2 Tasaaluuniikaab3
1Aakhar, yaa yꞌarawaan, anaahookna dehoon siileelaana. Tuun tuuna aree Wꞌankwanaayt tudiigwat willa titbariiri jillaay teeshtiim, baraakna sakteeneet toonaatiit aaraw han hamooysi iyadna.2Oodehay takweet baabariinwa tumaagti dehaywa hooy nꞌasgeet toona siileelaana. Uudehay kassaah iimaan ibariin miyaad kiiki.3Laakiin Wꞌankwana sidkiibu, aree baruuh isꞌikir hookna indi, aree tumaagtikina Oongaalnaay ishidhhin hookna indi.4Hinin bareekna allamnaneet toona tisnaakiirneet toonaawwa masi baliit teena isuuririm tiyadneet toonaawwa Wꞌankwana akkadisiya hoon.5Wꞌankwana iginꞌaayeekna Ukwaasanaay ooreer beeti bamitiyaayi, aree Umasiihiib itarmuuma baꞌiyaaw hookna.6Yaa yꞌarawaan, Wꞌankwana Yasuuꞌaab Umasiihiib oosmii sooyani hookna. Yꞌaamanana hasra kwiraay ikweerwa hinin nhiiyyeet tiwasi baaraamwa kasseeh hooy sigiina.7Hinin nidꞌiyeet toona tookna ibakii tidꞌaneet toona baraakna daayiib tikteenna. Hinin geebookna niifiyihoob hasraab kinki.8Hinin mꞌariit dilba ahaab binkaayeet gaalnaay han agbilaab kinki. Gaalnaay kehii han rabeeb niiktiyeet toona hariwaab kinki. Aflaay whawaadwa oombꞌeewwa shagaamna aree gallabamna.9Hinin haay binshagaamayeet toonaati hag niibri, laakiin hinin bareeyookna dehaay misaal niiktiyeet toona nhariw.10Hinin masi bareeyookna geeb niifiyihoob, gaanuun nhii hookna: bitshagaamayneek, tami kitdiina, nidi.11Oontꞌa gali bareesookna hasraabaana aree naat han kashagaamtaana, oodehay irawi shagaay shashuumteeneet toona nimaasiw.12Aflaay Wꞌankwanaayoon Yasuuꞌaab Umasiihi jillaay, aan uudehay nꞌati sꞌatiit yhadhi itameeneeb rayiimeeni jillaay shagaameeneet toona hooy nhariw aree soonay.13Yaa yꞌarawaan, tudaayiinaayti dꞌuuy door han ibakii hooy baagwooyna.14Toon tudiigwat ujawaabiib teefeet eerib yꞌaamanana hooy digwagwna. Bareeh naat han geeb baadꞌiina aree siisakwꞌana.15Bareeh ashoob baahiisaana, laakiin yꞌaamanana iraweet bareeh han diiseet hadiidsamaana.16Oontꞌa umꞌasgi Wꞌankwana uukna kassoohoob mꞌasig baꞌiyaaw hookna aree kasseeh isalalaayee baꞌiyaaw hookna. Wꞌankwana kasseeyookna geeb baꞌiikti.17Ani Baawloos, toon tusalaam wꞌayiisu akantiib, kasseeh aniib ijawabeeb atookakinaat alaama tikati. Ani bak akantiib: BAAWLOOS.18Wꞌankwanaayoon Yasuuꞌaab Umasiihiit tinꞌima kasseeyookna geeb baꞌiiktiin.
The Seed Company