1 Tiimooti2
Tukaniisaatiib abidna
1Ani willa sooyani hookna, hankaab oodehay kasseeyooh dehaay siileelaana. Ukwaasana shamaamt hooy hariwna, bareeyooh mhiin bitkeemaana, bareeyooh jillaay hamidna.2Yhadꞌaawwa kasseeh baliib tehadꞌaayeetiib eefeenwa bak dehaay siileelaana! Aflaay mꞌasgiibwa tiribshaaytii nigiya kwiraaywa nikweeree dehaay adgirnay. Tageegwa faalwa nimeeri jillaay siileelaana.3Tuun tuuna daayiitu, aree Ukwaasana Wꞌishidhhiinoon afirhistini.4Ukwaasana kassaah uudehay dhhantiit oosdik ikteeniineet toona yharriiw.5Gaal Kwaasana eefi, oodehaywa Ukwaasanaawwa aree bitkeemiini gaal eefi, baruuh aree ootak Umasiih Yasuuꞌaab ikati.6Baruuh ugarooyooh kasseeh oodehayi jillaay hiiyyaabu, tibadeha aree udooruuh yꞌiiniyihoob soomameen.7Oon usabbii aree ani diigwatkinaawwa linguumaawwa akati. Ani oosdik sooyani, gwisir kahadiidan. Ijintiili aree usidki iimaan allamani.8Ani kassooh oomhiin eefeen oodehay taahira ayi asti abiktiit siileeleeneet toona hooy aharriiw. Baraah hasiyaaytwa angwasuuraabwa anu idꞌaneet toonaati.9Ani masi teemꞌa han daayiib eetkwiineet toonaawwa, gibilwa habnaawwa idꞌaneet toona hooy aharriiw. Tehamu biihashuuyayneet toonaatu tari dimꞌaraab tari jawharaab tari alya halaka biidꞌiineet toonaati.10Laakiin teemꞌa Ukwaasana yꞌabidt, udaayi shaga dehaay hanyiis.11Tutakat diiseet allamamtiniyeet toonaatu, aree ibhali tisnaakiireet toonaati.12Tutakat allamtiniyeet toona kasooyan, tari ootaki kehii hadꞌaat tikatiyeet toona han kasooyan. Batuuh ibakii tim tikatiyeet toonaati.13Aadam hankaab daamiya, malya aree Hawwa daamta.14Aadam atootilaab kiiki. Laakiin tutakat titootaalaayt danuubeet kina tiki.15Laakiin taamꞌa inisrika ifeerni sabbii iidhhan iyadna. Bataah wꞌiimaanwa, ooreerwa, ugaddastiiwwa, oogbilwa isoorariimneek iidhhan iyadna.The Seed Company