1 Tasaaluuniikaab5

1Isanaayaan, tuusꞌa tari uumbꞌi naadoor iikti indiyeet toona dehookna akantiibeet toona kaahariw.2Wꞌankwanaayt tooyin baraak sidik tikteenna. Baruuh ugwihara whawaad yꞌiiniib tꞌiiteeb iikti indi.3Uudehay asgaabwa kookaabwa hiiseen. Laakiin gaal door uukwidh tootakat firaayiit lhanayt tibariit tꞌiiteeb akay oodehay iithꞌa indi, aree baraah iidhhin kiidiin.
4Yꞌarawaan, baraak thibniib kitkwiriina, aflaay beet tooyin ugwiharaayt baasigaribna.5Baraakna kassaakna unuuri ar tikatiina aree oombꞌii ar tikatiin. Hinin whawaadi dehay kinki tari uthibni dehay kinki.6Aaraw diweena, laakiin hinin bꞌartiit dagwagw nikatiyeet toonaati.7Uudehay idiween, whawaad diweena, aree baliin yꞌaskireen, whawaad askireen.8Laakiin hinin oombꞌii dehay nikati. Aflaay hinin ibakii igarooyeen kaleewnayeet toonaatu, wꞌiimaanuunwa ureeruunwa ootak ugadhꞌamaab tꞌiiteeb ikatiineet toonaatu, aree umidhhani sꞌaya tukoofiyaaytiit daasnayeet toonaati.9Ukwaasana hini jasaati kiihariw, laakiin Wꞌankwanaayoon Yasuuꞌaab Umasiihi geebii hinin ishidhhiineet toona harriiw.10Umasiih hini jillaay ayaabu, aflaay hinin bariiyooh nikweer nikati. Baruuh yꞌiiniyihoob, hinin dhhaniib nikatiyeek, ayaab nikatiyeek, bariiyooh nikweer.11Oon usabbii aree baraak ibakii taktak sꞌakirna, taktak shamna, oontꞌa sakteeneet toonaatiit sakaana.
12Yꞌarawaan, isuurkinaayeekna geebookna akraab shagaameenwa, Wꞌankwanaay usalaliib kak tikweerneet toona sooyeenwa, daayiib sinaakirna.13Bareeh ushagaayoohna sabbii, daayiib hamooysaana aree areeyaana. Taktaki geeb umꞌasgiib kwiriina.14Yꞌarawaan, takwaakw salalii baakwariin oodehay winneet sooteeneet toona hookna nhariw. Oodehay igarooyeeh atooꞌishaab hiiseen sꞌakirna, eenꞌakw shamna, aree kasseeh oodehayi geeb tarmuumaab dꞌiinaa.15Uudehay eeribnuukna han baariibna. Taktakee dehaay shiboobna, oodehay eeraw han dehaay shiboobna.
16Diimaab afirhaana.17Toosileel soorarimni siileelaana.18Yasuuꞌaab Umasiihi sabbii, tikatiit naatiika Ukwaasana hamidna. Ukwaasana toon toonaati dꞌuuy hookna harriiw.
19Eeshuuk Imugaddasa fidinti baaꞌagiirna.20Oosiruud baaꞌabaabaana.21Naatka tajribaatiib daasaana. Tudaayiinaay agbilaana.22Toomaag tikwasiina baadiwilna.
23Ukwaasana uukna, umꞌasgi Ukwaasana, timmiimaabwa mugaddasaabwa baꞌiikwasi hookna. Wꞌankwanaayuun Yasuuꞌa Umasiih itꞌagiireeb ookiik, kassaah ishuukaaknaawwa, infisaaknaawwa, igarooyaaknaawwa yaay anuub akaab baꞌiikwasi hookna.24Bareekna waasiyaab sidkiibu, aree baruuh toon toona saki indi.
25Yꞌarawaan, anaahookna dehoon siileelaana.26Wꞌankwanaay yꞌaamanana kasseeh mugaddast salaam salaamaana.27Wꞌankwanaay oosmii oon ujawaab bariiyeeh yꞌaamanana kasseeyooh dehaay agriiteeneet toona hookna nhariw.
28Wꞌankwanaayoon Yasuuꞌaab Umasiihiit tinꞌima geebookna baꞌiiktiin.

The Seed Company

https://app.library.bible/content/752fe0f7dfba7b5f