1 Yuuhanna3
1Ubaaba kak winneet areeya hoon shibibna! Ureeruuh winneet winuuyt Ukwaasanaay ar nitoosiim. Hinin han beet toona nikati. Tuduniya barooh kanaat kitti akay hinin han kitkan hoon.2Yꞌarawaanay, oontꞌa hinin Ukwaasanaay ar nikati, aree naan niikti niyadeeb masi atookkinaat kitti. Laakiin baruuh lawiiniyihoob, hinin niikan niyad. Barooh ookna sidik rhi niyadayt, hinin barooh tꞌiiteeb niikti niyad.3Umasiih nhas ikatiyeet tunaatiit, oon bariiyooh isꞌaya ibariin kassaah han igarooyeehna isinhiisna.4Maagnaayt shagaamiiniibka whag kantꞌi, aree tumaagnaay whaggi katꞌiti tikati.5Laakiin Umasiih tumaagtoon giigsiiniyi jillaay lawaab ikatiyeet toona tikteenna. Aree bariiyooh maagnaayt kitehaay.6Bariiyooh kwanriib maagnaayt sakiini kiihaay. Tumaagnaayti dꞌuuy isoorariim barooh rhaab kiiki tari barooh kiikan.7Yꞌaraanay, gaal han biitaliis hookna. Umasiih shibukinaab ikatiyeet tunaatiit, tooshbu sakiiniibka shibu tak ikati.8Maagnaayt danꞌiibka oobliisiib ikati. Uubliis tibadootee akay maagnaayt shagaamiya. Ukwaasanaay Wꞌoor haay lawiyaneeb usabab aree, baruuh oobliisi shaga kwidhsiiniyi jillaay lawiya.9Ukwaasanaay faraay ikatiib maagnaayt soorarimti danꞌiib kiihaay. Ukwaasanaay teera bariiyooh daayiini akay, baruuh maagnaayt kiidꞌi. Baruuh han Ukwaasanaay faraay ikati akay, maagnaayt kiidꞌi.10Bak aree Ukwaasanaay ar aayga ikatiineet toona nikteen aree oobliisi ar aayga ikatiineet toona nikteen: Tudaayiinaay baadꞌiibka Ukwaasanaay oor kiiki. Usanooh baaꞌareeyay han Ukwaasanaay oor kiiki.11Toon tudiigwat baraak tibadootee timaasiwna: taktak areenayeet toonaati.12Baraak Gaabiil tꞌiiteeb baaꞌakeena. Baruuh tumaagtikina oongaalnaay ikati aree usaniyooh madoor ikati. Baruuh naanhooy oosan idir? Baruuh amaag shagaay taku, aree usanuuh shibu tak iiktiyi sabbii barooh idir.13Isanaayaan, aflaay tuduniya tinriibuukna baaꞌajjabsaana.14Hinin isanaayeen areenayeet toonaati sabbii, tuyatii umidhhan ookiik hasamnaneet toona nikteen. Baaꞌareeyayka tuyati akriri whii daayiini.15Usanooh inriibka madoor ikati. Aree madoor umidhhan udaayim manriib biihaayeet toona baraak tikteenna.16Bak aree uureer naan ikatiyeeb nikteen: Yasuuꞌa Umasiih hini jillaay umidhhanooh nuuniya. Hinin han isanaayeen jillaay umidhhanoon niyaweet toonaati.17Gaal han miraay ibariyeek, aree malya oosan shanhayt barii rheetiit nꞌakwmanaatiib dehaay biidꞌiyeek, Ukwaasanaay uureer kak bariiyooh daayiini?18Yꞌaraanay, hinin bhaliyee tari miidalaabii binꞌareenay laakiin ishagaamtiiwwa usidkiiwwa areenayeet toonaati.19Tuun tuuna malya hinin kak usidkiib nikatiyeet toona rhistini, aree Ukwaasanaay suurii iginꞌaayaan kak rayhameeneet toona rhistini.20Iginꞌaayaan hinin ittawiinhoob, Ukwaasana hineeb iginꞌaayeeka winkaab ikatiyeeb toona nikteen, aree baruuh naatka ikteen.21Yꞌarawaan, iginꞌaayaan hinin biitiwaayneek, Ukwaasanaay suurii akra ginꞌiib nikati22aree nhariweenaaka bariisooh nimeer, bariiteeh tiwasi nisnaakiir aree barooh mandhiidhna saknayi sabbii naatka nimeer.23Tuun batuuh bariitooh wasi tikati: bariiyooh Wꞌoor Yasuuꞌaab Umasiihiib oosmii aamannay, aree baruuh sooyaneet toonaatiit taktak areenayeet toonaati.24Baliin bariiteeh tiwasi isnaakiir bariiyooh ikweerna, baruuh han bareeyooh kwanri. Aree baruuh hoon kwanriyeet toona bak nikteen: Toon toona baruuh hiiyyaayeen ikatiib Ishuukee nikteen.
The Seed Company