Kolosiyawa2
1Mbe cwo wa yiri jwə nangnu gəmə nənə yo gua kəfi ɓa ngwi ɓa la Lawudukiya ni kəfi ɓa ngwi ngɛ ɓa nyimə nə nla zayi ɓa zayi ni.2Gəmə nə nang ni yona ya gaɓa mə pɛ ɓa sa anyanya nə kəfi mɛ daaɓa ɓwa nəshi sa nang shan, kəfi ɓa menang mə apɛpɛ yi naɓa sɛgwɔn nə angye nə ade yi nang nyi la mɓanə ni. La məngang sɔ kə la nyi nə nang a jwanjwa yi Nyimoː ni, angye kanə Almasihuː sɔ ni.3Ka kɔ nə nang bwedang nywi nang nga bwenə paca nang nyangnə jwanjwa yi myɛ Nyimoː ɓa nang nyi.4Gəmə cwo wanə, nankənə, ɓu dya ngwi ngɛ fundowa la ɓa dansa sanyang ɓa, ko bəɓa zang gɔ ngəni.5Yona konte gəmə nene sa swe ɓowa, aɓeku gəmə ngənə ɓowa sa yingu, kəfi gəmə ngə wa nuamə sa nang yi ma ngə gua ɓa nyɛnə ɓa angye gua ngənə kupaca sa yoade gua sa Almasihuː ni.6Na nang gua cwenə Almasihuː Yesɔ nə Daa shayonki ngɔn ni, u də ɓwa nəshi ɓawa.7U ngə nyanya la sawa, ma dodə gua lashi wa, kəfi u ngə anyanya sa yoade gua, na nang ɓa mowa nə ɓenə ni. Kəfi u pɛ ɓa nang wisi nə.8Unə akilo, nankənə, ngə ya ngwi ngɛ ɓɛ nyowa nə nwinfɔ la lasa nang dansa yi myɛ nəngwi ɓa, angye nga ɓanə lasa nang maɓenə nang bwanə la ɓe nəngwi ɓa kəfi lasa yingu yi lasapyang, lasa Almasihuː la.9Yonəmani nang pɛ yi sa nang la ka nla ni də lasa Almasihuː, ngə la sawa,10kəfi gua ɓa noa wii apɛnpɛ ɓwanə ɓa Almasihuː. Kɔnə ngwi nə gang lashi yingu nə gang anwaku ɓa njamu nə.11Sa nang ɓwanə ɓa Almasihuː gua ɓa kəndo wa ngɔn, ka yiri nang kəndẽ angye nga nənə ɓa gaɓe nəngwi anvi ni la, ama ɓa kəndẽ angye Almasihuː nənə ni, angye ɓwanə ɓa nang towa nə ɓe lasa njamu yi nang anjɔ yi swe ni.12Yona sade ɓa nəwa nə botisma ni, ɓa diiwa ngɔn ɓa Almasihuː, kəfi lasa botisma ɓa lwewa nə ngɔn ɓa Almasihuː la ɓe yoade gua lasa njamu nangnu yi Nyimoː, nang lwewa nə sa wii ajədo ni.13Gua sayin nloni gua wuu ngɔn sa yingu yonəmani yo nang anjɔ gua kanə ngwi ɓa kanə Yahudawa ɓa lani angye ɓa nene ɓa nangzhĩ yi Musa ni. Ama ɓeni Nyimoː ɓoa ɓa wii nə ɓa Almasihuː. Nyimoː yevu )tubi<< ngɔn sa paca nang anjɔ je ɓa nəni ngɔn;14gɔ ja nang jwa ɓa dənla yi nang anjɔ ɓa angye ɓa ngənə lasɛ kəfi mu ye gha ku paca sa nang gba sa shĩ agangan.15Kəfi lasa shĩ agangan Almasihuː ta sɔɓe lasa njamu yi yingu nə gang ɓa njamu ɓa; gɔ maɓa nə nang a nyang ɓanə na asang la baba la saɓa sa nang cweɓa nə nang a dwəndwə ɓa sa cwe gang gɔ sa shĩ agangan.16Nankənə ɓu dya ngwi ngɛ nə gang shi nang gua lu tang ko lu faa ko yo lalo atẽtẽ ɓa ko yo yinyɔ sɛ apa ɓa ko lalo awinwi.17Namɓa niku ka yingu namɓa nga ɓani; nang ade kɔnə Almasihuː.18Bu dya ngwi ngɛ ɓe joa la ɓe ngwi nang nga ya gənə kanə ngwi agang yonəmani yo dyɔ ayinse adede ɓa angye ɓa ngənə sa nang finə swe kəmi yi dansa kəfi ɓa nang ju yi maleka ɓa. Yo nang ngɛ nla kupaca, yiri ngwi ɓani nga lwenə saɓa lankwã sa nang zha zho nang chəng yi nəngwi anvi gaɓa.19kəfi ɓa vyaɓe sa nang gwaɓesa Almasihuː ngɔn, angye kɔnə lashi nang nyangnə swe ni. Almasihuː mu swe paca jwanə ɓa yiga gɔɓa ɓa paa ɓa kəfi nga gang na nang Nyimoː nga shang ɓanə na gang nəni.20Gua wuu ngɔn ɓa Almasihuː kəfi ɓa towa ɓe ngɔn sa nang nə gang yingu ɓa la lasapyang. Nankənə, ka yo nə, gua u də na ngwi ɓa kanə yi lasapyang ni ma? Ka yonə kə gua na gang sa yiri namɓa ni.21<<Bu nyamɓe sa nang nila,>> <<Bu ɓɛ la,>><<Bu twɔnɓe sa nang ngɛ ɓa la,>>?22Namɓa niku cwayo sa namɓa ɛ yenəmi yinse ni ɓə nə naase ɓa nga nə nangnu ɓaɓa ni; gaɓa ka yonang nəngwi ɓa cwani kəfi ɓa nang maɓenə ɓa.23Ka yoadəde yiri yoɓa ni bwalasa mye sa nang nyowa ɓa njamu nə na ju maleka ɓa, kəfi nang finə swe kəmi yi dansa, kəfi ɓa nang nyangwɔn sa swe a jwənjwə; ama gaɓa nene ɓa njamunə na nyangwɔn sa nang shãn swe je ɓa.
The Word for the World International