1 Tasaaluuniikaab3
1Aakhar, gwida door ningideet toona adgiraab kinki. Hinin oodꞌoon Asiinaay niisitꞌeet toona niyaamna.2Wꞌaraawoon Tiimootiib bareek beeti nifadig. Baruuh hini geeb Ukwaasana shagaamiini, aree Umasiihiib usakana udaayiib bhaliiyiini. Baruuh wꞌiimaanookna shamtiit isꞌakiireetookna toona nhariw.3Aflaay kasseeh een igwirhaayi sabbii bareekna gaal han hookna biiꞌagaareet toonaati. Oon wꞌamaag wara kehoon ikatiib, Ukwaasana hariwaab ikatiyeet toona baraakna iknaayaakna tikteenna.4Hinin masi geebookna niifiyihoob, tuun tuuna iikti tindiyeet toona soona hookna. Hinin lhamnaneet toona aree baraak daayiib tikteenna.5Aakhar aree, gwida door nhigteet toona adgiraab binkaayi sabbii, wꞌiimaanookna iishbibi jillaay Tiimootiib dehookna afdig. Uubliis jarrabeetiit hookna, hineeb ishaga kassooh takweet biisooniiweet toona minniiman.6Tiimooti bareesookna oontꞌa yꞌagar eeya hoon, aree bareeyookna wꞌiimaanwa ureerooknaawwa usakana udaayiib sooya hoon. Baraakna diimaab hinin daayiit shꞌanii shꞌiteeneet toona sooya hoon aree hineeb eerhee dehaay hayꞌaab tikatiineet toona sooya hoon. Hinin han bak irheeyookna dehaay hayꞌaaba.7Yꞌarawaan, hinin gwida gwirhaawwa lhanaytwa niibriyeek han, wꞌiimaanuukna isꞌakiir hoon.8Baraakna Wꞌankwanaay akra iimaan tibariina. Tuun tuuna aree hinin tisꞌakiir hoon.9Baraakna hinee dehaay haay eetaaneet tifirha kasteeh kak Ukwaasana daayiib dehaay nhamid?10Hinin whawaadwa oombꞌeewwa bareekna masi rhinayeet toona sidik dehaay siileelnay. Masi bareekna shamtiit akra iimaan tidꞌaneet toonaatii dehaay siileelnay.11Ukwaasana Baabuun uuknaawwa Wꞌankwanaayuun Yasuuꞌaawwa bareekna rhiseeneetoon toonaatii dehaay siileelnay.12Wꞌankwana taktak areeyeen baꞌiikwasi hookna, aree hinin bareekna areenayeet toonaatiit, oodehay eeraw han areeyeen baꞌiikwasi hookna.13Wꞌankwanaayuun Yasuuꞌa kasseeh udehayooh geeb yꞌiiniyihoob, Ukwaasana Baabiyoon suurii gwabab anuubwa mugaddasaawwa tikatiineet toona dehookna siileelani.
The Seed Company