumiyaaw daayiit shakwiint, agbilamaat haruudiit karaama Ukwaasana afirhiseent ikati.19Umasiih Yasuuꞌii ikatiib umatuuniyooh umraayiit hayꞌaatii, Ukwaasanaayu kasteeh tꞌeeteekna timmiima baꞌiyaaw hookna.20Umatuun diimaabwa kassoohoobwa Ukwaasana Baabiyoon baꞌiikti! Aamiin.21Ukwaasanaay oodehay Umasiih Yasuuꞌiib ikatiin gaalka salaamaana. Wꞌankwanaay yꞌaamanana tooy geebu eefeen han salaameen hookna.22Ukwaasanaay uudehay tooy eefeen kassaah salaameen hookna. Baliin Wꞌimbiraatoori gawi gwꞌaadiiga ikatiin han salaameen hookna.23Wꞌankwana Yasuuꞌaab Umasiihiit tinꞌima kasseeyookna geeb baꞌiiktiin!
The Seed Company