Ibraayiib1
1Shꞌiiya door Ukwaasana hoobeen inabiyaayi geebii gwida doora gwida salalaayee bhaliisamiya.2Laakiin teen tiyinaateeb baruuh hinin Wꞌooriisooh bhaliisamiini hoon. Aree barooh naatka sꞌabkaabu, aree bariiyooh geebii tuduniya idꞌi.3Wꞌoor Ukwaasanaay umatuun rhisiini, aree baruuh Ukwaasana ookna tꞌiiteebi. Kastaah taana barooh ooknaay ibhaliyi akriree diimaab daayeen. Baruuh toomaag atehariyaayt harꞌii, Wꞌalyaanaay umaygwadii dehaay tibreeteeb nꞌati isꞌa.4Aflaay baruuh imalakeeka winneet tageegakaab iki. Uusim baruuh kwasaamaab ikatiyi han imalaki simaayeeka tageegaakaabi.5Ukwaasana imalakeeyooh dehaay gaal han,“Baruuk ooru tikatiya,amsi ani baabook akati.” diyaab kiiki.Tari masi“Ani barooh baabooh iikti andi,aree baruuh han ooru iikti indi.” diyaab kiiki.6Masi aree, Ukwaasana wꞌoorooh usuurkina tuduniyaatiib haay eeyanihoob, baruuh,“Ukwaasanaay imalak kassaah ibakii barooh yꞌabidna.” idi.7Baruuh imalakeeb hadiidiiniyihoob, baruuh,“Ukwaasana imalakeeh baraam ikwasi,ikishiyaayeeh nꞌeeti balool ikwasi.” idi.8Laakiin baruuh Wꞌooriib hadiidiiniyihoob, baruuh,“Tehadꞌaayeetuuk, yaa Ukwaasanaay, daayimtwa kassoohoobwa iikti tindi,aree udehayook kehii wꞌadlii hikim tindiya.9Baruuk tooshbu areeta aree toomaag tiriba,shaawti Ukwaasana, Ukwaasanaayuuk yꞌaraweeyook mhakwal idꞌi hook,tifirhaati saliitii ishaamit hook.” idi.10Baruuh masi,“Yaa Wꞌankwanaay, ibadootiib, baruuk tubuuti asaas tidꞌiya,aree taabri bariiyeek yꞌayi shagaay daamiyaan.11Bataah kwidhi iyadna, baruuk daayi tindiya,bataah kastaah yhalakaayeet iishꞌi iyadna.12Baruuk bateeh whalakiit iiksis tindiya,bataah whalakiit gayyarami iyadna.Laakiin baruuk diimaab uknaayook tꞌiiteeb tikatiya,aree yhawlaayaak iinhad kiidiin.” idi.13Ukwaasana imalakeeh gaalnaay dehaay han,“Yꞌashooyeek iragadaayeek whiieetamtiniit madhamt akwasiyeeb ookiik,baruuk aniib umaygwadii dehaay sꞌaa.” diyaab kiiki.14Imalak kassaah shuuk Ukwaasana shagaameena, baraah baliib umidhhan kwasaameen eeshtiimni jillaay Ukwaasana diigwataab kiiki han?
The Seed Company