1 Tasaaluuniikaab1

1Baawlooswa, Siilaaswa, Tiimootiiwwa, Tasaaluuniikaay teefeet tukaniisaatiib oodehay ookiik uun ujawaab eebi. Baraah Ukwaasana Ubaabaaywa Wꞌankwana Yasuuꞌaab Umasiihiiwwa ikatiin beeti eebi.
Tinꞌimaawwa umꞌasigwa geebookna baꞌiiktiin.
2Bareeyookna jillaay diimaab Ukwaasana nhamid, kassooh oodoor aree tusileeltiyoon kasseekna neesim.3Ukwaasana Baaboon wꞌiimaaniyookna ishaga soonay, ureeri shagaayooknaawwa, akraab isꞌayaayookna Wꞌankwanaayoon Yasuuꞌaab Umasiihiib tibariineebwa han Ukwaasana soonay.
4Yaa yꞌarawaan, Ukwaasana areeyiini hookna, aree bareekna dehayooh ikwaasiit hookna waasaayookna ikatiyeet toona nikteen.5Usakana udaayiib bareekna soona hookna, Eeshuuk Imugaddasaayee yꞌeen yꞌakrireewwa tꞌakiidaateewwa toon toona nikwaas. Laakiin bhaliib aabhat haay yꞌaab kiikeen. Hinin kak tꞌiiti dehay nikatiyeet toona baraakna tiktiinna, aree hinin kak nishameetookna toona han tiktiinna.6Aflaay baraak tudiigwat agbiltaanihoob, hinin misaal tikwaasniit tiramna, aree Wꞌankwanaay oomsaal tiramna. Baraak lhamtaana, laakiin Aashuuk Imugaddasa afirhisiyaan hookna.7Baraak kasseeh Wꞌankwanaay yꞌaamanana Magadoonyaaywa Akhaaꞌiyaaywa eefeen misaal dehaay tikeena.8Wꞌankwanaayt tudiigwat bareesookna Magadoonyaawwa Akhaaꞌiyaaywa yhasheeb oobhaat baraart kitti, laakiin Ukwaasanaay wꞌiimaaniyuukna usakana kastooh tuduniyaatiib itookkaan. Shaawti toon toonaatiib naat han niyaad kindi.9Kassaah uudehay aakna baraak hinin kak tꞌashishneeb haay hadiideen. Isanama tingadni tidꞌiiniit Ukwaasana usidkiibwa udhhaniibwa shagaamtaaneet toona kassaah uudehay haay hadiideen.10Baraah masi baraak kak Wꞌoorooh Yasuuꞌaab tibreetee yꞌiiniib tehagitneet toona haay hadiideen. Ukwaasana barooh tooyat hooy yakisiya, aree whukwimiit tooyin Yasuuꞌa hinin Ukwaasanaayt tehasiyaaytii ishidhhin hoon indi.

The Seed Company

https://app.library.bible/content/752fe0f7dfba7b5f